یـێ شـەڕی بكەت دێ حنگ ڤێكەڤـن
ئيحسان ئـامێدی
رێسایەكا هەی دبیژیت هەر كریاتەكێ كارڤەدانا خۆ هەیە، هەرەكو پەندەك ژی دبێژیت تو چ بچینی دێ وێ هەلینی، باشیێ بكە دێ باشی هیتە شوینێ، و خرابیێ بكە دێ خرابی هێتە شوینێ!. لەو دبێژن یێ شەركەر بیت دێ یێ سەر شكەستی بیت و چ جاران یێ تەنا نابیت و دوماهیێ دێ سەرێ خۆ ل سەر دانیت.
ئەگەر ئەم ڤێ رێسایێ و ڤێ پەندێ د ژیوارێ كوردستانێ دا ببینین، دێ دیار بیت، خەباتێ رزگاریخوازا كوردستانێ كارڤەدانە ل سەر داگیركرنێ، و شۆرش و سەرهەلدان كارڤەدانن ل سەر ستەم و زوریێ، و دەرئەنجام زیانێن مەزن ب داگیركەر و ستەمكاران كەفتن و ئیرادا خەبات و بەرخۆدانێ هەر بەردەوام بوو، چەندین دەولەت و ئمبراتوریەت هاتن و سەرێ خۆ ل سەردانا و ب ری رەشی چوون و كوردستان ب هەژار و پەریشانیا خۆ سەرفراز ما و بەردەوامی دا خۆ.
دوژمن و داگیركەران ب شەری هاتینە كوردستانێ، ژ ناڤەراستا ئیرانێ و ژ ئاسیا یا ناڤەراست و ژ گزیرتەیا عەرەبی ب شەر و داگیركەریێ هاتینە و سەر ب ڤان وەلاتان دا گرتیە و و داگیركرینە و وێرانكرینە و كوشتینە و د ناڤخۆ دا بەهژاندینە و د كارڤەدانا وان كریاراندا بەرخۆدان هاتیەكرن و پاشڤەبرینە و شكەستن پی ئێخستیە و گەلەك زیان ڤێ گەهاندی نە، بەلێ مخابن لدەف سەركردەیێن شەرخواز د هەڤكێشەیێن سیاسی دا، مرۆڤی بەها نینە و سەرەدەری دگەل ئەنجامان دكەن، لەوان ئەوێن دماین وسەركەفتن ل سەر ئەردی ب دەستڤەئیناین ل خۆ نانێڕن كا چەند حنگ ڤێ كەفتینە و زیانێن وان چەندن و خۆ نابینن كو د بریندار و شەرمزارن!.
ب هزاران سالە كوردستان بەرخۆدانێ دكەت، و حنگان ل دوژمنان ددەت و خۆ دپارێزیت و دەستبەرداری مافێن خۆ نەبوویە و نابیت، ئەڤجا یا باشە بۆ داگیركەر و ستەمكاران بخۆدا بچنەڤە و سەرەدەیەكا مرۆڤانە بكەن.
هەر چاوا بیت كوردستان ب مللەتێ خۆڤە مایە و بەرگریێ دكەت و زیانان ل دوژمنان ددەت، و دوژمنان كو وژدان د سەرێ وان دا نینە و دل ب مرۆڤێن خۆ ڤە ژی نینە، ژمارەیا كوشتیێن وان ژ ژمارەیا قوربانیێن مللەتێن داگیركرین و تەپەسەركرین گەلەك پترە!.
گرنگە دەستهەلاتدار و بریاربدەست بزانن و هەست ب بەرپسیاریا خۆ بكەن، كو ئەركێ حوكمەتانە ئاسایشێ دابین كەن سەقامگیریێ جێگیركەت و دادیێ بجهبینیت و خزمەتێن گشتی پێشكێشكەت. دا خەلكی رازی كەت و ئارامیی دەستەبەركەت.
هەر حكومەتەكا نەشێت سەقامگیریێ بجهبینیت و مللەتی رازی كەت، وێ دگەهینیت كو نەشیایە ب ئەركێن حوكمرانیا ساخلەم رابیت.
رازیكرنا مللەتی ب هەمی پیكهاتێن وێ یێن ئەتنی و جڤاكی و سیاسی ڤە، ئەركەكێ بنەكیێ حوكمەتێ یە، ئەڤە ژی دبیت كو حوكمەت قوربانیێ نەدەت و ئازادیێ و ئاسایشێ بۆ خەلكی دابینكەت و دەرفەتێن كاری پەیداكەت و پێدڤیێن بنەكیێن ژیانێ بەردەستكەت و ژیانا سەرفراز بۆ هەمیان دابینكەت.
داگیركەرین كوردستانێ و هەمی ستەمكار د ئارامیێ و سەقامگیریێ دا نینن ژ بەركو سیاسەتێن داگیركرنێ قوربانیێن مادی و گیانی لێ دكەڤن.
كوردستانی دزانن كو وەلاتێ وان داگیركریە و مللەتێ وان دهێتە تەپەسەركرن، لەوان خەباتێ دكەن و بەرگریی دكەن و قوربانیان ددەن، بەلێ ئەو دەستهەلاتدارێن دەولەت بناڤێ نەتەوەیا خۆ ناسكری، پتر قوربانیان ددەن، چونكی ب عەقلیەتا تاكرەوی ب دكتاتوریەتی مللەتی دهاژون و خەلكی خۆ د چەوسینن و ئازادیێن وان سەركوت دكەن و دكەنە سوتەمەنیێ شەرێن خۆ یێن نەرەوا!.
داگیركەرێن كوردستانێ شەرێ ژناڤبرنێ و قركرنا كوردستانیان كرن، لێ ب سەردان هزرا قوربانی دان و ئابورێ خۆ ژی وێرانكر و سەرێ خۆ ژی ل سەردانان، ری رەش و فهێت بوون و كورد و كوردستان هەر مان.
ئەڤا ب ئەنجامێ ڤان سیاسەتێن شاش و نەرەوا و سەركوتكەر و كارەساتبار ب سەرێ ڤان مللەتان هاتین تێرا هندێ هەیە هەمی پێكڤە بێژن بەسە، مە شەر و كوشتن نەڤێت، ئێدی دا پیكڤە یان ژیكجودا ب ئاشتی و ئاسایش و ئارامی بژین.
