دۆرین رۆمێل: وەرزش بوو ئەگەر ببمە قوتابییا کولیژەیا پزیش
د داخویانیەكێ دا ستێرا گەنج یا باژێرێ دهۆكێ دۆرین رۆمێل یاریزانا یانەیا سەنحاریب و هەلبژارتیێ ئیراقێ بۆ یارییا ڤۆلی بۆلی دیار كر هەر ژ زارووكینیا خوە ب پشتەڤانییا دایكۆبابێن خوە گەهشتیە هیڤی و ئارمانجێن خوە و نوكە قوتابییا كۆلیژەیا پزیشكی ددانا و چاڤ ل دەستكەڤتێن مەزنترە.
زێدەتر ناڤهاتی گۆت: وەكو هەر كچەكا وەرزشڤان ب حەز و ڤیان هاتیمە دناڤ وەرزشێ دا، ژبەركو بنەمالامە هەموو وەرزشڤانن ئەم هەموو قەردارێن باپیرێ خوە داود رەبەن وەرزشڤانێ دێرین یێ پارێزگەهێ نە كو ئەم و یانەیا مە گەهاندینە قارەمانیێن ئیراقێ و ئاسایی، لەوما ژی ب شانازی ڤە دبێژین باپیرێ مە نەخشە ڕێكا سەركەفتنێ بۆ مە هەموویان دانان و بوویە ئەگەر كو ئەز و چەند یاریزانێن دناڤ مالا مە دا بگەهنە ئاستێن بلند.
ژلایەكێ دووڤە دۆرینا 20 سالی گۆت: دەستپێكا من یا وەرزشێ هەر ژ زارووكینا خوە بوویە ل گەل دایكا خوە كو ئەوژی یاریزانەكا خودان شیان بوو د یاریێن ڤۆلی بۆلی و باسكێت بۆلێ دا، پشتەڤانیا من كر و ئەز فێری هەردو یارییان كرم، حەزەكا باش بۆ من پەیدابوو گەهشتە وێ ڕادەیەیی ئەز د هەردو یارییان دا زانینێ وەربگرم و ئاستێ خوە بلندبكەم، سپاس بۆ خودێ ل گەل یانەیا خوە ئەم شیاین دو ناسناڤێن ئیراقێ بدەستڤە بینن، هەروەسان مە پشكداری د قارەمانییا كۆپا رۆژئاڤا ئاسیا دا كربوو و ئەڤ سالە ژی دێ پشكداربین.
ژلایەكێ دووڤە ستێرا گەش یا دهۆكییان گۆت: پێخوەشحالم وەكو یاریزانەكێ باوەرپێكری و سەرەكی ل گەل هەلبژارتییێ ئیراقێ و ببمە ئێك ژ كاریگەرترین یاریزانێن تیمێ، هێشتا ژیێ من بچووكە و من هیڤیێن مەزن هەنە، پێنەڤێت دڤێت باشتر خوە زەحمەت بدەم هەتا دگەهمە گۆپیتكێ.
لدووماهیێ ناڤهاتی گۆت: بڕێیا وەرزشێ حەزا خواندنا من باشتر لێهات و نوكە قوتابیا گۆلیژەیا پزیشكی مە و ئەڤە ژی ئێك ژ خەونێن من بوو و ئەز گەهشتیمێ كو خزمەتا خەلكێ خوە بكەم، هیڤییا من ئەوە هەر یاریزانەك بیت وەكو من خۆ ماندی بكەم و پتر حەز ژ خواندنا خوە ژی بكەن، وەرزش ساخلەمییە بۆ جەستەیێ مرۆڤی و پتر هاریكارە بۆ بهێزكرنا مێشكێ مرۆڤی.