دەرگەهێ مە بۆ هەموو ئالیێن سیاسی یێ ڤەكرییە بۆ چارەسەركرنا كێشەیێن هەرێمێ
پەیڤدارێ پارتی دیموكراتی كوردستان رادگەهینیت، پارتی دێ هەموو بزاڤان كەت ژ بۆ دوماهیئینان ب قەیرانا سیاسی ل هەرێما كوردستانێ د پرسێن پێكئینانا كابینەیا حوكمەتێ و دەستەیا سەرۆكاتییا پەرلەمانێ دا، د هەمان دەم دا گەشبینییا خۆ بۆ پێشڤەچوونا پەیوەندیێن هەولێرێ و بەغدایێ پشتی سەرەدانا دووماهیێ یا سەرۆكێ حوكمەتا هەرێما كوردستانێ نیشان دا.
مەحمود محەمەد، پەیڤدارێ پارتی دیموكراتی كوردستان، د كۆنگرەیەكێ رۆژنامەڤانی دا راگەهاند: «دەستپێخشەرییا سەرۆك بارزانی گەلەك یا رۆهنە، یا كو تێدا داخوازا نێزیكبوونا ئالییان و چارەسەركرنا ئاریشەیان دكەت».
ناڤبری ئاماژە ب وێ چەندێ ژی كر، شاندێ پارتی سەرەدانا هەموو ئالیێن سیاسی كریە و نها ژی دەرگەهێ مە بۆ هەموو ئالییان ڤەكرییە. دوپاتی ل وێ چەندێ ژی كر، كو پارتی دێ بەردەوام بیت ل سەر بزاڤێن خۆ ژ بۆ دەربازبوونێ ژ ڤێ قەیرانا سیاسی.
پەیڤدارێ پارتی رۆهنكر ژی: «ئارمانجا سەرەكی یا مە شكاندنا وێ سارییا كو دروست بووی، ژ بۆ وێ چەندێ بشێین دووماهیێ پێ بینین د پرسا پێكئینانا كابینەیا حوكمەتێ و دەستەیا سەرۆكاتییا پەرلەمانێ. ئەم هەموو بزاڤێن خۆ بۆ چارەسەركرنا ئاریشەیان دئێخینە كار».
ل سەر ئاستێ پەیوەندیێن د ناڤبەرا ئالیێن كوردستانێ، مەحمود محەمەد پشتەڤانییا پارتی بۆ هەر دەستپێشخەرییەكێ دەربری یا كو خزمەتا ئێكگرتنێ بكەت و گۆت: «ئەم پشتەڤانییا دەستپێشخەرییا ئێكگرتوویا ئیسلامی دكەین و ئەم پشتەڤانێن هەموو وان ئالیێن سیاسی بووین یێن بزاڤێن خۆ بۆ شكاندنا ڤێ ساریێ ئێخستینە د كار».
سەبارەت ب پەیوەندیێن دوو قۆلی یێن د ناڤبەرا پارتی و ئێكەتێ دا، پەیڤدارێ پارتی ئاشكرا كر، كو د دەمێ بۆری دا كۆمەكا كۆمبوونان ب هەڤڕا كرینە و ل سەر چەند پرسێن دیاركری ژی گەهشتینە تێكگەهشتنەكا هەڤپشك.
د تەوەرێ تایبەت ب پەیوەندیێن هەرێما كوردستانێ و حوكمەتا فیدرالی دا، پەیڤدارێ پارتی گەشبینییا خۆ نیشان دا و راگەهاند: «ب پتشڕاستی ڤە، پشتی سەرەدانا سەرۆكێ حوكمەتا هەرێما كوردستانێ بۆ بەغدایێ، پەیوەندیێن د ناڤبەرا هەردوو حوكمەتان بەر ب قۆناغەكا باشتر دچن».
پەیڤدارێ پارتی دیموكراتی كوردستان دوپاتی ل بەرپرسیارییا بەغدا كر و گۆت: «دڤێت حوكمەتا فیدرالی بهێتە سەر هێلێ ژ بۆ چارەسەركرنا ئاریشەیان و سۆز ژی بۆ ڤێ چەندێ دایە».
