339 پڕۆژەیێن خودانكرنا مریشكان ل دهۆكێ هەنە
دهۆك، دلۆڤان ئاكرەیی:
رێڤەبەرێ سامانێ گیانەوەری ل دهۆكێ دیاركر، ل پارێزگەها دهۆكێ 339 پڕۆژەیێن خودانكرنا مریشكان هەنە، ڤان پڕۆژەیان شیانێن خودانكرنا شەش ملیۆن مریشكان د ئێك جار دا هەنە و تێكرا بەرهەمێ وان یێ سالانە دگەهیتە پتر ژ 42 هزار تەنێن گۆشتی.
رێدیر سدقی، رێڤەبەرێ سامانێ گیانەوەری ل پارێزگەها دهۆكێ بۆ رۆژنامەیا ئەڤرۆ گۆت: «پیشەسازییا پەلەوەری ل هەرێما كوردستانێ پێشكەفتنەكا مەزن ب خۆڤە دیتیە، مە خۆژینیكرن د گۆشتێ مریشكێ دا ب دەستڤە ئینایە و بەرهەمێ زێدە ژی بۆ دەرڤە دهێتە هنارتن».
ناڤهاتی ئاماژە ب وێ چەندێ ژی كر، پارێزگەها دهۆكێ سالانە پێدڤی ب نێزیكی 35 بۆ 37 هزار تەنێن گۆشتێ مریشكێ هەیە، لێ نوكە نێزیكی 42 بۆ 45 هزار تەنێن گۆشتێ مریشكێ ل دهۆكێ دهێنە بەرهەمئینان، ئەڤە ژی بوویە ئەگەرێ دابینكرنا ئاسایشا خوارنێ و پەیداكرنا دەلیڤەیێن كاری بۆ ئاكنجیێن دەڤەرێ و ڤەژاندنا ئابووری، دیسا رۆژ بۆ رۆژێ داخوازی ل سەر ڤەكرنا پڕۆژەیێن نوو یێن خودانكرنا مریشكان د زێدەبوونێ دان».
