سەنتەرێ كۆماتە پـرتووكا (پەیاما گـولانێ) دا نیاسین و ئیمزاكـر
دهۆك، سالار دۆسكی:
درێورەسەمەكێ ژ هەژی دا ب بەرهەڤبوونا فازل میرانی، بەرپرسێ دەستەیا كارگێری یا مەكتەبا سیاسی یا پارتی دیموكراتی كوردستان و زەعیم عەلی، ئەندامێ مەكتەبا سیاسی و سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ و د. عەلی تەتەر، پارێزگارێ دهۆكێ و چەندین فەرماندە و پێشمەرگەهێن قەهرەمان بەرپرسێن حزبی و حكومی وەلاتیان، دوهی 1/12/2025 ل هۆلا كۆنفرانسان ل زانكۆیا دهۆك، سەنتەرێ كۆماتە یێ دەكومێنتكرنا دیرۆكا شۆڕەشێ، پرتووكا خەباتكەرێ دێرین (فوئاد میرانی) یا بناڤێ (پەیاما گولانێ) دا نیاسین و ئیمزاكر.
ل دەستپێكێ رزگار كێستەیی، بەرپرسێ سەنتەرێ كۆماتە پەیڤەك پێشكێشكر و بەحسێ چەندین بیرهاتن و بیرەوەریێن خەباتكەر (فوئاد میرانی) كر و ماندیبوونا وی د قووناغێن سەختێن شۆڕەشێ دا.
فازل میرانی، بەرپرسێ دەستەیا كارگێریا مەكتەبا سیاسی یا پارتی د پەیڤا خۆ دا بەحسێ گرنگیا نڤیسینا بیرەوەریێن شۆڕەشێ و خەبات و بەرخودانا خەباتكەر (فوئاد میرانی) كر، دیسا دەستخۆشی ل نڤیسەرێ پرتووكێ و سەنتەرێ كۆماتە كر.
دیسا هەر د رێورەسمان دا هەر ئێك ژ زەعیم عەلی، ئەندامێ مەكتەبا سیاسی یا پارتی و ئاكۆ محەمەد، رێڤەبەرێ گشتیێ تۆڕا میدیایی یا رووداو، بەحسێ گرنگییا دەیكومێنتكرنا ئەرشیفێ شۆڕەشێ كر و دەستخۆشی ل نڤیسەرێ پرتووكێ كرن، پاشی فلمەكێ دوكیۆمێنتاری ل سەر كار و چالاكیێن سەنتەرێ كۆماتە هاتە نیشادان.
ل دووماهیێ فوئاد میرانی، نڤیسەرێ پرتووكێ بەحسێ چەند ئالیێن پرتووكێ كر و ئەو قووناغێن تێدا دەربازبووی و هیڤی خواست شیابیت پەیام و بیروەریێن خوە ل شۆڕەشێ گەهاندبن.
