دوبـەرەكـی دەردەك گـرانـە
ئيحسان ئـامێدی
باوەریەكا چێبووی كو یێ سەركەفتی رێدانان و مێژوویێ وەكو خۆ دنڤیسیت و جێگیر دكەت، و یێ شكەستی خۆ ئەگەر ل سەر راستیێ ژی بیت، نەشێت میژوویێ بنڤیسیت!، و ل مێژوویا مرۆڤایەتیێ دا چەندین سەرهلدانێن مافدار سەركوتكرینە و هاڤێتینە د خانەیا خۆفرۆشیێ و نوكەریێ دا و ژبیربرینە و چەندین زۆردار و ستەمكار سەركەفتینە و سەرفرازی بۆ خۆ تۆماركرینە.
لێ هەر چاوا بیت راستی ناهێتە ڤەشارتن و مێژوو ناهێتە ژێ برن، بەلێ دهێتە شاشمیكرن!. و ل دوماهیێ راستی دێ دیار بیت و سەركەڤیت.
د مێژوویا مرۆڤان دا سەربۆرێن وەكهەڤ چێدبن، دێ بێژی مێژوو خۆ دوبارە دكەت ب رەنگەك دی، ل دەمەك و ل جهەكێ دی!.
دو سەربۆڕێن مێژوویێن وەكهەڤ د مێژوویا جڤاكێن دەڤەرێ دا هەنە و حەتا نوكە دبەردەوامن و باندۆرا خۆ دكەن، یا ئیكێ د ناڤ جڤاكا عەرەبی دا ل حیجازێ، ململانێ و ناكۆكیێن وان ب سەرهلدانا محەمەد پێغەمبەری و ئیسلامێ ژی چارەنەبوون، بەلكو ل گەل گەشەبوونا ئیسلامێ هەردو بنەمالێن هەڤڕك بنی هاشم و بەنی سفیان، كو بنی هاشم خۆدانێن پەیاما ئیسلامێ بوون، و بنی سفیان دژ بوون، ل گەل مسلمانبوونا پتریا خەلكێ وێ دەڤەرێ، بنەمالا بنی سفیانی ژی كراسێ مسلمانەتیێ ل بەر خۆ كر، لێ ململانێ و هەڤڕكیا وان ل سەر دەستهەلاتی و دەستكەفتیان هەر مان و هاتنە ڤەگوهاستن بۆ ناڤ مسلمانان دا و شەڕێن خویناوی لێكەفتن و موسلمان بوونە دو بەر و پتر و ل ئێكەمین هەلنگفتنا موسلمانان ل سەردەمێ راشدیان، وان كۆدەتایا خۆ كر و دەولەتا ئەمەوی دامەزراند و تۆلەیێن خۆ ڤەكرن، و حەتا نوكە ژی ئەو ململانێ بناڤێ سونە و شیعە و گرۆپێن وان یا خوینێ درێژیت!
ل كوردستانا ئیراقێ، د ناڤ جڤاكا كوردستانی دا، هەڤڕكی د ناڤبەرا ئایین و ئۆلۆێ و هۆز و خێل و گرۆپێن سیاسی دا هەبوو، بزاڤێن سیاسی و جڤاكی د ناڤچەیی بوون، ل سەرهەلدانا مەلا مستەفایێ بارزانی وەكو سەركردەیێ نەتەوەیێ رزگاریخواز، خەلكێ كوردستانێ باوەری پێئینا و لێ خڕڤەبوون، ئێدی پێدڤی ب هەبوونا رێكخستنەكا سیاسی بوو، و ل دویڤ بیرۆكا بارزانی چ شۆرەشەك بیێ پارتیەكا رێكخستی سەرناكەڤیت، پارتی دیموكراتی كوردستان دامەزراند. هەر ژ دامەزراندنا پارتی ئیبراهیم ئەحمەد دژ راوەستا، ل بەراهیێ نەهات ل گەل پارتی لێ دەمێ دیتی كو بارزانیێ سەركردەیێ نەتەوەیی یێ سەرۆكاتیا پارتی دكەت و مللەتی و گرۆپێن دی یێن سیاسی خۆ دا دگەل، خۆ دیت بتنێ، ب نەچاری و ب نیازێن خۆڤە هاتە ناڤ پارتی و رەوتێ دوبەرەكیێ چێكر، و ب دویراتیا بارزانی ژ كوردستانێ و پارتی، برەهیمی دەرفەت بكارئینا؛ بۆ خۆسەپاندنێ و ململانێ ئێخستە د ناڤ سەركردایەتیا پارتی دا و هەول دا بالا دەست بیت و زالبوونا خۆ بسەپینیت، و ئەڤێ نیازێ و رەفتارێ وەكر دەرزەك بكەڤیتە ناڤ پارتی و دوبەرەكی لێ بكەڤیت و شەڕێ ناڤخۆ ل چیبوو و باندۆرا خۆ ل سەر پارتی و بزاڤا سیاسی و جڤاكێ كوردستانێ كر و هێلا و ل ئێكەمین هەلنگفتنا پارتی پشتی رێكەفتنا خیانەتكاریا جەزائیر، ل جهێ كو هەست ب بەرپرسیاریا خۆ یا نەتەوەیی بكەن و برینێن مللەتی دەرمان كەن، جارەكا دی وەكو رەوتێ دوبەرەكیێ ئێكەتیا نیشتیمانی دامەزراند و گەرین شەڕی و تۆلڤەكرنێ دەستپێكرنەڤە !.
وەسا پێ دچیت چاوا ناكۆكیێن ئیسلامێ ل گەل سەرهەلدانا وێ چێبوون و بەرفرەهبوون و بەردەوام بوون، ناكۆكیێن كوردایەتیێ ژی دەولەسەرێ رەوتێ دوبەرەكیێ هەر بمینن و ئالۆزتر لێ بهێن و كێشەیێن مەزنتر لێ بكەڤن، نەمازە ڤی ململانێ رەهەندێن خۆ یێن سیاسی و جڤاكی و هەرێمایەتی ژی چێكرینە!.
دبیت دوبەرەكی و ناكۆكی د ناڤ گەلەك مللەتێن دی ژی هەبن و قوربانیێن مەزن لێكەفتینە و هندەكان سەری خۆ ژی ل سەردانایە، لێ ئەوێن مایین ئەو بوونە یێن ب رەنگەكی ژ رەنگا دوبەرەكی ئێكلاكری د بەرژەوەندیا مللەتێن خۆ دا.
لێ پێ دچیت یا كوردان یا ب زەحمەتتر بیت، چونك تۆڤێ دوبەرەكیێ ژ كەڤندا هەیە، كورد ب خۆ ژی قەومێ دیكلنە، هەر ئێكی بۆ خۆیە و رەوتێ دوبەرەكیێ ژی وی ئاراستەی ئاڤ ددەت!، و دەولەتێن داگیركەر دەستتێوەردانێ دكەن كو ناكۆكی د بەردەوام بن و هەڤگرتن چێنەبیت، بەلكو مایتێكرنێن راستەوخۆ دكەن بۆ پتر ئالۆزكرنێ دا كو كورد هەر د ناڤخۆ دا د ناكۆكیان و شەڕن دا بن و هەر دلاواز بن!.
هیڤیەكا مەزن هەبوو پشتی ئاشبوونا نیشتیمانی و دامەزراندنا بەرەیا كوردستانێ و سەرهەلدانا گەلێ باشورێ كوردستانێ و دامەزراندنا هەرێما كوردستانێ، ئێدی قۆناغەكا نوی دەستپێ بكەت، و هەریم ببیتە قەوارەكێ مەدەنیێ دیموكراتیێ یاسایی و ژبۆ ئارامكرنا ناكۆكیان و متكرنا دەنگێ چەكی و ریگرتنێ ل پەنا برنێ بۆ توندوتیژیێ و شەڕێن ناڤخۆیی، سیستەمێ حوكمرانیا دیموكراسی و ملكەچبوون بۆ ئیرادەیا مللەتی ب رێكا هەلبژارتنێن گشتی كرە جهگیرا ململانا نەرەوا، ئەڤجا ژی رەوتێ دوبەرەكیێ حەزێن بالا دەستیێ و فراوانخوازیا نەرەوا پرانسیبێن دیموكراتیەتی تێكدان و ئەنجامێن هەلبژارتنان قەبیل نەكرن و سەربۆرا هەرێمێ و قەوارێ وێ ئێخستە د مەترسیێ دا و شەڕێ ناڤخۆیی هەلێخست ژبوونا خۆسەپاندنێ.
