خولا كوردستانێ دێ ب شێوەیێ كۆمڤەبوون ل زاخۆ هێتە كرن
قەیس وەیس:
د داخویانیەكێ دا جێكرێ سەرۆكێ فدراسیۆنا باسكێت بۆلا كوردستانێ دیار كر وەرزێ نوو یا خولا نایاب ل سەر ئاستێ یانەیان بۆ پێشكەڤتیان دێ ل باژێرێ زاخۆ هێتە كرن ب شێوەیێ كۆمڤە بوون و پێشبینییا پشكداریەكا باش یا یانەیان دهێتە كرن.
زێدەتر هشیار دوبانكی گۆت: ژبۆ ئەنجامدانا وەرزێ نوو یا خولا نایابا كوردستانێ دگەل یانەیا زاخۆ ئەم ڕێكەفتی نە ببیتە سپۆنسەرا خولێ ئەوا دێ ب شێوەیێ كۆمڤەبوون ل هۆلا گرتییا بنگەهێ وەرزش و لاوێن زاخۆ هێتە كرن، مە نڤێسارێن فەرمی بۆ كۆمەكا یانەیان فرێكرینە، هندەك یانە ڕازیبووینە ژ وانا زاخۆ، گارە، سۆلاڤا نوو، سایبس و دەربەندیخان، هەروەسان یانەیا دهۆكێ پشكدار نابیت، هەروەسان ئەم د ڤێ حەفتییێ دا دێ چاڤەڕێ بەرسڤێن چەند یانەیێن دی بین وەكو دووماهی دەلیڤە.
هەروەسان ناڤهاتی گۆت: پشتی ب دووماهی هاتنا مولەتا پشكداریێ دێ كۆمبوونەكێ كەین ژبۆ دەستنیشانكرنا ژڤان و دەمێن خولێ كو د ڤێ مەهێ دا دەرباز نەبیت، شێواز دێ ب دورستی پشتی تمامبوونا هژمارا یانەیان دیاربیت لێ هەموو یاری دێ ل زاخۆ هێنە كرن ژبەركو ئەو سپۆنسەرا سەرەكی یە، هەرتشتەكێ پێدڤی بۆ قارەمانیێ دێ بەرهەڤ كەن ژبۆ سەركەڤتنا كاروانێ ڤێ خولێ.
لدووماهیێ ناڤهاتی دیاركر ژبەر قەیرانا دارایی یێن فدراسیۆنێ ژلایەكێ و یێن یانەیان ژ لایەكێ دووڤە بوو ئەگەر خول و قارەمانیێن كوردستانێ گیرووبن و هیڤی خواست ب پشتەڤانییا حوكمەتا هەرێما كوردستانێ بۆ داهاتی ئەو بشێن چالاكیێن خوە بەرفرەهتر بكەن ب شێن خزمەتا وەرزشا باسكێت بۆلا كوردستانێ و هەموو یانەیان بكەن.
