سالانە ب كەڤالەكێ جودا پشكداریێ د فێستیڤالێ دا دكەت
سندس سالح سلێڤانەیی
سالانە مامێ (حسێن) ب كەڤالەكێ جودا پشكداریێ د فێستیڤالا تری و هنگڤینی دا دكەت و بۆ ئەڤ سالە وێنەیەكێ بەرێز (مەسرور بارزانی) سەرۆكێ حكومەتا هەرێما كوردستانێ ب دۆشاڤا تری چێكریە و ب گۆتنا وی بۆ سالا بهێت دێ وێنەیێ سەركردەیەكێ دی یێ كورد بۆ فێستیڤالێ چێكەت.
حسێن دبێژیت: ئەز وەك جۆتیارەك سالانە پشكداریێ دڤێ فێستیڤالێ دا دكەم و بەری دو سالان ئەو هزر بۆ من چێبوو كو تشتەكێ جودا چێكەم كو ل فێستیڤالێ ببیتە جهێ سەرنجا وان كەسێن دهێنە فێستیڤالێ، ئەو بوو ل سالا ئێكێ من وێنەیەكێ (بارزانیێ نەمر) ب تری چێكر و ل سالا بۆری ژی وێنەیەكێ سەرۆك و مەرجەعێ كوردان (مەسعود بارزانی) و بۆ ئەڤ سالە ژی وێنەیەكێ بەرێز (مەسرور بارزانی) سەرۆكێ حكومەتا هەرێما كوردستانێ ب دۆشاڤا تری چێكر و هەر نوكە ئەز یێ هزرێن خۆ دكەم بۆ سالا بهێت دا وێنەیەكێ سەركردەیەكێ دی یێ كورد چێكەم و ژ بەركو ئەو سەركردە ل دەف من دعەزیزن و جهێ ڕێزێ نە لەورا ئەز وێنەیێن وان ب تری و دۆشاڤێ چێدكەم.
ل دووماهیێ گۆت: هەبوونا ڤان جۆرە فێستیڤالان گرنگیا خۆ هەیە و دبیتە دەلیڤەك كو دەرگەهێن فرۆتنێ بۆ جۆتیاران پتر بهێنە ڤەكرن و داخوازا بەردەوامیێ بۆ ڤان جۆرە فێستیڤالان دكەم.