نهو ئەم ل سەدەمێ بیست و ئێكێ زاینێ ینە، چەرخێ زانست و تەكنولۆژیا و ژیرێ دەستكردین، خەلك و مللەت زانا و هشیاربوونە، بنەمایێن دیموكراتیەتێ و هەلبژارتنان بۆ هەمیان درۆهنن، لەوان ژ لایەنێن سیاسی كو خۆ ب پێشەنگێن مللەتی دزانن دهێتە خواستن ئەو پتر خۆ پیگیركەن ب بنەمایێن دیموكراتیەتێ و سیستەمێ هەلبژارتنان و رێزێ ل ئیرادەیا مللەتی بگرن و ئەنجامان قەبوول بكەن و كاری پێ بكەن.
هەرێما كوردستانی یا دۆرپێچكری ژ داگیركەران و دوژمنان و یا پڕ ژ ناكۆكیێن ناڤخۆیێن لایەنێن سیاسی، یا د تاقیكرنەكا میژوویا ب زەحمەت دا و دڤێت تێدا سەركەڤن دا هەرێما كوردستانی بهێتە پاراستن و گەشە بكەت.
ئەو گەرێن دانوستاندنان و بریارا بەردەوامبوونا گفتوگویان پێناڤی گەهشتن ب رێككفتنەكێ و پێكئینانا كابینا نوی یا حوكمەتا كوردستانێ و دانانا كارنامەكا گونجای بۆ سەرەدەریكرنێ گەل ئیراقێ پێدڤیەكا نەتەوەیی و مێژووییە، دڤێت كار پێ بهێتەكرن و یا بەرهەمدار بیت و تەڤایا مللەتی چاڤەرێ یە، ب هیڤینە ئێدی لایەنێن پەیوەندیدار پێگیریێن خۆ بەرانبەر پرانسیبێن دیموكراتی و سۆزێن خۆ بەرانبەر مللەتی بجهبینن و رێز ل ئیرادەیا مللەت بهێتەگرتن كو تاكە ژێدەرێ هێزێ و رەوایی یە.
دڤێت كوردستانێ ناڤەندا بریارا پێگیر هەبیت، دا كوردستان یا بهێزبیت و بهێتە پاراستن و گەشە بكەت، ئەڤە ژی ب دو رێكێن رەوا چێدبیت، ئەو ژی كۆمڤەبوونا مللەتی ل ژێر چەترا سەركردەیێ نەتەوەییێ كوردستانێ، كو خۆ د كەساتیا سەرۆك مسعود بارزنی دا دبینیتە ڤە، چونكی هەر وی بتنێ مەرجێن سەرۆكێ نەتەوەیی هەنە و دشێت ب وی ئەركی رابیت و سەربۆرەكا سەركەفتی د ڤی بیاڤی دا هەیە، یان ب هەلبژارتنێن گشتی دامەزراوێن دەستهەلاتێ بهێنە هەلبژارتن و رێز ل ئەنجامان بهێتەگرتن و كا پی بهێتەكرن.
پێدڤیە رەوتێ دوبەرەكیێ ب خۆدا بچیتە ڤە و مێژوویا خۆ بخوینیت و هەلسەنگینیت و رەخنەكەت و بیر ل ئایندەی و بەرژەوەندیا گشتی بكەت، و ل جهێ دوبەرەكیێ هەڤگرتنێ پیكبینن و برا گەورەیێ ب رێكێن هەلبژارتنان ل هەڤدو قەبوول بكەن و خزمەتا مللەتی بكەن و وەلاتی ژ ڤان قەیرانان رزگاركەن.
هیڤیدارین لەز بهێتەكرن و پینگاڤێن باش بهێنە هاڤێتن، باوەر بكەن مللەت بێزار و تەنگاڤە، و رەوش ب گشتی ئالۆزە.
