پێدڤیە حوكمەتا نوو یا ئیراقێ هەر خێزانەكا شنگالێ 15 ملیۆن دیناران بدەتێ
دهۆك، لەزگین جوقی
شەمۆ قەیرانی، ئێكە ژ ئاوارێن شنگالێ ل كۆمەلگەها شاریا سەر قەزا سێمێلێ ڤە ئاكنجیە گۆت: ئەم چاڤەرێینە دناڤ بۆدجەیا ساڵا 2026ێ دا حكوومەتا ئیراقێ پارەكی بۆ ئاڤەدانیا شنگالێ تەرخان بكەت، ل ساڵا 2014ێ ئەم ژ شنگالێ ئاوارەبوون هەتا نوكە مە نەشیایە ڤەگەرین، ژبەركۆ خانیێن مە هاتنە پەقاندن و وێرانكرن و ئەم نەهاتینە قەرەبووكرن.
زێدەتر گۆت: د كابینا نوی حكوومەتا ئیراقێ دا پێدڤیە شنگال نەهێتە ژبێركرن و خانیێن خەلكێ بهێنە چێكرن یان خەلك بهێتە قەرەبوو كرن.
عەبدوللا خەلەف، ئاوارەیێ شنگالێ یە ل دهۆكێ دژیت گۆت: پشتی 11 سالێن ئاوارەیی، ئەز دگەل خێزانا خۆ چوومە شنگالێ، لێ مە نەشیا دناڤ خانیێن هەیكەل و بێ خزمەتگوزاریدا بژین، لەوما دووبارە ئەم ڤەگەریاینە دهۆكێ.
پیر دەیان، رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ گۆت: پێدڤیە د حۆكمەتا نوی یا ئیراقێدا پلانەك بۆ ڤەگەریانا ئاواران بهێتە دانان، ژبەركۆ ئەگەر ئیراقێ چ پلان و بەرنامەیێن باش نەبن، ب زەحمەتە ئاوارە بشێن ڤەگەرن و پرۆژێن خزمەتگوزاری بگەهنە دەڤەرێن ئاواران.
ئەو ژی بەرچاڤكر، بۆ قەرەبوویا هەر خێزانەكا ڤەگەرتە شنگالێ پێدڤیە ب كێماسی گوژمێ 15 ملیۆن دینار وەكۆ قەرەبوو كرن بهێنە دان دا كۆ خەلك بشێن جهێن ئاكنجیبوونێ چێكەن.
