پێدڤیا پێكئینانا حوكمەتەكا ب هێز و هەڤسەنگ
ئاشتی سالح
پشتی ب دووماهی هاتنا پڕۆسەیا هەلبژارتنا سەرۆك كۆماری ئیراقێ، هەرێما كوردستانێ كەفتیە د بەر وەرچەرخانەكا سیاسی یا گرنگ دا. د ڤێ قووناغێ دا، ئەركێ هەرە ل پێش و فەر پێكئینانا كابینەیا نوو یا حوكمەتا هەرێما كوردستانێ، ب شێوەیەكێ كو بشێت بەرسڤا هەمی وان ئالنگاریێن ل پێشیا مە هەین بدەت. پێدڤیە ئەڤ كابینە ل سەر بنەمایێ شارەزایی، پرۆفیشناڵی و ب هێزبوونێ بهێتە ئاڤاكرن، دا كو بشێت ل ئاستێ چاڤەڕێكرنا وەلاتیان بیت.
ئێك ژ خالێن هەرە سەرەكی و ستراتیژی یێن كو پێدڤیە حكومەتا نوو كارێ ل سەر بكەت، رێكخستنا پەیوەندیێن هەرێمێ و بەغدایە. ل ڤێرێ، ئارمانج ب تنێ هەبوونا پەیوەندیان نینە، بەلكو ئاڤاكرنا پەیوەندیێن بهێزە ل سەر بنەمایێ دەستوورێ ئیراقێ. پێدڤیە مافێن دەستووری یێن گەلێ كورد ببنە بنەمایێ هەر رێككەفتنەكێ. دۆسەیێن هەلاویستی، ژ پشكا بودجەی و مووچەی بگرە هەتا مادا ١٤٠ و كێشەیێن نەفت و غازێ، دڤێت ب رێیێن قانوونی و د چارچۆڤەیێ دەستووری دا بهێنە ئێكلاكرن. بێ چارەكرنا ڤان كێشەیان، سەقامگیریا ئابووری یا هەرێمێ دێ هەر یا ل بەر مەترسیێ بیت.
لایەنێ دی یێ گرنگ، باشتركرنا رەوشا ژین و ژیارا خەلكی یە. وەلاتیێن مە پتر ژ هەر دەمەكێ پێدڤی ب خزمەتگۆزاریێن باش، هەلیێن كار و ئارامییا دارایی نە. حكومەتەكا پرۆفیشناڵ دشێت ب رێكا پلانێن زانستی و ریفۆرمێن راستەقینە، ژێرخانا ئابووری ببووژینیت و رێگریێ ل قەیرانان بكەت. دەما كو كێشەیێن دگەل بەغدا دهێنە چارەكرن، داهاتێ هەرێمێ جێگیر دبیت و ئەڤ چەندە ب شێوەیەكێ راستەوخۆ كاریگەریێ ل سەر بازار و بژێویا خەلكی دكەت.
د ئەنجام دا، پێكئینانا حكومەتێ نە ب تنێ دابەشكرنا پۆستانە، بەلكو وەرگرتنا بەرپرسیاریەتێ یە بەرامبەر ب پاشەرۆژا وەلاتیان. پێدڤیە هەمی لایەنێن سیاسی ب روحیەتەكا نیشتیمانی كار بكەن دا كو كابینەیەكا یەكگرتی و خودان بریار بهێتە سەر كار، كو بشێت ل بەغدا ب زمانەكێ بهێز بەرەڤانیێ ژ مافێن كوردان بكەت و ل ناڤخۆ ژی ب خزمەتەكا بێ جوداهی، ژیانا خەلكێ هەرێما كوردستانێ بەرەڤ قووناغەكا گەشتر و ئارامتر ببەت. ب ڤێ هەنگاڤێ، ئەم دشێین هەرێمێ ژ ڤان قەیرانێن نوكە دەرباز بكەین و بەرەڤ ئاڤەدانی و سەقامگیریێ گاڤان بهاڤێژین.
