پێدڤییە ئەو كەسێن بەرپرسیار ژ هێرشا ل سەر كۆرمۆرێ بۆ دادگەهێ بهێنە رادەستكرن
نوونەرێ تایبەت یێ سكرتێرێ گشتیێ نەتەوەیێن ئێكگرتی بۆ ئیراقێ ل جڤاتا ئاسایشا نێڤدەولەتی داخوازا ب لەزكرنێ د پێكئینانا حوكمەتا نوو یا ئیراقێ و هەرێما كوردستانێ كر و راگەهاند: سەرەرای وێ چەندێ ل دەستپێكا سالا داهاتی ئەركێ (یونامی) دێ ب دووماهی هێت. بەلێ دڤێت هەڤبەندیێن هەولێرێ و بەغدایێ ل سەر بنەمایێ دەستووری بهێنە رێكخستن و هێرشێن ل سەر دەزگەهێن وزەیێ بهێنە راگرتن.
محەمەد ئەلحەسان، نوونەرێ تایبەتێ سكرتێرێ گشتیێ نەتەوەیێن ئیكگرتی بۆ ئیراقێ و سەرۆكێ تیما (یونامی) ل بەغدا پەیڤەك ل جڤاتا ئاسایشا نێڤدەولەتی ل دۆر دووماهی پێشهاتێن ئیراقێ پێشكێشكر.
محەمەد ئەلحەسان د پەیڤا خوەدا گوت» داخواز دكەم هەردو حوكمەتێن نوو ل هەرێما كوردستانێ و ئیراقێ ب زووترین وەخت بهێنە پێكئینان، كو دێ بیتە ئەگەرێ چارەسەركرنا كێشەیێن د ناڤبەرا واندا و باشتركرنا هەڤبەندیێن وان، هیڤیدارین پرسێن هەلاویستی د ناڤبەرا هەولێرێ وبەغدایێ ل سەر بنەمایێ دەستووری بهێنە چارەسەركرن و هەماهەنگیێ بكەن».
گوت ژی» ل ئیراقێ نوكە ملیۆن ئاوارە د ناڤخوەیا وەلاتیدا هەنە، هەروەسا زێدەتر ژ 100 هزار ئێزدیێن خەلكی شنگالێ پشتی 11 سالان هێشتا د ناڤ كەمپاندا دژین و د رەوشەكا گەلەك خراب دانە و پشكەك ژ وان هەتا نوكە ژ دەستێ داعشێ نەهاتینە رزگاركرن».
ئاماژەكر ژی» سەرەرای وێ چەندێ ئیراق ل سەر ململانێیێن ناڤخوەیی ب سەركەفتییە، بەلێ هەتا نوكە كێشەیێن ئەمنی و ئابۆری ب تمامی نەهاتینە چارەسەركرن».
نوونەرێ تایبەتێ سكرتێرێ گشتیێ نەتەوەیێن ئیكگرتی بۆ ئیراقێ باس ل وێ چەندێ ژی كر كو ژ هێرشكرنێ ل سەر دەزگەهێن ئیراقی و ب تایبەتی هێرشا ل سەر زەڤییا كۆرمۆر یا غازی گەلەگ یێ دلتەنگە و دڤێت ئێكسەر ئەو هێرشە بهێنە راگرتن و ئەو كەسێن ژ وان هێرشان بەرپرسیارن بهێنە رادەستكرن بۆ دادگەهێ.
محەمەد ئەلحەسان پتر رۆهنكر» حوكمەتا ئیراقێ ژ بجهئینانا ستانداردێن پاراستنا مافێن مرۆڤی بەرپرسیارە، ئەوژی مافێ پێكهاتەیان، گەنجان و ئافرەتانە، هەڤدەم ل گەل ئازادییا رادەربڕینێ، كو بنەمایە بۆ هەبوونا جڤاكەكێ دیموكرات».
هەروەسا داخواز ژی ژ سەركردەیێن ئیراقێ كر رێزێ ل كچان بگرن و رێگریێ ل شوودانا پێشوەخت یا وان بكەن و وێ كێشەیێ چارەسەر بكەن، چونكە ئیراق ل گەل نەتەوەیێن ئێكگرتی بەر ب قووناغاەكا نوو پێنگاڤان د هاڤێژیت.
هەروەسا دیاركر» سەرەرای وێ چەندێ ل دەستپێكا سالا داهاتی ئەركێ یونامی ل ئیراقێ دێ ب دووماهی هێت، بەلێ هەماهەنگیێن مە ل گەل وی وەلاتی دێ بەردەوام بن و قووناغەكا نوو دێ دەستپێكەت و دێ بەردەوام بین د پشتەڤانیكرنا ئیراقێدا، بۆ وێ چەندێ ب راوێژییا نەتەوەیێن ئێكگرتی ل سەر بابەتێن ئابۆری، سەقا، مافێن مرۆڤی، ئاوارەیان، پشكدارییا چالاك یا ئافرەتان، گەنجان و پێكهاتەیان خوە ئاڤا بكەت.
