ب زمانێ زڤر و گه‌فان پرسگرێك ئالۆزتر دبن
پشتی ده‌مه‌كێ بێده‌نگیێ جاره‌ك دی، نوری مالكی سه‌رۆك وه‌زیرێن به‌رێ كو نها جێگرێ سه‌رۆك كۆمارێ عیراقا فیدراله ده‌ركه‌فت و ل هه‌مبه‌ر خه‌لك و ئالیگرێن خوه و هژماره‌ك میدیا و كه‌نالێن راگه‌هاندنێ و ب زمانه‌كێ زڤر و پر گه‌ف داخویانێن خوه یێن به‌رێ دوباره كرن، جاره‌ك دی ب په‌یڤێن ئاگرین خواست هه‌بوونا خوه د قادا سیاسی و ل سه‌نته‌رێن بریار بده‌ست دا بسه‌لمینیت، هه‌ر وه‌كو دخواست بێژیت: ئه‌ڤه ئه‌زم و ئه‌زێ هه‌یم و هه‌تا مابم ئاگرێ دووبه‌ره‌كیێ و شه‌رێ مه‌زهه‌بی و تایفی خۆش دكه‌م و ناهێلم عیراق ته‌نا و سه‌قامگیر بیت.
مالكی باسێ پارچه‌بوونا عیراقێ كر و گۆت عیراق دابه‌ش نابیت بێ كو ل ده‌ریایێن خۆینێ ده‌رباز بیت، هه‌ر وه‌كو بێژی نها عیراق سه‌قامگیر و یه‌ك پارچه‌یه و چ پرسگرێك و ئاریشه‌یه‌ك نینه و خه‌لكه‌ك هه‌یه ب پیلانا دۆژمن و ناحه‌ز و سه‌نته‌رێن بیانی دخوازان عیراقێ پارچه پارچه بكه‌ن و ئاشتی و سه‌قامگیرییا وێ تێك بده‌ن. مالكی ل جهێ ڤێ چه‌ندێ كو داخوازا لێبورینێ ژ عیراقیان بكه‌ت و بێژیت سیاسه‌تا مه یه‌ك ره‌هه‌ند و سه‌ره‌ده‌ریكرنا مه یا نێگتیڤانه دگه‌ل پێكهاته‌یێن دی سه‌ده‌مێ سه‌ره‌كیێ قه‌یرانا مه‌زنا عیراق ژ ئالیێ له‌شكری و ئه‌منی و ئابوورییه و ل ژێر سێبه‌را ره‌شا ڤان قه‌یرانا خه‌لك دنالن و ب هه‌زاران گه‌نج بوونه قوربانی و ب ملیونه‌ها وه‌لاتی كۆچبه‌ر بوونه و د ژیانه‌كا سه‌خت و دژوار دا دژین.
پێدڤی یه نه‌فره‌تێ ل زهنیه‌تا ده‌مارگیریێ بكه‌ین و مه پێدڤی ب یه‌كرێزی و هه‌ماهه‌نگییا سیاسی هه‌یه و دڤێ ته‌ڤ لایه‌نێن سیاسی و پێكهاته‌یێن ئاینی و مه‌زهه‌بی و نه‌ته‌وه‌یی ب هه‌ڤرا دیالۆگێ بكه‌ن و رێكێن چاره‌سه‌ریێ بۆ ڤان پرسگرێكێن كوور و ئالۆز بینین و نه‌خشه رێیه‌كێ بۆ سه‌قامگیرییا سیاسی و جڤاكی دابرێژن و وه‌كو كه‌سایه‌تیه‌كێ پایه‌بلند ب هووری دیمه‌نێ سیاسی ل عیراقێ ڤه‌خوینیت و ل سه‌ده‌مان بگه‌رێت، ل جهێ ڤێ چه‌ندێ جاره‌ك دی ب هه‌مان ئالاڤ و زمانێ به‌رێ بپه‌یڤیت، هه‌مان ئه‌زموون دووباره بكه‌ت و پرسگرێكان ئالۆزتر بكه‌ت. ل په‌یڤێن به‌رێزی دیار بوو، كو وی چ ئه‌زموون ل بوویه‌رێن به‌رێ وه‌رنه‌گرتیه و نه‌شیایه خوه ل كلتوورێ تۆندره‌وی و ده‌مارگیرییا مه‌زهه‌بی یا به‌رته‌نگ رزگار بكه‌ت، ئه‌و ده‌مارگیرییا ره‌ه و ریشالێن وێ بو سه‌دان سالان به‌ر نها ڤه‌دگه‌ره و بوویه سه‌ده‌مێ روودانا چه‌ندین كاره‌سات و جه‌نگ و شه‌رێن مه‌زن و خۆینه‌لۆ.
ب زمانێ زڤر و ب گه‌ڤان و ب لۆژیكا (الدم بالدم) و حه‌زا تۆلڤه‌كرنێ چ پرسگرێك چاره‌سه‌ر نابن، فه‌ره نه‌فره‌ت ل ڤێ عه‌قلیه‌تا وێرانكاری بهێ كرن، مه پێدڤی ب ئه‌لته‌رناتیفه‌كێ هه‌یه كو بكاریت مه ژ ڤێ دوزه‌خێ رزگار بكه‌ت و ب لۆژیكه‌كا دی هزر بكه‌ین و رووپه‌لێن نوو ڤه‌بكه‌ین. ئه‌ڤ قه‌یرانا مه‌زن ده‌رئه‌نجامێ هزرا یه‌ك لایه‌ن و ده‌مارگیرییا نه‌ته‌وه‌یی و ئایینی و مه‌زهه‌بی یه. دیار نینه كه‌نگی ئه‌ڤ ده‌ڤه‌ره سه‌قامگیر دبیت، لێ دزانم ئه‌گه‌ر ئه‌م شیاین ب دیده‌كا دیموكراسی سه‌ره‌ده‌ریێ دگه‌ل هه‌ڤدوو بكه‌ین، كه‌سێن مینا مالكی ل سه‌نته‌رێن بریار بده‌ست بهێنه دوور كرن، ل وی ده‌می هه‌ست دكه‌ین ئه‌ڤ دونیایه چه‌ند خۆش و سه‌قامگیره.
