ب وێنه: هه‌ر تشت ل دۆر شيراتۆن ئۆتێل دهۆك
ئه‌ڤرۆ نيوز:
ئەنتوان جۆیگنانت، رێڤەبەرێ گشتیێ شیراتۆن دھۆک ئۆتێل، د دیدارەکێ دا بۆ رۆژناما ئەڤرۆ بەحس ل پرۆژە و پلانێن ئۆتێلا شیراتۆن دکەت و رێژا کارمەندێن باژێرێ دھۆکێ یێن ل ناڤ ئۆتێلێ ژی کار دکەن و ددەتە زانین کو دێ پشتی جەژنێ ھێتە ڤەکرن و گۆت: ٢٥٠ کارمەند دێ ل ڤێ ئۆتێلێ کارکەن کو نیڤا وان خەلکێ دھۆکێ نە و مە ل بەرە بۆ ئایندەی رێژا دھۆکیان ھێشتا زێدەتر ژی لێ بکەین.
شیراتۆن دھۆک ڤەگەریانەکا دیرۆکییە بۆ عیراقێ پشتی ٢٠ سالان و ژ بەر کو دھۆک رۆگەھەکا سەرھلدانا بازرگانیێ و گەشتاریێ یە ل ھەرێما کوردستانێ، ئەڤ ئۆتێلە تشتەکێ زێدە گرنگە بۆ خەلکێ ئەڤرۆ و نڤشێ پاشەرۆژێ کو دێ ئاستەکێ خوەشگوزەرانیا بلند نیشان و پێشکێش کەت.
د گەل ھەبوونا ناڤەندێن گرنگ وەک ھەولێرێ کو دو دەمژمێران ژ دھۆکێ دوورە و نێزیکیا دھۆکێ ژ سنۆرێ تورکیا ئەڤ ئۆتێلە یا ستراتیژیە بۆ دابینکرنا پێدڤیێن گەشتیار و وەغەرکارێن بازرگان و دپلومات و گەرۆکان، ب تایبەت ھەبوونا سەقایەکێ ناڤنجی و باخچێ شیراتۆن یێ بلند و دیمەنێ جوان جھەکێ گەشتیاری دابین دکەت.
ئەڤرۆ: شیراتۆن دھۆک وەک ئێکەم ئۆتێلا پێنج ستێر یا نێڤدەولەتی، چو گرنگی بۆ دھۆکێ ھەیە؟
ئەنتوان جۆیگنانت: د ناڤەرۆکا خوە دا شیراتۆن گرنگیێ ب خەلکی ددەت و خرڤەکرنا خەلکی و پێگڤەگرێدانا وان ل سەرانسەری جیھانێ، ئەڤە ژی ب رێیا تەکەستکرن ل سەر وان تشتێن ھەڤپار د ناڤ کلتۆران دا، ب خێرھاتنەکا گەرم، مەردینیەکا روحی، باوەری ل سەر وێ یەکێ کو ژیان ب ھەڤپارکرنێ خوەشتر دبیت، ئەم مارکەکێ چێدکەین کو ب سادەیی ناھێتە وەرگێران، بەلکو شێوازێ ژیانێ و سەرەدەریا باش و سنۆرێن جۆگرافی دەرباز دکەت.
ئەڤرۆ: چاوان ئۆتێل دبنە شیراتۆن؟
ئەنتوان جۆیگنانت: پرۆسەکا ئاسانە، ھەموو خودان ئۆتێل ل سەرانسەری جیھانێ خوە دگەھیننە کۆمپانیا “ستاروۆد” و داخازا خوە پێشکێش دکەن کو نوونەریا ئێک ژ دەھـ باشترین مارکە دکەت ل جیھانێ، ئەڤە ژی ب ھەمان شێوە، شیراتۆن ب بەردەوامی ئێکەمە د ناڤ بازارێ جیھانێ و ھەلبژارتنەکا ناسیارە بۆ خودان کار و گەشەپێدەران ل بازارێن سەرەتایی و ناڤنجی.
ئەڤرۆ: ژمارا کارمەندان چەندن و چەند ژێ کوردن چەند بیانی نە؟
ئەنتوان جۆیگنانت: نھا مە ٢٥٠ کارمەند ھەنە کو نیڤا وان ژ ناڤخۆنە ئەڤ ژمارە د پاشەرۆژێ دا دێ زێدەبیت.
ئەڤرۆ: بۆچی پرۆژی “ستاروۆد” بریار دا دەستپێکێ ل دھۆکێ ئۆتێلێ ڤەکەت و نە ل ھەولێرێ؟
ئەنتوان جۆیگنانت: خۆش پرسیارە، ژ بەر کو ئاڤاھی ل دھۆکێ یێ ئامادەبوو، نە وەکی ھەولێرێ کو ھێشتا د قۆناغین دەستپێکێ دا بوو و ل ٢٠١٦ ژ نوو دێ ئامادە بیت.
