وەسیەتا ڕویڤی
شیان مەهدی کانیسارکی
ل دارستانێ، هندەک چیڕۆک یێن هەین، چ دار نەشێن ڤەگێڕن، چ کەهنی نەشێن ژبەر بکەن، لێ دگەل گوهدانا وان تژی سەر بەلگێن داران ڕۆندک دبن، کەسێ ژی شیان نینن زوی ب زوی خوە لێ بکەت خودان، لێ ئەز دێ بۆ هەوە باس کەم، ناڤێ من شاگردە ڕویڤییەکێ پیرم. هێژ نزنزا ڕهێن دارێن ڤێ دارستانێ یا د گوهێن مندا دەنگڤەددەت دەمێ سەرێ خوە ب ئەردی ڤەدنم. ب شەڤێ ژی بێهنا ڕۆژێن بەرێ دفنێن من تژی بیرهاتن دکەت. ئەز ئەڤرۆ یێ هاتیمە ڤێرێ ڤە داکو بۆ هەوە چیڕۆکا ڤێ دارستانێ بێژم؛ چونکی گەلەک قوربانی و خوینا گەرم یا هاتییە ڕێهتن، ئەڤە ئێک ژ وان دارستانایە کو ژمێژە ژیانێ پشتا خوە داییێ و ژێ بارکری. د وان ڕۆژین هێژ ئەز ل سەر خوە کەرب و کینێ چ جهـ ل ڤێرێ نەبوون، چ جیاوازی د ناڤبەرا من و دارەکا گویزێ و کەزانێدا نەبوو، مە دەستێن خوە ڤەدکرن و مینا چەقێن داران د لەرزاندن دەمێ بایەکێ بهێز هاتبا و تێر ستران دگۆتن دەمێ بارانێ لێدکر، د بەر تاڤە هەیڤێڕا مە چیڕۆک و سەرهاتیێن ب کەنی دگۆتن. ئاسمانێ هینگێ ژ یێ نوکە یێ مەزنتر بوو، وی دەمی جهێ ستێران ل ئاسمانی نەدکر و مە ستێر د هژمارتن هەتا ئەم د خەو دچووین. من هندەک هەڤال هەبوون؛ «هەوراز» کەوێ هەڤالێ من بوو، کارێ وی ب تنێ ئاواز و ستران بوون ب تایبەت سحاریان ئەم ل دەنگێ وی ژ خەو هشیاردبووین. «جانۆ» کێڤریشکەکا بێ دەیک و باب بوو، گەلەکا نەرم و حەلیم بوو، چ جاران من پەیڤا «نەخێر» ژ وی گوهلێ نەبوو، گەلەکێ دل مەزن و گوهدار و بۆ هەڤالێ خوە مری بوو. «هێناس» ژی بۆمەکا دانعەمر بوو، مە ناڤێ وێ کربوو «داپیرا بۆم»؛ چونکی ب شەڤێ هەتا نڤستنێ بۆ مە چیڤانۆکێن ملەتێن دەستپێکی دگۆتن.
و ئەز یێ خوەشترین بیرهاتنێن خوە د نڤیسم، ڕۆژەک هات کو وەکی ڕۆژێن بۆری نەبوو! مە هند دیت «شەڕۆ» دیاربوو، گورگەکێ چاڤ هسایی و ئەزمانەکێ وەکی چەقۆکان خوەش بۆ پەیڤان، هەر زوی گۆت: «دارستانا هەوە یا بێهن تەنگە، چ سیستەم تێدا نینن.. ئەز دێ باشترین سیستەم و یاسا بۆ ڤێ دارستانێ دەینم». د وان گاڤانڕا سیبەرا کەلەخێ زەخمێ»دەلۆ»ێ دەڤ ب گلیز ل پشت شەڕۆیی دیاربوو، هرچەکا مەژی هشکبوو، هزرا وی ب تنێ ل سەر زکێ وی بوو. هەردەم دگۆت»بۆ من نە ئاخڤن، پەیڤ زکێ من تێرناکەن». مارەکێ درێژێ ڕەنگ ژەنگی یێ ب چاڤەکی دگەل بوو دگۆتنێ «بازۆ» هەردەم دگەل کەسێ ب هێز بوو، ل دویف بەرژەوەندییا خوە دگەڕها.
