ب گوژمێ پتر ژ دو ملیار دیناران پڕۆژەیێن ئاڤێ ل ئاكرێ دهێنە بجهئینان
رەمەزان زەكەریا:
ل دەڤەرداریا ئاكرێ و ب مەرەما كێمكرن و چارەسەركرنا ئاریشەیا ئاڤا ڤەخوارنێ، كار ل سەر كۆلانا هەژمارەكا بیرێن ئاڤێ دهێتە كرن، هەتا پڕۆژەیێ ستراتیژی یێ ئاڤا ئاكرێ دهێتە تەمامكرن.
ئەندازیار زرار ئەحمەد، رێڤەبەرێ ئاڤا ئاكرێ بۆ ئەڤرۆ گۆت: «حكومەتا هەرێما كوردستانێ ب گوژمێ پتر ژ دو ملیار و 500 ملیۆن دیناران پڕۆژەیێن ئاڤێ ل دەڤەرداریا ئاكرێ بجه دئینیت، نوكە كار ل سەر كۆلانا 23 بیرێن ئاڤێ ل ناوچەداری و كۆمەلگەه و گوندێن سەر ب دەڤەرداریا ئاكرێ ڤە دهێتە كرن».
ناڤبری گۆتژی: «هەر دەمێ پڕۆژەیێ ستراتیژیێ ئاڤا ئاكرێ تەمام بوو، ل وی دەمی دەرگەهێ ب سەدان بیرێن ئاڤێ دێ هێتە گرتن، پێخەمەت پاراستنا ئاڤا ژێر ئەرد ل دەڤەرا ئاكرێ».
ئەندازیار زرار زێدەتر گۆت: «ل ناوچەداریێن گردەسێن و بجیل و دینارتە و د ناڤ سەنتەرێ ئاكرێ دا 28 پڕۆژەیێن ئاڤێ هەنە، ژ وانا: 23 پڕۆژەیێن كۆلانا بیرانە، ب مەرەما چارەسەركرنا ئاریشەیا كێمئاڤیێ، ب تایبەتی ل وەرزێ هاڤینێ».
