كۆڕەك تیلیكۆم دێ ل كوردستانێ بەردەوام بیت و ناهێتە داخستن

دیدار/ دلۆڤان ئاكرەیی

وەزیرێ ڤەگوهاستن و گەهاندنێ ل هەرێما كوردستانێ دیار كر، ئەم پشتڕاستیێ ددەینە هەڤپشكێن (كۆڕەك تیلیكۆم) كو دشێن سیمكارتا خوە بكار بینن و ل كوردستانێ (كۆڕەك تیلیكۆم) ناهێتە داخستن.
ئانۆ جەوهەر، وەزیرێ ڤەگوهاستن و گەهاندنێ ل هەرێما كوردستانێ بۆ ڕۆژنامەیا (ئەڤرۆ) گۆت: ل گەل شاندەكێ لژنەیا ڤەگوهاستن و گەهاندنێ ل جڤاتا نوونەرێن ئیراقێ كۆمبووینە و ئێك ژ تەوەرێن دانوستاندنان كێشەیێن (كۆڕەك تیلیكۆم) بوویە كو ئێكەم كۆمپانییا هەرێما كوردستانێ و ئیراقێیە د بوارێ پەیوەندییان دا، بابەتی پەیوەندی ب ملیۆنان وەلاتییێن هەرێما كوردستانێ ڤە هەیە یێن هەژمارا كۆڕەكێ بكار دئینن بۆ دەمێ دەهان سالانە، كو هەژمارێن وان هاتینە گرێدان ب هەژمارێن وان ل تۆڕێن جڤاكی، بانك و هەژمارێن خواندنێ ڤە.
ئانۆ جەوهەر ئاشكرا كر كو وان داخواز ژ لژنەیا جڤاتا نوونەران كریە ل دووڤ یاسایی و ڕۆلێ خوە یێ چاڤدێریێ ل گەل دەزگەهێن فیدڕالی كار بكەن دا كو كێشەیا كۆڕەكێ كو چەندین ڕەهەندێن یاسایی هەنە، پێدڤییە ل دووڤ یاسایێ بهێتە چارەسەركرن، دڤێت كارێن كۆمپانیایێ بەردەوامی هەبیت ژبەر كو پەیوەندییەكا ڕاستەوخوە ب ژیانا وەلاتییان ڤە هەیە، دڤێت ژ ڕوویێ دارایی و یاسایی ڤە بهێنە چارەسەركرن دوور ژ وێ چەندێ كو بەرژەوەندییا وەلاتییان زیانمەند ببیت.
و گۆت ژی: دەستەیا گەهاندنێ یا ئیراقێ نەشێت ل كوردستانێ كۆڕەكێ بمرینیت، و مە ژی نەڤێت بگەهیتە وێ چەندێ، ئەڤە بابەتەكێ یاسایی یە و كۆمپانیایەكا كوردستانی یە و ب بڕیارا حوكمەتا هەرێما كوردستانێ و وەزارەتا ڤەگوهاستن و گەهاندنێ كار دكەت و كەس ژی نەشێت كۆمپانیایەكا كوردستانێ بمرینیت بێ ڤەگەڕیان بۆ حوكمەتا هەرێما كوردستانێ، مە سیستەمەكێ فیدڕالی هەیە نەك دكتاتۆری.
وەزیرێ ڤەگوهاستن و گەهاندنێ ل هەرێما كوردستانێ ئاماژە ب وێ چەندێ كر، وان بەری نها سەرەدانا دەستەیا گەهاندنێ یا ئیراقێ كریە و ل دووڤ دەستووری دانوستاندن هاتینە كرن و بەرهەڤییا خوە بۆ لژنەیا هەڤپشك دیار كریە و گۆت ژی: كۆڕەك سویچ نینە بیننە خوارێ و ئەڤە بابەتەكە پەیوەندی ب بەرژەوەندییا ملیۆنان وەلاتییان ڤە هەیە، ئەڤە ل دووڤ داخۆیانییا كەسەكی یان ئالییەكی ناهێتە كرن.
ل دۆر كاركرنا كۆڕەكێ ل دەڤەرێن كوردستانی یێن ژ دەرڤەی ئیدارەیا هەرێما كوردستانێ وەكو كەركووكێ، ئانۆ جەوهەری گۆت: مە داخواز كر ل دووڤ دەستهەلاتا یاسایی یا خوە بەڕەڤانیێ ژ مافێ هەموو وەلاتییان بكەن كو پتر ژ چار ملیۆن وەلاتییان سیمكارتا كۆڕەكێ بكار دئینن و بابەتێ كۆمپانییا كۆڕەكێ تنێ باج نینە و بابەتەكێ یاسایی یە، كۆڕەك ژ دەستپێكا مۆلەتا خوە پێدڤی بوو سێ ملیۆن و 200 هزار هەژمارە بهێنە ڤەگوهاستن بۆ كۆڕەكێ و نەهاتە كرن ئەڤە دەستپێكا كێشەیێ بوویە، ژ بەر ڤێ چەندێ دبێژم كێشە كێشەیا سالەكێ و دوو سالان و 10 سالان نینە، بڕیارا دادگەهێ ئێك یان دوو و سێ نینە، بڕیارەك و دوو یا حوكمەتا فیدڕالی نینە و چەندین بڕیارن و چەندین ئەنجامێن وان هەنە، چەندین بڕیارێن وێ هەتا نها نەهاتینە ب جهئینان، ژ بەر ڤێ چەندێ دڤێت بابەتێ كۆڕەكێ ب هێمنی و دوور ژ بڕیارێن لەز ب شێوەیەكێ یاسایی و بهێتە چارەسەركرن نەك ب ڕێیا داخۆیانیێن میدیایی و باسێ داخستنێ بهێتە كرن بێ كو بەرژەوەندییا وەلاتییان ل بەر چاڤ بهێتە وەرگرتن.

کۆمێنتا تە