ئەڤرۆ: پلانێن “ستاروۆد” یێن پاشەرۆژێ ل کوردستانێ چنە؟
ئەنتوان جۆیگنانت: کوردستان ژ وان ھەرێمانە یێن وەرارەکا ب لەز ب خوە ڤە دبینیت ل رۆژھەلاتا ناڤین، لەورا “ستاروۆد” ب چار پرۆژێن دی خوە ل ڤێ ھەرێمێ بەرفرەە دکەت ئەو ژی ب ڤەکرنا چار ئۆتێلێن دی ل ھەولێرێ، نھا ئەم ٥٠ ئۆتێلێن دی ل رۆژھەلاتا ناڤین برێڤە دبەین و د چەند سالێن داھاتی دا دێ ٣٠ ئۆتێلێن دی یێن ئاست بلند ژ ئالێ مەڤە ھێنە ڤەکرن.
ئەڤرۆ: شیراتۆن چو بۆ وان مێڤانان ھەیە یێن مشە قەست دکەنێ؟
ئەنتوان جۆیگنانت: شیراتۆن زەنگینترین پرۆگرامێ خەلاتکرنا مێڤانێن خوە ھەیە، ئەو ژی ب رێیا پێشکێشکرنا دانپێدانێ بۆ مێڤانێن سەرکەفتی کو ھەر جھێ بچنێ ئەڤ دانپێدانە مفای بگەھینتێ، ژ وان شەڤێن بێ بەرامبەر یان ھەلبژارتنا ژوورێ ل دووڤ حەزا تە، ھەکە یا بەردەست بیت زێدەباری جھەکێ باش ل ھەر ئۆتێلەکا زنجیرەییا “ستاروۆد” ل جیھانێ.
ئەڤرۆ: کەنگی دێ ب فەرمی ھێتە ڤەکرن؟
ئەنتوان جۆیگنانت: بەروارا دروست ناھێتە زانین، لێ پشتی مەھا رەمەزانێ دێ ھێتە زانین.
ئەڤرۆ: ئۆتێلا ھەوە چو جوداھی د گەل ئۆتێلێن دی ل کوردستانێ ھەیە؟
ئەنتوان جۆیگنانت: شیراتۆن جۆرەکێ کێم وێنەیە ل کوردستانێ، چەندین خزمەتگوزاریێن ھەرە باش د ڤێ پیشەسازیێ دا ھەنە ژ وان ژی یانە و ناڤەندا شیراتۆن، ناڤەندا لەشجوانیێ و کافێتریا و تەخت و پرۆگرامێ خورانێ و رازاندنا خوارنێ و ئالاڤ و تەکنەلوجیا پێشکەفتی و تایبەت د بیاڤێ وەرزشی و ھونەری دا کو یا تایبەتە ب مارکا شیراتۆن.
ئەڤرۆ: خزمەتێن شیراتۆن دھۆک وەک خزمەتێن ئۆتێلێن دی یێن شیراتۆنە؟
بەلێ، ھەموو ل دووڤ ستاندەردا “ستاروۆد”ە کو ل تشتێ تو ل ناڤ ئۆتێلا شیراتۆن ل نیۆیۆرک و پاریس دبینی ل شیراتۆن دھۆک ژی دێ بینی.
ئەڤرۆ: تو د وێ باوەرێ دایی کو سەرەرای رەوشا نەیا خۆجھـ یا ئێمناھیێ دێ مێڤانێن بیانی قەستا ھەوە کەن؟
ئەنتۆنیۆ جۆیگنانت: کوردستان ھەرێمەکە کو ئاکنجیێن وێ پتری پێنج ملیۆن کەسانە و دھۆک ب خوە ژی خودانان پتری ئێک ملیۆن ئاکنجیانە کو چەند ئۆتێل ھەنە، لێ ب تنێ کێمەک ل دووڤ ستاندەردێن جیھانی یە، لەورا ئەڤ ئۆتێلە دێ یا پێشچاڤ بیت، لێ یا ب زەحمەتە خەلکێ ژ دەرڤە بھێتە رازیکرن کو سەرەدانا دھۆکێ بکەن، چونکی ھزرەکا نەرێنی ل سەر رەوشا ئێمناھیا ڤێرە ھەیە کو ئەڤە ژی تەحەدایەکە دڤێت بھێتە گوھۆرین، ب رێیا دەستپێشخەریێن حوکمەتێ و کونگران دڤێت خەلکێ بیانی بھێنە ھاندان بۆ سەرەدانکرنا ڤی باژێری، دڤێت گەشتیاریا ناڤخۆ ل دھۆکێ بھێتە پێشخستن، چونکو پارێزگەھا دھۆکێ دیمەن و جھێن سەرنجراکێش ھەنە و خەلکەکێ مێڤاندۆست ھەیە، لێ ھێشتا وەک پێدڤی ئەڤ ھەبوون و قیمەتە نەھاتینە بکارئینان.
