ژ بەر درۆنێن میلیشیایان، رەنگە هندەك وەلات ل جڤاتا ئاسایشێ سكالایێ ل دژی ئیراقێ تۆمار بكەن
ئەندامەكێ لژنەیا پەیوەندییێن دەرڤە ل جڤاتا نوونەرێن ئیراقێ راگەهاند كو ژ بەر وان هێرشێن گرووپێن چەكدارێن ئیراقێ كرینە سەر وەلاتان، ل چەندین وەلاتان بالیۆزێ ئیراقێ هاتییە گازیكرن و یاداشتێن نەڕازیبوونێ پێشكێشی وان هاتینە كرن، ژ بەر هندێ ئەگەر هەیە وەلاتێن جیران ل جڤاتا ئاسایشێ سكالایێ ل دژی ئیراقێ تۆمار بكەن.
سامی ئۆشانا، ئەندامێ لژنەیا پەیوەندییێن دەرڤە ل جڤاتا نوونەرێن ئیراقێ راگەهاند: «هێرشێن گرووپێن چەكدار ژ ناڤ ئیراقێ بۆ سەر وەلاتێن جیران مەترسیدارن، چونكی ئەو دەولەتە حوكمەتا ئیراقێ ب بەرپرسیار دزانن و ترس هەیە ئەڤ وەلاتە سكالایێ ل دژی ئیراقێ ل جڤاتا ئاسایشێ تۆمار بكەن.»
ئەو چەندە ژی دیار كر كو هەتا نوكە وەزارەتا دەرڤە یا ئەمریكا، سعودیە و چەند وەلاتێن دی بالیۆزێن ئیراقێ گازی كرینە و ب فەرمی نەڕازیبوونا خۆ دژی هێرشێن گرووپێن چەكدارێن ئیراقێ دەربڕییە.
گۆت ژی: «ب مخابنی ڤە ژ ناڤ ئیراقێ گرووپێن چەكدارێن ژ یاسایێ دەركەفتی هێرش كرینە سەر وەلاتێن جیران، ب تایبەتی كوێت، سعودیە و سووریێ. زێدەباری ڤێ چەندێ هێرش كرینە سەر تیمێن دیپلۆماسی ل ئیراقێ، ئەڤە ژی بۆ ئیراقێ مەترسیدارە، چونكی ئەو دەولەتە حوكمەتا ئیراقێ ب بەرپرسیار دزانن. ئەو نابێژن گرووپێن ژ یاسایێ دەركەفتی، بەلكو دبێژن ئەڤ گرووپە ل پال دەزگەهێن ئەمنی چەوا دشێن هێرشی سەر وەلاتان بكەن؟»
ناڤبری دوپاتی ل سەر وێ چەندێ ژی كر كو نوكە ئیراق د ترسێ دایە كو ئەو وەلاتە ل جڤاتا ئاسایشێ سكالایێ تۆمار بكەن و كار بگەهیتە پەنابرنێ بۆ دادگەهێن نێڤدەولەتی، ئەڤ چەندە ژی دێ ئیراقێ رووبڕووی سزایێن جۆراوجۆر كەت.
ل حەفتییا بۆری وەلاتێ سعودیێ یاداشتەكا نەرازیبوونێ رادەستی بالیۆزا ئیراقێ كر، وەزارەتا دەرڤە یا سعودیێ راگەهاند كو وان «سەفیە تالب ئەلسوهەیل» بالیۆزا كۆمارا ئیراقێ ل ریازێ گازی كریە. ئەڤ پێنگاڤە پشتی هندێ دهێت كو هێرش و گەفێن ئاشكرا ب رێیا درۆنان ژ ئاخا ئیراقێ بۆ سەر سعودیێ و وەلاتێن كەنداڤی بەردەوام بووینە.
