لژنەیا پیشەسازی و وەبەرهێنانێ 23 داخوازی و پڕۆژە پەسەندكرن
د. عەلی تەتەر، پارێزگارێ دهۆكێ دوهی 16/12/2025 سەرپەرشتیا كۆمبوونا ئاسایی یا لیژنا پیشەسازی و وەبەرهێنانێ كر و تێدا بەحسێ رەوشا كەرتێ پیشەسازی و وەبەرهێنانێ و دووڤچوونا داخوازیێن بازرگان و وەبەرهێنەران ل سنۆرێ پارێزگەهێ د كەرتێن جودا دا هاتە كرن.
پشتی گەنگەشێن تێر و تەسەل ل سەر هەر داخوازیەكێ هاتینە كرن، (23) داخوازی و پڕۆژە د كەرتێن جودا دا هاتنە پەسەندكرن، هەروەسا لیژنەكا بسپۆر هاتە پێكئینان، كو ب هووربینی دووڤچوونا وان پڕۆژە و داخوازیان بكەت، یێن بەری نوكە ژ لایێ لیژنێ ڤە هاتینە پەسەندكرن، كا ل دووڤ یاسا و پیڤەرێن گشتی هاتینە دامەزراندن یان نە.
پارێزگارێ دهۆكێ دوپاتكر كو هەر داخوازیەكا هاتیە پەسەندكرن، دڤێت ل دووڤ رێنما و یاسایێن حكومەتا هەرێما كوردستانێ بهێتە دروستكرن، كو د بەرژەوەندیا گشتی دا بیت و كارتێكرنێ ل سەر ژینگەهێ نەكەت و دەلیڤەیێن كاری بۆ خوجهێن دەڤەرێ پەیدا بكەت و پشتەڤانیا پارێزگەهێ بۆ چێكرنا هەر پڕۆژەكێ وەبەرهێنانێ دیاركر.
دیسا هەر دوهی 16/12/2025 د. عەلی تەتەر، پارێزگارێ دهۆكێ ب ئامادەبوونا ماجد سەید سالح، جێگرێ پارێزگارێ دهۆكێ و بریندار حەیدەر، دەڤەردارێ دهۆكێ و دژوار شەوكەت، دەڤەردارێ سێمێلێ سەرپەرشتیا كۆمبوونەكا تایبەت ل گەل چەند رێڤەرێن گشتی و یێن پەیوەندیدار كر.
د كۆمبوونێ دا بەحسێ چێكرنا ماستەرپلانا چەند گوندێن دەروبەرێن دهۆكێ، وەكو: (ئەڤریكێ و ئێمینكێ و بێتاسێ و بێسرێ) و رێكارێن ڤەگوهاستنا نڤیسینگەهێن فرۆتنا كەرەستێن ئاڤاكرنا خانیان ژ ناڤ باژێڕی و نووژەنكرن و ب سەروبەركرنا خانیێن كەلەپوری ل ناڤ سەنتەرێ دهۆكێ ب گشتی هاتە كرن.
پارێزگارێ دهۆكێ دوپاتكر كو دڤێت ماستەرپلانەكا زانستی و رێكخستی و ل دووڤ رێنما و یاسایێن حكومەتا هەرێما كوردستانێ بۆ هەر چار گوندان بهێتە ئامادەكرن و زێدەگاڤی نەهێنە كرن و بابەتێن پاراستنا چاندنێ و ژینگەهێ و دارستانێ ل بەر چاڤ بهێنە وەرگرتن.
