هێزێن سیاسی ل هەرێما كوردستانێ پشتەڤانیێ ل دەستپێشخەرییا سەرۆك بارزانی دكەن
د وی دەمی دا كو هەرێما كوردستانێ ب قۆناغەكا هەستیار دا دەرباز دبیت، سەرۆك بارزانی دەستپێشخەرییەكا ئێكڕیزیێ وپاراستنا بەرژەوەندیێن بلندێن گەلێ كوردستانێ پێشكێش كر، و تێدا داخواز ژ هەموو ئالیێن سیاسی كر كو دەست ژ ململانەیێن بێ ئەنجام و بەرژەوەندیێن بەرتەنگ بەردەن و ب هەستەكێ نشتیمانپەروەرانە رووبڕووی قەیرانێن سیاسی ببن. ئالیێن سیاسی ژی پشتەڤانییا وێ دەستپێشخەریێ دكەن و هیڤیداران چاڤەڕێی كاراكرنا پەرلەمانی و دەربازكرنا گرفتێن سیاسی نە.
سەرۆك بارزانی، د پەیامەكا دیرۆكی دا ب هەلكەفتا جەژنا پیرۆزا قوربانێ كو ئاراستەی موسلمانێن كوردستانێ، ئیراقێ و جیهانێ كربوو، پەیامەكا گرنگ ژی دایە ئالیێن سیاسیێن كوردستانێ و تێدا گۆتبوو: «پەیاما من بۆ ئالی و هێزێن سیاسی یێن كوردستانێ ئەوە كو هەموو ئالییەك بیر ل بەرژەوەندیێن خەلكێ كوردستانێ بكەن و بەرژەوەندیێن بلندێن گەلێ مە بێخنە سەر هەموو ئارمانج و بەرژەوەندیێن تەنگ، لەوڕا داخواز دكەم پشتی جەژنا پیرۆزا قوربانێ، ئالیێن سیاسی یێن هەرێما كوردستانێ ب دلسۆزی و هەستەكێ نشتیمانپەروەرانە پێكڤە كۆم ببن و ڤێ قەیرانا سیاسی چارەسەر بكەن و دووماهیێ ب ڤی ڕەوشا نەخۆش بینن».
ئەڤ پەیامە ب بلەز بوو جهێ كارڤەدانا ئالیان و وەكو «دەرگەهەك» بۆ دەستپێكرنا دانوستاندنێن پێكئینانا كابینەیا دەهێ یا حوكمەتا هەرێمێ دهێتە دیتن.
بەختیار كەریم، ئەندامێ مەكتەبا سیاسی یا پارتا سۆسیالیستا دیموكراتا كوردستان گوت: «دەستپێشخەری بۆ كۆمبوونا هێز و ئالیێن سیاسی گرنگە و دڤێت هەموو ئالی ب بەرپرسیارەتییەكا دیرۆكی ڤە بچنە بن بارێ دەربازكرنا قەیرانێن سیاسی و دووماهیئینان ب قەیراناسیاسی».
ناڤبری زێدەتر گۆت: «ب تایبەت دووماهیئینان ب پاشكەفتنا پێكئینانا حوكمەتێ و كاراكرنا پەرلەمانی».
مونا قەهوەچی، جێگرا سەرۆكێ پارتا چاكسازی یا توركمانی، دەربارەی دەستپێشخەرییا سەرۆك بارزانی بۆ گۆت: «پەیاما سەرۆك بارزانی بۆ حزب و ئالیێن سیاسی پەیامەكا گرنگە و دڤێت ب جددی لێ بنێڕن و هەموو ئالی ب ئەرێنی ل وێ پەیامێ بنێڕن، چنكو ئەڤرۆ ئاشتی، پێكڤەژیان، كۆمبوونا هەڤپشك و گەهشتن ب رێككەفتنێ و كاراكرنا پەرلەمانی كارێن باشترن، لەوڕا گەلەك گرنگە خەمساری نەهێتە كرن و هەموو ئالی پێكڤە كۆم ببن و وی رەوشی دەرباز بكەن».
د هەمان دەم دا، دلشاد رەشید ، ئەندامێ بەرێ یێ جڤاتا گشتی یا بزاڤا گۆڕان دبێژیت: « پشتەڤانیێ ل دەستپێشخەرییا كۆمبوونا هێز و ئالیێن سیاسی دكەین، ب تایبەت بۆ دەربازكرنا قەیرانێن سیاسی، گرنگە حزب دووماهیێ ب ناكۆكیێن سیاسی بینن و دەستێ خوە بدەنە دەستێ هەڤدوو داكو رووبڕووی وی رەوشا ترسناك یا رۆژهەلاتا ناڤین ببن. لەوڕا ئەڤ دەستپێشخەرییا كاك مەسعود بارزانی گرنگە و دڤێت ئالی ب لەز بن د كۆمبوونان دا».
سامی سورچی، پەیڤدارێ پارتا بنیات گۆت: «دەستپێشخەرییا سەرۆك بارزانی گەلەك گرنگە بۆ دووماهیئینان ب قەیرانا سیاسی و دڤێت ئالیێن سیاسی دووماهیێ ب وێ دووركەفتنێ ژ هەڤدوو بینن، یا گرنگ ئەوە لەزێ بكەن د پێكئینانا حوكمەتێ و كاراكرنا پەرلەمانی، چنكو رەوش دخوازیت كورد ئێكگرتی بن».