د. سعود ئەلساتی، بریكارێ وەزارەتا دەرڤە یا سعودی بۆ كاروبارێن سیاسی، د دەمێ رادەستكرنا یاداشتا نەرازیبوونێ دا، ب توندی ئەڤ هێرشە پرۆتەستۆ كرن و دووپاتی ل سەر وێ چەندێ كر كو پێدڤییە ئیراق ب بەرپرسیارانە سەرەدەریێ ل گەل ڤان گەفان بكەت. سعودیێ هەروەسا دووپات كر كو ئەو ب چو رەنگەكی پنپێكرنا سەروەرییا وەلاتان و تێكدانا ئاسایشا دەڤەرێ قەبوول ناكەن و دێ هەموو پێرابوونێن پێدڤی بۆ پاراستنا ئاخ و ئاسایشا خۆ گرنە بەر.
ژ ئالییەكێ دی ڤە وەلاتێ بەحرەینێ ژی هەمان پێنگاڤ هاڤێتبوو و «ئەحمەد ئیسماعیل» كاربڕێڤەبەرێ بالیۆزخانەیا ئیراقێ ل مەنامەیا پایتەختا بەحرەینێ گازی كر .
ب هەمان شێوە وەزارەتا دەرڤە یا ئیماراتێ ژی ، كاربڕێڤەبەرێ بالیۆزخانەیا ئیراقێ ل وەلاتی خۆ گازی كر و یاداشتەكا توند یا نەرازیبوونێ دایێ، ژبەر بەردەوامییا وان هێرشێن «تیرۆریستی» یێن كو ژ ئاخا ئیراقێ ڤە ژ ئالیێ گرووپ و میلیشیایێن سەر ب ئیرانێ ڤە دهێنە كرن.
ئیمارات دبێژیت كو ئەڤ هێرشە سەرەڕای هەبوونا ئاگربەستێ بەردەوامن و بووینە ئەگەرێ بنپێكرنا سەروەرییا وەلاتێن كەنداڤێ و یاسایێن نێڤدەولەتی. هەروەسا هۆشداری دا كو ئەڤ بزاڤە ئاسایشا دەڤەرێ دكەنە د مەترسیێ دا و دێ كاریگەرییەكا خراب ل سەر پەیوەندیێن ئیراقێ و وەلاتێن كەنداڤێ كەن.
وەزارەتا دەرڤە یا بەحرەینێ ژی یاداشتەكا نەرازیبوونێ یا توند رادەستی كاربڕێڤەبەرێ بالیۆزخانەیا ئیراقێ كر كو تێدا هاتییە: «بەردەوامییا هێرشێن درۆنان ژ ئاخا ئیراقێ بۆ سەر بەحرەینێ و وەلاتێن جڤاتا هاریكارییا كەنداڤی ب توندی پرۆتەستۆ دكەین.»
بەحرەینێ داخواز ژ بەغدایێ كر كو ب زووترین دەم و ب شێوەیەكێ جدی رێگریێ ل ڤان هێرشان بكەت كو ئارامییا دەڤەرێ دئێخنە د مەترسیێ دا.
ئەڤ ئالۆزییە د دەمەكێ دانە كو ئیراق بوویە مەیدانەكا سەرەكی یا ململانێیێن د ناڤبەرا ئەمریكا، ئیسرائیل و ئیرانێ دا. سەرەرای راگەهاندنا ئاگرەبەستەكا دەمكی د ناڤبەرا هێزێن ئەمریكی و گرووپێن چەكدار دا، لێ دیارە هێرشێن درۆنی بۆ سەر وەلاتێن جیران نەهاتینە راوستاندن.
هێژای ئاماژێ یە كو مەها دەربازبووی، هەرئێك ژ وەلاتێن بەحرەین، ئوردن، كوێت، قەتەر، سعودیە و ئیمارات د بەیاننامەیەكا هەڤپشك دا داخوازی ژ حوكمەتا ئیراقێ كربوو كو پێنگاڤێن كریاری بگریتە بەر بۆ رێگریگرتن ل وان گرووپێن چەكدار یێن كو ئاخا ئیراقێ بۆ هێرشكرنێ سەر وەلاتێن دی بكار دئینن.
