بەرپرسەكێ وەزارەتا بازرگانی: جوداهی د بەلاڤكرنا ئاهێن خوارنێ دا هەیە
هەولێر، قائید میرۆ:
بەرپرسەكێ وەزارەتا بازرگانیا هەرێمێ ئاشكرا كر، حوكمەتا فیدڕال جوداهیێ د ناڤبەرا وەلاتیان دكەت و هەر وەلاتیەكێ كارتا نیشتیمانی نەبیت ژ ئاهێن خوارنێ یێن مەهانە دهێتە بێ بەهركرن و بەروڤاژی بڕیار بۆ دەڤەرێن دی جودایە.
حسێن سەبری، نوونەرێ وەزارەتا بازرگانیا هەرێما كوردستانێ ل بەغدا بۆ رۆژناما ئەڤرۆ دیاركر، ب هزاران وەلاتی ل دەڤەرێن زمار و شنگالێ و مەخموور ژ ئاهێن خوارنێ یێن مەهانە هاتینە بێ بەهركرن، ژ ئەگەرێ نەبوونا كارتا نیشتیمانی و گۆت: «هەر وەلاتیەكێ كارتا نیشتیمانی نەبیت، نەشێت ناڤێ خۆ ل فۆرما ئاهێن خوارنێ یا ئەلكترۆنی تۆمار بكەت، ئەڤە ژی بوویە ئەگەرێ بێ بەهركرنا ب هزاران وەلاتیێن وان دەڤەران ژ وەرگرتنا ئاهێن خوارنێ».
حسێن سەبری گۆتژی: «حوكمەتا ئیراقێ ب تنێ بڕیار دایە ئەڤێن كارتا نیشتیمانی نەبیت و سەر ب پارێزگەها نەینەوا ڤە بن، ژ پشكا ئاهێن خوارنێ مفاداربن، ئەڤە ژی نەعەدالەتیە دهێتە كرن، دەرحەقی وەلاتیان دا و پێدڤیە جوداهی د ناڤبەرا وەلاتیان دا نەهێتە كرن، ئەم داخواز دكەین هەموو وەلاتی ژ ئەڤێ بڕیارێ مفادارببن و مینا پارێزگەها نەینەوا وەلاتیێن كارتا نیشیتمانی نەبیت و ئاهێن خوارنێ یێن وان سەر ب هەرێما كوردستانێ ڤە بن، ئەو ژی مفادارببن و بڕیار وانا ژی ڤەگریت».
