مەسرور بارزانی: پێدڤییە خەلكێ كوردستانێ، زێدەتر ژ هەر وەختەكی داكۆكیێ ل دەستكەفتێن نیشتمانی و نەتەوەیی بكەت و بپارێزیت
مەسرور بارزانی، سەرۆكێ حوكمەتا هەرێما كوردستانێ ب هەلكەفتا سالڤەگەرا 35 یا سەرهلدانا سالا 1991، پەیامەك بەلاڤكر و تێدا ڕاگەهاند» پیرۆزباهیێ ل هەموو كوردستانییان، ب تایبەتی پێشمەرگەیێن قەهرەمان و مالباتێن سەربلندێن شەهیدان دكەم».
گوت ژی» سەرهلدان ئێك ژ شكۆدارترین دەستكەفتێن گەلێ كوردستانێیە، كو بەرهەمێ ئێكگرتن و ئێكڕێزییا پێكهاتەیێن جۆراوجۆرێن كوردستانێ بوو. ل بن سیبەرا سەرهلدان و خەبات و قوربانیدانا خەلكێ كوردستانێ، ئەڤرۆ هەرێما كوردستانێ خودانا قەوارە و دەزگەهێن خوە یێن فەرمی و شەرعییە، كو پێدڤییە ب هەموو شێوەیەكی بپارێزین وزێدەتر پێشڤە ببەین».
سەرۆكێ حوكمەتا هەرێمێ دیاركر ژی» ب ڤێ هەلكەفتێ، دوپات دكەین كو ئێكگرتنا خەلكێ كوردستانێ، مەزنترین و ب هێزترین سەرمایا مەیە وەك چاوان ل بن سیبەرا ئێكگرتنا گەلێ كوردستانێ، سەرهلدانا ئادارا 1991 سەركەفت و گەهشتە ئەنجام و دەستكەفتێن ئەڤرۆ بەرهەمێن وێنە، د ڤی وەختیدا ژی، پێدڤییە خەلكێ كوردستانێ زێدەتر ژ هەر وەختەكی، داكۆكیێ ل دەستكەفتێن خوە یێن نیشتمانی و نەتەوەیی بكەت و بپارێزیت، ژ پێخەمەت پاشەڕۆژەكا باشتر و پێشكەفتیتر».
