پارتی و هەڤپەیمانییا خەدەمات دوپاتیێ ل سەر هەڤپشكییا نیشتمانی دكەن
ئەندامێ دەستەیا سیاسی وپەیڤدارێ فەرمیێ هەڤپەیمانییا «خەدەمات» ڕاگەهاند، د كۆمبوونا د ناڤبەرا شاندێ هەڤپەیمانییا وان ب سەرۆكاتییا «محەمەد ساحب دەڕاجی» و شاندێ پارتی دیموكراتی كوردستان ب سەرۆكاتییا « هۆشیار زێباری» چەندین پرس و دۆسییێن گرنگێن سیاسی و نیشتمانی هاتنە گەنگەشە كرن.
حوسام ڕوبەیعی، ئەندامێ دەستەیا سیاسی و پەیڤدارێ فەرمیێ هەڤپەیمانیا «خەدەمات» ڕۆهنكر، د دیدارێ دا دانوستاندن ل دۆر بهێزكرنا دیالۆگ و هەماهەنگییا د ناڤبەرا هێزێن سیاسی و چەسپاندنا هەڤپشكییا نیشتمانی ل سەر بنەمایێ دەستووری هاتە كرن. هەروەسا پرسا تەمامكرنا پێكهاتەیا كابینەیا حوكمەتێ وگەنگەشەكرنا یاسایا بودجەیا گشتی د چارچۆڤەیێ هەڤپەیمانییا بڕێڤەبرنا دەولەتێ دا هاتە باسكرن، ب جۆرەكێ كو شایستە و مافێن دارایی یێن گەلێ ئیراقێ پاراستی بن و ڕێكخستنا كاری دەزگەهێن دەولەتێ مسۆگەر بیت.
پەیڤدارێ هەڤپەیمانییا «خەدەمات» دیاركر ژی، كۆمبوونێ دوپاتی ل سەر بەرفرەهكرنا ئاسۆیێن هەڤكارییا جڤاكی و كولتووری كر، ئەو ژی ب ڕێكا لێكگۆهارتنا بەرنامەیێن ڕەوشنبیری و ڕێكخستنا چالاكییێن هەڤپشك، ب تایبەت د ناڤ تەخا گەنجان دا كو ب ستوونەكا سەرەكی و پاشەڕۆژا ئیراقێ دهێنە دانان.
د پشكەكا دی یا گۆتنێن خوە دا، ڕوبەیعی پێداگری ل سەر پێدڤییا چڕكرنا سەرەدانێن دووئالییانە د ناڤبەرا پارێزگەهێن هەرێما كوردستانێ و پارێزگەهێن ناڤەڕاست و باشوورێ ئیراقێ دا كر، ب مەرەما بهێزكرنا تەبایییا نیشتمانی و پەیوەندییێن جڤاكی. هەڤدەم دووپاتكر، دڤێت كولتوورێ تێكگەهشتن و دیالۆگێ زال ببیت و ناكۆكییێن سیاسی ژ پەیوەندییێن د ناڤبەرا پێكهاتەیێن گەلی دوور بێخن، ئەڤە ژی ل سەر بنەمایێ وەكهەڤییا د مافێ وەلاتیبوونێ و شایستەیێن نیشتمانی دا.
