ترومبێلەكا پێشكەفتی یا ئاگرڤەمراندنێ بۆ پارێزگەها دهۆكێ هاتە دابینكرن
دهۆك، لەزگین جۆقی:
ڕاگەهاندنا رێڤەبەریا بارەڤانیا باژێڕی ل پارێزگەها دهۆكێ دیار كر، د چارچوڤێ گرنگیدانا كابینەیا نەهێ یا حكومەتا هەرێما كوردستانێ ب سێكتەرێ باڕەڤانیا باژێڕی، ژ بۆ پاراستنا سەر و سامانێ وەلاتیان، ل سەر فەرمانا سەرۆكێ حكومەتا هەرێما كوردستانێ ترۆمبێلەكا پێشكەفتی یا ئاگرڤەمراندنێ و ڕزگاركرنێ، كو شیانێن گەهشتنا ب بلنداهیا 100 مەتران هەیە، بۆ رێڤەبەریا بارەڤانیا باژێڕی ل پارێزگەها دهۆكێ هاتە دابینكرن.
بیوار عەبدولعەزیز، پەیڤدارێ رێڤەبەریا باڕەڤانیا باژێڕی ل پارێزگەها دهۆكێ بۆ رۆژناما ئەڤرۆ گۆت: «ئەڤ ترۆمبێلە ژ جۆرێ سۆكەیگ (Socage) یا ئیتالییە، ب ئێك ژ پێشكەفتیترین ترۆمبێلێن ئاگرڤەمراندنێ ل سەر ئاستێ جیهانێ دهێتە دانان، ب تایبەت بۆ سەرەدەریكرن ل گەل ڕوودانێن ئاگركەفتنێن د تاوەرێن بلند و ئۆپەراسیۆنێن ڕزگاركرنا وەلاتییان دا».
