مریشكێن ل دهۆكێ دهێنە بەرهەمئینان ل سەر ئاستێ هەرێمێ و ئیراقێ یێن ئێكێ نە
سندس سالح سلێڤانەیی:
هژمارەكا خودانێن پرۆژەیێن بخودانكرنا مریشكان ل سنۆرێ پارێزگەها دهۆكێ دیاردكەن كو ئەو مریشكێن ل دهۆكێ دهێنە بەرهەمئینان ل سەر ئاستێ هەرێمێ و ئیراقێ ژلایێ تامێ و پاقژیێ ڤە یێن ئێكێ نە و تێرا هەموو پارێزگەهێن هەرێمێ و یێن ئیراقێ دكەن و ئابۆرناسەك ژی دبێژیت: گرنگە حكومەت پشتەڤانیێ ل وان پرۆژەیان بكەت و هەموو ئاسنكاریان بۆ بەردەست بكەت.
سالح حسێن، خودانێ پرۆژەیەكێ ب خودانكرنا مریشكانە دبێژیت: ل هەموو پرۆژەیێن باش چاڤدانەكا باش بۆ مریشكان دهێتە كرن و ب شێوەیەكێ دروست و ساخلەم دهێنە بخودانكرن، لەورا دەمێ مەزن دبن و دهێنە سەرژێكرن و تاما وان یا خۆشە، ژبەر هندێ ل هەموو پارێزگەهێن هەرێمێ و ئیراقێ داخوازی ل سەر هەنە و ئەم دشێین بۆ هەموویان دابین بكەین، لێ یا فەرە حكومەت ژی هاریكاریا مە بكەت ژلایێ دابینكرنا كارەبێ و گازوایلێ ڤە، چونكو هەبوونا ڤان پرۆژەیان بۆ پارێزگەها دهۆكێ گەلەكا گرنگە و ئەم شیاینە دەلیڤەیا كاركرنێ بۆ گەلەك كەسان ڤەكەین.
سدقی، خودانێ پرۆژەیەكێ دی یە ئەو ژی دبێژیت: مریشكێن ل دهۆكێ دهێنە بكارئینان گەلەك دخۆش و ب تامن، چونكو ب شێوەیەكێ دروست و ل دووڤ ستاندەرێن جیهانی دهێنە بخودانكرن، هەروەسا گەلەك دپاقژن ژی، لەورا یێن ئێكێ ل سەر ئاستێ هەرێمێ و ئیراقێ و هەكە رێخۆشكرن هەبیت دێ مریشكێن دهۆكێ چنە هەموو پارێزگەهێن ئیراقێ، هەر چەندە نوكە ژی بۆ دچن، لێ ب رێژەیەكا نەگەلەك زێدەنە.
كاروان زیاد، وەك ئابۆرنەسەك دبێژیت: گرنگە وەزارەتا چاندنێ بەرنامەیەك بۆ پشتەڤانیكرنا ڤان پرۆژەیان و هەر پرۆژەیەكێ دی كو بەرهەم ژێ دهێت هەبیت و ئەڤە ئەركێ حكومەتێ یە، چونكو هەكە حكومەت یا هاریكار بیت خودانێن وان پرۆژەیان ژی دێ شێن پتر كارێ خۆ پێشڤەبن و بەرهەمێ زێدەتر ئینە ناڤ بازاڕی و ئەڤ چەندە دێ بیتە هۆكارەك كو ژێرخانەیا ئابۆری ل وەلاتێ مە، ب تایبەت ژی ل پارێزگەها دهۆكێ پتر پێشڤەبچیت و بەرهەمێ زێدەتر و باشتر بكەڤیتە ناڤ بازاڕی.
