حەفتیێ سێ گرێبەستێن هەڤژینیا سەردەم دهێنە ئەنجامدان
ههولێر، قائید میرۆ:
شارهزایهكێ جڤاكی د دیدارەکێ دا بۆ ڕۆژنامەیا ئەڤرۆ دیار کر کو نها سۆشیال میدیایێ رۆلهكێ كاریگهر ههیه د پێكئینانا پرۆسەیا ههڤژینیێ دا و گۆت؛ ئاساییه ب رێیا تۆڕێن جڤاکی و پهیچێن تایبهت پرۆسا ههڤژیێ بهێته پێكئینان، ئهگهر مهرجێن قانوونی و شهرعی تێدا ههبن.
ئاریان بهرزنجی، شارهزایێ جڤاكی دیار كر کو د جیهانێ دا ل ههر وهلاتهكی بشێوازهكی پرۆسا ههڤژینیێ دهێته پێكئینان، کا چاوا تهكنولۆژیایێ رۆل ههبوویه د ههموو بیاڤێن ژیانا مرۆڤان دا د پرۆسا ههڤژینیێ دا ژی تهكنهلۆژیا سهردهم د نها دا كاریگهریا خۆ ههیه لسهر ئهڤێ پرسێ.
شارەزایێ جڤاکی گۆت؛ بدیتنا من پێكئینانا پرۆسا ههڤژینیێ ب رێیا سۆشیال میدیایێ كارهكێ ئاساییه، بهلێ ب مهرجهكی ئهو كهسێن ب رێیا سۆشیال میدیایێ دچنه د پرۆسا ههڤژینیێ دا كهسێن راستگۆ بن و لسهر بنهمایێن درست یێن ههڤژینیێ بچنه د ئهڤێ پرۆسێ دا.
ئاریان بەرزنجی د بەردەوامیا ئاخفتنێن خۆدا دیار کر کو ئهو پهیچ و ئهكاونتێن پرۆپاگندهیێن پرۆسا ههڤژینیێ دكهن و ناڤبژیێ دكهن بۆ گههاندنا دو كهسان ب مهرهما ههڤژینیێ، دڤێت نهێنیێن وان كهسان د پاراستی بن و گۆت؛ بتایبهتی پشتی ب ریێا ئهڤان پهیچان بڕیارا ههڤژینیێ دهێتهدان دڤێت د چارچوڤێ شهریعهت و داب و نهریتێن جڤاكی دهرنهكهڤیت و پێگیری ب هندهك داب و نهریتان بهێتهكرن.
بەرزنجی دا زانین ژی، بهرۆڤاژی ئهگهر نیهتا وان كهسان ههڤژینی نهبیت و ب تنێ سهردابرن بیت ئهڤه بێگومان كارهكێ خرابه و دێ زیانێ گههیننە بهرامبهری خۆ و گۆت؛ ئهز ب هویری نهچوویمه دناڤا ئهڤان پهیج و ئهكاونتێن پرۆپاگندهیا پێكئینانا ههڤژینیێ دكهن، بهلێ ئهگهر نیهتا وان یا پاقژ بیت كارهكێ باشه.
شارهزایێ جڤاكی دیار کر ژی، ئهگهر ههڤژینیهكێ مهرجێن قانوونی تێدا بن ب ههر رێیەكا بگههنه ئێكدوو كارهكێ ئاساییه و چو ئاریشه نینه، بهلێ كوڕهك و كچهك ب رێیا سۆشیال میدیایێ ئێكدو بنیاسن دڤێت دهمێ ههڤژینیێ پێك دئینن ههموو پیڤهرێن جڤاكی و شهرعی و قانوونی تێدا ههبن و گۆت؛ مینا ههڤژینیا ئاسایی كهس و كارێن وانژی پشكداری ههبیت، ئەڤجا ئهو یهك نیاسینه ب رێیا پهیچهكی بیت یان راستهوخۆ ب رێیا پلات فۆرمێن تۆڕێن جڤاکی بیت ئاریشه نینه.
ئاریان بهرزنجی گۆتژی؛ ل سالێن بۆری من پڕۆژهیهك بهرههڤ كربو ژ بۆ ئهنجامدانا ههڤژینیا سهردهم، رۆژ بۆ رۆژێ ههڤژینیا سهردهم یا بهربهلاڤ دبیت و ههر حهفتیێ دو ههتا سێ گرێبهستێن ههڤژینیا سهردهم دهێنه تۆماركرن، بهلێ ئهوژی دڤێت مهرجێن شهرعی و قانوونی تێدا ههبن، ل دهۆك و سلێمانی و ههولێرێ ئهف جورێ ههڤژینیێ دهێته ئهنجامدان.
ئاریان زێدەتر گۆت؛ ههڤژینیا سهردهم ب تنێ كچێن قهیره و ژنێن بێ ههڤژین ڤهدگریت، سێ مهرج تێدا ههنه یێ ئێكێ ژن زەلامی ژ مافێ خۆ یێ ڕۆژانە ئازا دکەت، ئازاکرنا مافێ مانێ كا زهلام دێ چهند مینیتە دهف، کێمکرنا بارگرانیێ داكو بارێ دارایی یێ زهلامی وهك ههڤژینیا ئاسایی گران نهبیت.
