سكرتێرێ جڤاتا وەزیران: بۆ بنەجهكرنا شایستەیێن دارایی، دانوستاندن ل گەل بەغدایێ د ڤێ حەفتیێ ژی دا دێ بەردەوام بن
ئەندامەكێ شاندێ بلندێ دانوستاندنكارێ حوكمەتا هەرێما كوردستانێ ئاشكرا كر، دانوستاندنێن دووماهییا حەفتییا بۆری ل گەل وەزارەتا دارایی یا فیدرال ب شێوەیەكێ ئاڤاكەر ب ڕێڤەچووینە و هندەك خالێن پێشكەفتنێ تێدا هەنە.
«ئامانج ڕەحیم»، سكرتێرێ جڤاتا وەزیرێن هەرێما كوردستانێ و ئەندامێ شاندێ بلندێ دانوستاندنكارێ حوكمەتا هەرێمێ، د پێگەهێ خوە یێ فەیسبووكی دا بەلاڤ كریە كو بۆ بنەجهكرنا شایستەیێن دارایی یێن هەرێما كوردستانێ، دانوستاندن ل گەل وەزارەتا دارایی یا فیدرال د ڤێ حەفتیێ دا دێ بەردەوام بن.
ناڤبری ئاماژە ب وێ چەندێ كریە «دانوستاندنێن مە ل گەل وەزارەتا دارایی یا فیدرال، سەبارەت ب پڕۆژە یاسایا بودجەیا سالا 2027 و بنەجهكرنا ماف و شایستەیێن دارایی یێن هەرێما كوردستانێ، دێ بەردەوام بیت».
هەروەسا ئاشكرا كر»دانوستاندنێن دووماهییا حەفتییا بۆری ل گەل وەزارەتا دارایی یا فیدرال ب شێوەیەكێ جدی و ئاڤاكەر ب ڕێڤەچووینە، هندەك خالان پێشكەفتن ب خوەڤە دیتییە، لێ هێشتا چەند پرسێن بنەڕەتی ماینە كو پێدڤی ب چارەسەرییا هەڤپشك هەنە، دانوستاندن ل گەل وەزارەتا دارایی یا فیدرال د ڤێ حەفتیێ ژی دا دێ بەردەوام بن».
ئامانج ڕەحیم دیسان د بێژیت «ئارمانجا مە ئەوە بودجەیا 2027 ببیتە دەرفەتەك بۆ چارەسەركرنا كێشەیێن دارایی، نەكو درێژەدان ب كێشەیێن سالێن بۆری».
