گرۆپێ شانۆیا هەوار دو خەلات ل عومانێ وەرگرتن
زنار تۆڤی:
نەژاد نەجم، بەرپرسێ گرۆپێ شانۆیا هەوار ل پارێزگەها كەركووكێ، د دیدارەكێ دا بۆ رۆژنامەیا ئەڤرۆ دیاركر كو گرۆپێ وان ب شانۆگەریا (سەلما) پشكداری د فێستیڤالا نێڤدەولەتیا دەن ل مەسقەتا سەلتەنەتا عومان دا كرییە، كو بۆ دەمێ حەفت رۆژان یا بەردەوام بوو، 18 وەلاتێن جیهانی پشكداری د وێ فێستیڤالێ دا كربوون.
ناڤهاتی گۆت: ئەڤ سالە مە ژی وەكو گرۆپێ هەوار پشكداری د وێ فێستیڤالێ دا كر و مە شیا خەلاتێ باشترین ئەكتەرا كچ وەربگرین كو ئەو ژی بۆ (هەوار فارس) بوو، هەروەسا گرۆپێ مە خەلاتێ باشترین دەقێ شانۆیێ ژی وەرگرت، كو ب (د. دلشاد مستەفا) ی هاتە دان و ئەم گەلەك كەیف خۆشبووین، كو مە ئەو هەردو خەلاتە وەرگرتین، هەر دئەڤ سالەدا ب وێ شانۆگەریێ مە پشكداری د چەندین فێستیڤالێن نێڤدەولەتی دا كرییە و ئەم نوونەراتیا هەرێما كوردستانێ و ئیراقێ دكەین.
