فەستیڤالەكا بەرهەمێن گیایێ بهارێ ل دێرەلۆكێ و شێلادزێ دێ هێتە ڤەكرن
ئامێدیێ ، مەحمود نهێلی
هەژمارەكا وان كەسان ئەڤێن رۆژانە كارێ چنین و ئینان و فرۆتنا گیایێ بهارێ یێ خوارنێ دكەن داخواز كر فەستیڤالەكا تایبەت ب نیشاندان و فرۆتنا گیایێ بهارێ ل دەڤەرا ئامێدێ بهێتە ڤەكرن و تەكەزی ل سەر ڤەكرنا ل ناڤبەرا دێرەلۆك و شێلادزێ دكر.
خالس زێباری ئێك ژ وان وەلاتیانە یێن بەردەوام دچیتە چیایی بۆ ئینانا گل و گیایێ بهاری و ل بازارێن دەڤەرێ دفرۆشیت گۆت: راستە چ جار ئەڤ گیایە نەمایە دەستێ مە دا و بەردەوام ئەم دفرۆشین، لێ هەكە سالێ جارەكی فەستیڤالەكا گیایێن بهاری ژی بهێتە سازكرن دێ پتر بەرێ خەلكی كەڤیتە كرینا وی گیایی.
ناڤهاتی ئاشكرا ژی كر، فەستیڤالەكا بەرهەمێن گیایێ بهارێ دێ بیتە ڤەژاندنەك ل دڤەران وان ژی، چونكە ل هەموو دەڤەران جورێن فەستیڤالان هەنە ب تنێ ل دێرەلۆكێ و شێلادزێ ئەڤ جۆرە فەستیڤالە نەبووینە كو نیڤا خەلكێ دەڤەرا ئامێدیێ ل ڤێ دەڤەرێ خرڤەبووینە.
خاتون، رەڤەند حاجی خودانا لێنانگەها خاتینا ل دێرەلۆكێ بۆ رۆژناما ئەڤرۆ دیار كر، داخازیاكا زۆر ل سەر خوانێن كوردی هەیە بتایبەتی ژی گرارێن بەر گیایی و هەروەسا ترشكێن ب كاری و كوتل دەو و هند جورێن دیتر یێن خوارنێ كوردی و گۆت: ڤەكرنا فەستیڤالەكا گیایێن بهارێ كو ئەم تێدا خوارنێن كوردی نمایش بكەین دێ كارەكی باش بیت ب تایبەتی ژی گرارێن بەر گیایێ بهاری كو دێ ببیتە ئەگەرێ سەرەنج راكیشانا خەلكی بۆ تام كرنا ڤان خورانا و پتر كرینا گیایێن بهاری.
نایف چەلكی رێڤەبەرێ رەوشەنبیری و هونەری ل ئامێدیێ دیار كر، داخوازیا وان كەسان یا د جهێ خوە دایە و گۆت: ڤەكرنا ڤان رەنگە فەستیڤالا كارەكێ جوان و باش و گرنگە ژ بەر كو گیایێ ڤێ دەڤەرێ تایبەتمەندیا خوە هەیە و فرۆتن و نیشاندانا ڤی گیایی كارەكی گرنگە.
ناڤهاتی تەكەز ژی كر ، ئەو دێ بزاڤێن رژد كەن بۆ ڤێ مەرەمێ هەر چەندە دووماهیا وەرزێ بهارێ یە لێ هێشتا هند جورێن گیایی مانە و وەرزێ وانە و بهێنە نیشاندان دێ كارەكێ جوان و ب مفا بیت.
