ل دینارتە گیایێن سروشتی ژێدەرێ سەرەكیێ ئابووریێ وەلاتیانە
رەمەزان زەكەریا
دگەل سرۆشتێ رەنگین و هاتنا وەرزێ بوهارێ، دەڤەرا دینارتە دبیتە قیبلەیا وەلاتیان بۆ كۆمكرنا گژوگیایێن چیایی. ئەڤ سالە ژی وەك هەر سال، ل دەستپێكا هەیڤا ئادارێ ڤە، خەلكێ دەڤەرێ قەستا دەشت و نشێڤێن سەخت دكەن دا كو بەرهەمێن سرۆشتی یێن وەك كاری، كەنگر، ستورك، و چۆری) كۆم بكەن، یێن كو ل بازارێن كوردستانێ و ئیراقێ خواستیەكا بێ وێنە ل سەر هەیە.
سەلیم چەتو، وەلاتیەكێ دەڤەرێیە رۆژانە دچیتە چیا بۆ كۆمكرنا گیای بۆ ئەڤرۆ گۆت: ئەم رۆژانە دچینە چیا بۆ ب دەستڤەئینانا ڤان گژوگیایان، بازارێ وان گەلەك یێ خۆشە و خواستیەكا مەزن ل سەر هەیە، هەر چەندە بهایێ وان جێگیر نینە و رۆژانە دهێتە گۆهۆرین، بەلێ ماندووبوونا مە یا ب مفایە و هەر كەس نەشێت ڤان گژوگیایان ب دەست خۆ بینیت، چونكی ل جهێن سەخت و ئاسێ دهێن.
ئەندازیار مەهدی تەها، بەرپرسێ هۆبا چاندنا دینارتە بۆ ئەڤرۆ گۆت: بەرهەمێن دینارتە ب رێیا كاسبێن دەڤەرێ دگەهنە پارێزگەهێن دی یێن هەرێمێ و ئیراقێ ژی، رۆژانە هژمارەكا زۆرا وەلاتیان سەرەدانا چیا دكەن بۆ كۆمكرنا گیایێن بهاری و خواستەكا زۆر ل سەر هەیە هەموو جۆرێن گیایی هەیە، كریارەكا بەردەوام هەیە و بهایێ وان دگەل جۆرێن وی گۆهۆرین ب سەردا دهێت.
تاهر سالح، ژینگەپارێزێ دەڤەرێ بۆ ئەڤرۆ گۆت: مخابن هندەك كەس هەست ب زیانێن ژینگەهی ناكەن و گژوگیایی ب بنكڤە دئیننە دەرڤە، ئەڤە دبیتە ئەگەرێ ژناڤچوونا ژینگەهێ، داخوازا مە ئەوە وەلاتی ب تنێ پشكا سەری یا گیایی ببڕن و بنكێ وی نەهەژینن، دا كو سالێن بهێت ژی بمینیت و مەترسی ل سەر دروست نەبیت.
