هەتا نوكە من 125 كەڤالێن شێوەكاری فرۆتینە
زنار تۆڤی:
شێوەكار (هادی فەتاح) د دیدارەكێ دا بۆ رۆژنامەیا ئەڤرۆ گۆت: ئەز دەرچوویێ ئامادەیا چاندنێ مە، د زارۆكاتییا خۆ دا من حەز ل سەر كارێ شێوەكاری هەبوو، بەلێ ژ ئەگەرێ هندێ كو خواندنا من پەیوەندی ب كارێ شێوەكاریێ ڤە نەبوو، ئەز دووركەفت بووم، هەر چەندە هندەك جاران من وێنە چێدكرن، بەلێ پشتی بوویمە فەرمانبەر ل سازییەكا چاندنێ ئەز پتر ژ كارێ شێوەكاریێ دووركەفتم، پشتی ئەز خانەنشیم بوویم، جارەكادی من دەست ب كارێ شێوەكاریێ كر و ئەڤە چەندین سالە ئەز ڤی كاری دكەم. ناڤهاتی گۆت: ناڤەرۆكا پڕانیا كەڤالێن من ل سەر گوند و سرۆشتێ رەنگینێ كوردستانێ یە و ل سەر داخوازا خەلكی ئەز كەڤالان چێدكەم و خەلكێ مە حەز ل سەر كەڤالێن سرۆشتێ كوردستانێ هەنە، بەلێ ژبەر بهایێن وان، گەلەك كەس كەڤالێن خۆمالی ناكڕن، چونكی كەڤالێن چاپكری یێن گەلەك ئەرزان دناڤ بازاری دا هەنە، لەوما خەلك زوو ب زوو وان كەڤالان ناكڕن، یێن ب دەست دهێنە چێكرن، هەروەسا ل سالا 2018 ێ، من دەست ب فرۆتنا كەڤالان كرییە، د ماوێ ڤان هەشت سالان من 125 كەڤالێن سرۆشتی فرۆتینە بەری نوكە ڤەكرنا پێشانگەهێن شێوەكاری گەلەك گرنگیا خۆ هەبوو، بەلێ د نوكە دا ئەو گرنگیە نەمایە، چونكی نوكە مرۆڤ دشێت ب رێیا تۆرێن جڤاكی بەرهەمێن خۆ نیشا بدەت.
