كلیپەكا خۆ ب (زیرەكیا چێكری) دروستكریە
سۆلین سلێمان:
سترانبێژ (میران عەلی) كو ژیێ وی (30) سالن و خەلكێ پارێزگەها سلێمانیێ یە، د دیدارەكێ دا بۆ رۆژنامەیا ئەڤرۆ گۆت: ئەز حەزژ هەموو سترانێن خوە دكەم، ب تایبەت ژی سترانا (خۆشم دەوێی) چنكو خەلكەكێ زۆر حەزژێكرن و ئەز گەلەك ب وێ سترانێ بەرنیاس بووم.
هەروەسا گۆت: ئەڤە پتری (10) سالانە ئەز سترانان دبێژم و دەستپێكا من د پشكداریكرنێ بەرنامەیەكێ دەنگخۆشان دا دەستپێكر، پشتی بەرنامە ب دووماهی هاتی هەر ئەز یێ بەردەوام بووم و دووماهی سترانا من كلیپەكا دویت بوو ل گەل هونەرمەند (ئەردەلان بەكر) كو بەری چەند هەیڤان هاتیە بەلاڤكرن، ئەو ستران ب شێوازێ دەنگ و ڕەنگ مە ب (زیرەكیا چێكری) چێكربوو، سوپاس بۆ خودێ و هەڤالێن تێدا كاركرین گەلەك باش چێكربوو، و خەلكەكێ زۆر حەزژێكرن و هیڤیا من ئەوە هونەرێ كوردی پتر پێشبكەڤیت و سترانبێژ هند گرنگیێ ب ڤیۆیان نەدەن، چنكو نوكە گەلەك گرنگی ب ڤیۆیان ددەن.
