سەرۆك بارزانی: هەكە ئەم ب خوە نەبین كەس مە ناپارێزیت
ب بەرهەڤبوونا سەرۆك مەسعوود بارزانی، ل باژێڕێ هەولێرێ، ڕێوڕەسمێن دووماهیكهاتنا خۆلا 20ێ یا پەیمانگەها كادرێن پارتی دیموكراتی كوردستان هاتنە بڕێڤەبرن.
سەرۆك بارزانی پەیڤەك پێشكێش كر و پیرۆزباهی ل قوتابییێن دەرچوویێن خۆلا 20ێ كر و سوپاسییا بەرپرسێ پەیمانگەهێ و مامۆستایان ژی كر ل پێگەهاندنا ڤێ سامانا مەزن.
سەرۆك بارزانی ڕاگەهاند: دڤێت قوتابییێن دەرچووی مفایەكێ مەزن ژ وی زانستی ببینن یێ كو وەرگرتی و پەروەردەیا سیاسی بۆ كادران گەلەك گرنگە ب تایبەت د ڤی سەردەمێ دا و دڤێت كادرێ مە چەكدار بیت ب وی زانستی یێ كو بشێت ڕووبڕووی هەموو ئاستەنگیان ببیت.
هەروەسا سەرۆك بارزانی ئاماژە ب دیرۆك و پێدڤییا دامەزراندنا پارتی دیموكراتی كوردستان كر و گۆت: پارتی ل قووناغەكا گەلەك هەستیار و زەحمەت بۆ كوردان هاتییە دامەزراندن، بەلێ پارتی نەهێلا بێ هیڤیاتی بنەجه ببیت و هیڤی ئێخستە دناڤ دەرۆونێ هەر تاكەكێ كورد دا.
هەر د پەیڤا خوە دا سەرۆك بارزانی باس ل شۆڕشێن كوردستانێ كر و ل دۆر شۆڕشا ئیلۆنێ ڕاگەهاند: شۆڕشا ئیلۆنێ ب سەركردایەتییا بارزانیێ نەمر شۆڕشا هەموو نەتەوەیا كورد بوو و كورد ل هەموو پارچەیێن كوردستانێ د وێ شۆڕشێ دا پشكدار بوون و شۆڕشا گولانێ ژی هەكە هاریكارییا برایێن مە ل باكوور و ڕۆژئاڤا نەبا ئەم نەدشیاین بەردەوام بین.
سەرۆك بارزانی گۆت ژی: پارتی ڕاستییا نەتەوەیی گەهاندە هەموو پارچەیێن كوردستانێ و پارتی باوەری ب خوەبوون دروست كر و ئەڤە ڕاستییە.
هەر د پەیڤا خوە دا سەرۆك بارزانی دووپاتی ل سەر پێدڤییا باوەری ب خوەبوونا تاكێ كورد كر و ڕاگەهاند: هەكە ئەم ب خوە نەبین كەس مە ناپارێزیت. گۆتە كادیرێن پارتی ژی: وێ باوەریێ بۆ هەر تاكەكێ كورد دروست بكەن.
سەبارەت ب ڕەوشا نوكە یا دەڤەرێ، سەرۆك بارزانی د پەیڤا خوە دا ئاماژە ب وێ چەندێ كر كو ڕەوشا دەڤەرێ گەلەك هەستیارە و كەس نزانیت بەر ب كیڤە دچیت، شەڕەكێ مەزن ل مەها شواتا بۆری ڕوودا و هەرێما كوردستانێ و خەلكێ كوردستانێ هەتا ڕادەیەكێ مەزن ژ بەلایەكا گەلەك مەزن هاتنە پاراستن.
دەربارەی پەیوەندییان ژی ل گەل وەلاتێن دەوروبەر، سەرۆك بارزانی گۆت: حەز دكەین باشترین پەیوەندی هەبیت و نە دوژمنین ل گەل ئێرانێ و نە ل گەل توركیایێ و چو دەولەتەكا دی. سەرۆك بارزانی هیڤی ژی خواست كو شەڕێ دەڤەرێ ب ئاشتی دووماهیك بهێت.
سەبارەت ب پەیوەندییان ژی ل گەل حوكمەتا فیدرالی، سەرۆك بارزانی ڕاگەهاند: پەیوەندییێن مە نوكە باشن و ئەم ل سەر بنەمایێ دەستووری داخوازییان دكەین، داخوازا پتر ژ وێ ناكەین یا كو ل دەستووری دا هاتی و كێمتر ژ وێ یا كو د دەستووری دا هاتییە قەبوول ناكەین.
هەروەسا باس ل وێ ڕێككەفتنێ كر یا كو د ناڤبەرا نێچیرڤان بارزانی و هادی عامری دا هاتییە ئیمزاكرن و دووپات كر كو هەكە ئەڤ ڕێككەفتنە بهێتە بجهئینان باشە، بەلێ هەكە بجهنەئینن، ئەم دێ بیر ل وێ چەندێ كەین كا هەلوەستێ مە دێ چەوا بیت.
ل دووماهیێ دووبارە سەرۆك بارزانی پیرۆزباهی ل قوتابییێن خۆلا 20 یا كادران كر. هەروەسا سەرۆك بارزانی باوەرنامە و خەلاتێ ڕێزلێنانێ پێشكێشی مامۆستا و قوتابییێن سەركەفتی و دەرچوویێن خۆلا 20 یا پەیمانگەها پێگەهاندنا كادرێن پارتی دیموكراتی كوردستان كر كو د وێ خۆلێ دا 96 كەس پشكدار ببوون.