ڤان کەسان… پشتی دارستان کەفتیە دەستێ وان، ئێکەم کار کری، گۆت» ژمارا داران گەلەک یا زێدەیە، بەر پێ یێن مە یێن تەنگ کرین، دڤێت هندەکان ببڕین، دا بشێین ب دلێ خوە بهێین و بچین» و دگۆتە گیانەوەرێن دی:» ئەڤ دارێن ئەم د بڕین ئەم هەمی دێ مفای ژێ بینین، دێ ل زڤستانێ تێر لەشێ خوە لبەر گەرمکەین». مە چوار کەهنی دناڤ دارستانێدا هەبوون، سێ ژوان وان بۆ خوە ڕاکرن و کەسێ ماف نەبوو ئاڤێ ژێ ڤەخۆت» ب تنێ هندەک گیانەوەر نەبن، ئەوان د هەلبژارتن»، کەهنیەک مابوو ژنوی ئەو بۆ گیانەوەرێن داستانێ هەمیان بوو. ئێک ژ یاسایێن وان یێن سەیر دانابوو: «چێنابیت چ بالندە سپێدەهیان زوی بخوینن و چ ئاوازان بێژن، چونکی ئەو وی دەمی د خەون و دێ بیتە ئەگەرێ هشیاربوونا وان».
ئەز گەلەکێ ژ هەڤالێ خوە «هەورازی» خەریبوویم ب تایبەت ژ قەبقەبا وی، هەردەم من دگۆتێ مایتێکرنێ د کەسێ نەکە دێ بییە بەلا سەرێ خوە، گوهداریا من نەدکر، هەردەم ب دژی یاسایێن دارستانێ سپێدێ زوی ڕابوو و دبوو قەبقەبا وی ل وان دۆل و نهالان، یێ چاڤنەترسبوو. شەڤەکێ گۆتە من: «هەڤالێ من، چ جاران من نەهێلە ب تنێ، ژ ڤێ داستانێ نەچە؛ چونکی ب تنێ تو یێ هەی، تو باربکەی دێ هەر وێ رۆژێ گورگ من خۆت». من ژی دلەک ل دلێ وی دا و گۆتێ: « پشتڕاستبە، هەڤالێ من یێ دەنگ خوەش، ما دێ چەوا پشتا خوە دەمە تە، ما ئەز مرۆڤم هەی مالا تە». و من ب دەستێ خوە پەڕێن وی ڤەمالین و دەستێ خوە ب سەرێ وی دا ئیناخوار، هەتا بێهنا وی هاتی، ڕۆندکەک ژ چاڤێ وی کەفت سەر دەستێ من، پاشی د خوە چوو… دەمێ سپێدێ ئەز هشیاربوویم من چ تشت نەدیتن ل دەف خوە ژ بلی پەڕێن وی! و هەتا نوکە ژی یێ بەرزەیە. هێدی هێدی هەمی گیانەوەران ژ دارستانێ بارکر و ب شەڤێ هەمیان ب دزیڤە مالا خوە ب بجهـ دهێلا، هەتا ئەز ب تنێ مایم، ئەو ژی من ئەڤ چیڕۆکە د نڤیسی. ل دویماهیێ ژی گەلی هەڤالان ئەڤێن هوین ڤێ چیڕۆکێ دخوینن، دارستانا مە گەلەکا خوەشبوو، بەهشتا سەر دنیایێ بوو، لێ دارێ ستەمێ گەهشتێ و نەما، نەما پشتی کەسێن باش بێدەنگ بووین. ئەگەر چیڕۆکا دارستانا مە بۆ هەوەژی نەبیتە وانە، هوین ژی ژ دارستانا خوە ب ترسن!
