ژن ب ڕێژەیا پێدڤی د بازاڕێ کاری دا نینن
بێوار حەمدی:
چالاکڤانەکا ژنان د دیدارەکێ دا بۆ ڕوژنامەیا ئەڤرۆ دیار کر کو یەکسانی و دادپەروەری و ئازادی سێ پلەیێن جڤاکی یێن مرۆڤینە و ئەگەر ئێک ژ ئەڤان بۆ ژنێ نەهێتە جێبەجێکرن، دێ ژن بیتە قوربانی.
هاوژین زیبا، ئەو چالاکڤانەیە دیار کر کو ب شێوەیەکێ گشتی ژن کێمتر ژ زەلامان کار دکەن و ئەڤە ژی هێشتا ژبەر وێ چەندێ یە کو ژن بتنێ بەرپرسە ژ مالێ و خێزانا خۆ و گۆت؛ بێگۆمان ژمارەیەکا مەزن یا ژنان ژبەر وێ چەندێ کاردکەن داکو داهاتێ خێزانا خۆ زێدە بکەن، لێ ب ڕێژەیا پێدڤی ژن د بازاڕێ کاری دا نینن، ژبلی کەرتێ حکومی و خواندنێ، ژبەرکو ژن د ئەڤان کەرتان دا پتر دهێتە دیتن.
هاوژینێ د بەردەوامیا ئاخفتنێن خۆدا دیار کر کو چ جاران بۆ ژنێ نەبویە ڤێ پرسیارێ بکەت ئەرێ بۆچی هندەک زەلام نەشێن هندەک کاران بکەن وەکو (دروستکرنا خوارنێ، کارێن ناڤمالێ، خودانکرنا زاروکی و دلۆڤانیا دایکێ و گەلەک کارێن دیتر…، لێ د بەرامبەردا پتریا زەلامان ژنان ڕەخنە دکەن کو نەشێن کارێن ب زەحمەت بکەن، هەرچەندە ژن هەنە کارێن ب زەحمەت ژی دکەن، بتایبەت ژنا کورد ب کارێن خۆ یا جوانە و گۆت؛ بەلێ ئەو دیتن یا شاشە کو ژنێ ژ هەژی وان کارێن بزەحمەت ببینن، چونکو ژنێ بەرپرسیاریێن بزەحمەت تر هەنە.
هاوژین زیبا چالاکڤانا جڤاكى دیار کر ژى، ئەو ژنێن ئەڤرۆ ل باشور دژین گەلەک بێ ڕێزی ل هەمبەر دهێتە کرن لژێر پەیڤا نامووسێ، ب سەدان پەیج سفکاتیێ ب ژنێ دکەن و فلمان ژبۆ دروست دکەن و پتریا خودانێن ڤان کارەساتان بمخابنیڤە نەهاتینە سزادان و گۆت؛ ئەگەر بێ ڕێزی بەرامبەر ژنێ و کارێ وێ هاتەکرن، دڤێت لایەنێن پەیوەدیدار و دەستهەلاتا یاسایی ب دژواری ڕەفتارێ دگەل دا بکەن، ژبەرکو بابەت گرێدای کەرامەتا ژنێ یە.
هاوژینێ دیار کر ئهو چهنده ژى ديار كر، یەکسانی و دادپەروەری و ئازادی سێ پلەیێن جڤاکی یێن مرۆڤینە و ئەگەر ئێک ژ ئەڤان بۆ ژنێ نەهێتە جێبەجێکرن دێ ژن بیتە قوربانی و گۆت؛ ژبەرهندێ پێدڤیە هەموو بزاڤ بهێنە کرن کو ئەڤ بوارە بهێنە بهێز کرن داکو مافێ ژنێ نەهێتە خوارن.
