رێککەفتن سەر بگریت رێڤەبەریا خوەسەر و هەسەدە نامینن
ب، سهرجان مەحمود:
نوونەرێ رێڤەبەریا خوەسەر ل شامێ دیار دکەت ل گۆر رێککەفتنا وان و شامێ هەکە رێککەفتن بگەهیتە ئارمانجا خوە دێ رێڤەبەریا خوەسەر و هێزێن سووریا دیموکرات هێنە هلوەشاندن و ژ بۆ دو بابەتێن گرنگ ژی ل گەل شامێ دانوستاندن دهێنە کرن.
عەبدولکەریم عومەر نوونەرێ رێڤەبەریا خوەسەر ل شامێ دیار کر، رێککەفتنا وان ل گەل شامێ هەتا نها ب رەنگەکێ باش بەردەوام دکەت و گەلەک خالێن رێککەفتنێ ژی وەکو خوە هاتینە بجهئینان و ل گۆر رێککەفتنێ دڤێت هەبوونا گەلێ کورد ل سووریێ ب فەرمی بهێتە قەبوول کرن و هەروەسا نها پێنگاڤ ب پێنگاڤ ژی کارێن گەلەک باش دهێنە کرن و گۆت: (هەم ژ ئالیێ رێڤەبەریا خوەسەر و هەم ژی ژ ئالیێ شامێ ڤە هەتا نها کارێن گەلەک باش هاتینە کرن، هەر دو ئالیان دڤێت پرسێن هەی چارەسەر بکەن و بێگومان ئیرادەیەک بهێز ژی ژ بۆ چارەسەریێ هەیە).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، هەتا نها پشکەک مەزن ژ هێزێن سەربازی و هەروەسا هێزێن ئاسایشێ بووینە پشکەک ژ وەزارەتا بەرگریێ و وەزارەتا ناڤخوە و ل گۆر تایبەتمەندیا دەڤەرێن کوردی دێ کار کەن و ئەو یەک ژی بێگومان کارەک گەلەک باشە، لێ بابەتێ نها دانوستاندن ل سەر دهێتە کرن بابەتێ هێزێن پاراستنێ یێن ژنێ نە، هەتا نها ژی ل گەل شامێ دانوستاندن دهێنە کرن دا ئەو ژی ببنە خوەدان ستاتۆیەکا تایبەت و بشێن خزمەتا وەلاتێ خوە بکەن و گۆت: (هەلوەستێ شامێ خراب نینە، لێ هەتا نها نەهاتیە ئێکلاکرن کا دێ هێزێن پاراستنا ژنێ چاوا شێن د ناڤ هێزێن سەربازی و ئەمنی یێن سووریێ دا جهێ خوە بگرن، دانوستاندن هەتا نها ژی بەردەوامن و ئالیێ کوردی نێرینا خوە بۆ شامێ دیار کریە و ئەز وەسا دبینم دێ دەمەکێ نێزیک دا ئەو یەک ژی هێتە ئێکلاکرن).
سەبارەت ب پێشنیازا ئالیێ کوردی ژی ناڤهاتی دیار کر، رێڤەبەریا خوەسەر و هەسەدێ پێشنیاز کرینە کو هێزێن پاراستنا ژنێ وەکو پشکەک ژ هێزێن دژی تیرۆرێ ل سووریێ کار بکەن و ئەو یەک وەکو پێشنیازەک فەرمی ئاراستەی سەرۆک کۆمارێ سووریێ هاتیە کرن، لێ هەتا نها شامێ ب فەرمی بەرسڤا رێڤەبەریا خوەسەر و هەسەدێ نەدایە.
نوونەرێ رێڤەبەریا خوەسەر ل شامێ د پشکەکا دی یا ئاخڤتنا خوە دا ئاماژە ب ڤێ یەکێ ژی کر، کو نها ئێک ژ بابەتێن هەری گرنگ یێن کو بوویە جهێ دانوستاندنان ل گەل شامێ بابەتێ زمانێ کوردی یە، کوردان دڤێت شام زمانێ کوردی وەکو زمانێ فەرمی ل سووریێ قەبوول بکەت و هەروەسا پەروەردەیا ل دەڤەرێن کوردی ژی ب فەرمی کوردی بیت، بەری نها شامێ هەلوەستەک جودا هەبوو و ئەو یەک ژ ئالیێ کوردان ڤە ب توندی هاتە رەتکرن و نها ل گەل شامێ دانوستاندن بەردەوامن دا بابەتێ زمانێ کوردی ژی بهێتە ئێکلاکرن و گۆت: (بابەتێ زمانێ کوردی بۆ هەموو کوردان ل سووریێ هێلا سۆرە و ئەو یەک بۆ بەرپرسێن شامێ ژی هاتیە دیار کرن، چونکی دەمێ تو هەبوونا مللەتەکێ قەبوول بکەی وی دەمی دڤێت تو زمانێ وی ژی ب فەرمی قەبوول بکەی، ئەو یەک ب فەرمی بۆ شامێ هاتیە دیار کرن و داخواز هاتیە کرن کو بابەتێ زمانێ کوردی وەکو پشکەک ژ مافێن رەوا یێن گەلێ کورد ل سووریێ بهێتە قەبوول کرن).
سەبارەت ب مافێن گەلێ کورد ل سووریێ نوو دا ژی عەبدولکەریم عومەر دیار کر، بەری نها ژی مە بۆ شامێ دیار کریە کو پێدڤیا سووریێ ب دستوورەک نوو و دیموکراتی هەیە کو تێدا مافێن گەلێ کورد ب فەرمی بهێتە گەرەنتیکرن، دستوورێ نها یێ سووریێ گەلەک کێماسیێن خوە هەنە و نابیتە بەرسڤ بۆ داخوازیێن هەموو خەلکێ سووریێ و بێگومان ئەم وەسا دبینین کو ب رێیا دستوورەکێ نوو دێ هەموو مافێن گەلێ کورد ل سووریێ هێنە گەرەنتیکرن، هەتا ئەو یەک نەهێتە کرن بێگومان رەوشا سووریێ ژی ئارام نابیت و ئالۆزیێن هەی دێ بەردەوام بن.
سەبارەت ب چارەنڤیسێ رێڤەبەریا خوەسەر و هێزێن سووریا دیموکرات ژی ناڤهاتی دیار کر، ل گۆر رێککەفتنا ل گەل شامێ هەکە پرۆسیسا ئینتیگراسیۆنێ یا سەرکەفتی بیت وی دەمی بێگومان رێڤەبەریا خوەسەر و هەسەدە نامینن، لێ ژ بۆ ڤێ یەکێ ژی وەکو مە بەری نها دیار کری دڤێت دستوورەک نوو بۆ سووریێ بهێتە دانان و د دستوورێ نوو یێ سووریێ دا ژی هەموو مافێن گەلێ کورد بهێنە گەرەنتیکرن.