ئەڤرۆ: ھەوە خوارن و کلتۆرێ کوردی بەرچاڤ وەرگرتیە؟
ئەنتوان جۆیگنانت: بێ گۆمان، مە خوارنێن کوردی ل خوارنێن خوە زێدە کرینە ب درێژیا رۆژێ ل ئالیەکی کو ناڤێ شانە دانەیە سەر کو ناڤەکێ کوردی یە و رەگڤەدانا ھنگڤینێ ڤێ دەڤەرێ یە کو ئاستەکێ بلند ھەیە، کەسێن بیانی دەمێ سەرەدانێ دکەن چو پێ نەڤێت حەز دکەن تام کەنە تشتێ گرێدایی ڤێ دەڤەرێ.
ھەروەسا ھەموو ژوورێن کۆمبوونان ل ئۆتێلێ ب ناڤێن باژێرێن کوردستانێ ھاتینە ناڤکرن، وەک ئامێدی و ئاکرێ کویە و لالش و سلێمانی و دو ژ ژوورێن ئاھەنگان ب دھۆک و ھەولێر ھاتینە ناڤکرن. شرینیەکێ خۆمالی ب ناڤێ مان و سەلوا ھاتیە ھەلبژارتن بۆ بیرئانینا مێڤانان ب جھێ ڤێ ئۆتێلێ و چەندەک ژ کارمەندێن مە جلێن کوردی دکەنێ بۆ نیشاندانا کەلتوورێ کوردی.
ئەڤرۆ: دێ شێی بەحسێ پێکھاتا ئۆتێلێ کەی؟
ئەنتوان جۆیگنانت: شیراتۆن دھۆک ٢٠٢ ژوور ھەنە کو ب تەختێن ستایلێ شیراتۆن ھاتینە رایخستن، جھێن بێھنفرە بۆ کاری و ب دیمەنێن بالکێش ژ باژێری، یانە بۆ کەسێن ژ جڤاکێن ھەڤپشک و ھەڤھزر دشێن دەمێ خوە تێدا ببوورینن، ھۆلێن ئینتەرنێتێ و پەیوەندیان، کافێتیریا، ھۆلێن مەساژان و گەرماڤێن تورکی و ساونا، مەلەڤانگەھێن گرتی و ڤەکری. زێدەباری ھۆلێن تەماشەکرنا یاریێن وەرزشی، خوارنێن رۆژھەلاتی و رۆژئاڤایی، ١٤ جھێن کۆمبوونان کو ھەتا ھزار ٧٦٠ مترێن چارگۆشە دچن بەر ب دو ژوورێن ئاھەنگان، جھێن کۆنگرێن مەزن، پێشانگەھان.
ئەڤرۆ: چاوان شیراتۆن دێ یا ب مفا بیت بۆ خەلکێ دھۆکێ؟
ئەنتوان جۆیگنانت: گەشەپێدانا کوردستانێ ب تنێ ژ ئالێ خەلکێ ناڤخوە ڤە پەیدا نابیت، بەلکو وەبەرھێنەرێن بیانی و ناڤخۆ رۆلێ خوە ھەیە، ھەکە دەلیڤا پاشخستنا بازرگانیێ نەبیت ئابوور ژی دێ ب زەحمەت پێشکەڤیت، ئەڤ ئۆتێلە دێ وەبەرھێنەران کێشیتە خوە و ئاسانکاریێ بۆ وان کەسان کەت یێن دڤێت سەرەدانا ڤی وەلاتی بکەن، ھەر چاوا بیت بێی گەشتیاری و کونگرەیان ئەڤ یەک یا ب ساناھی نابیت.
مە چەندین پرۆگرام ھەنە بۆ بانگەشەکرن و ئاگەھدارکرنێ ل سەر ژیانا خەلکێ ڤی باژێری و چەند دەستپێشخەری ھەنە کو روومەت و دەستدرێژی و ئاست بلندیا “ستاروۆد” دھێتە بکارئینان ژ بۆ ئاگەھدارکرنا جیھانێ و کۆمکرنا بێشان، بۆ نموونە بۆ ئاواران و ھاریکاریکرنا دھۆکێ د بیاڤێن ب ڤی جۆری دا، ھەر وەسا مە پلان ھەنە بۆ چوونە ناڤ جڤاکێ دھۆکێ دا و ھاریکاریکرنا خەلکێ وێ کو بھێنە مەشقدان و بدەینە شۆلی و ب دومدرێژی ل گەل مە کار بکەن.
ئەڤرۆ: ناما تە بۆ خەلکێ دھۆکێ چیە؟
ئەنتوان جۆیگنانت: دەستپێکێ سۆپاس بۆ بخێرھاتنا گەرم ژ بۆ مە بیانیان ژ دەمێ ئەم گەھشتی ھەتا نوکە، ھاریکاریا مە کر کو د گەل سەقایێ ڤێرە بگونجین، شیراتۆن یا ل ڤێرە دا بمینیت، لەورا مە دڤێت ھەموو ستافێ خوە بیانی و ناڤخوە پێشبێخین دا کو ل دەمێ ئەم ڤێرە ب جە دھێلین و بەرەڤ پرۆژێن دی ڤە دچین خەلکێ دھۆکێ ب خوە بشێن بەردەوامیێ بدەنە برێڤەبرنا ڤی جھی، ناما مە بۆ خەلکێ دھۆکێ ئەوە کو نھا کو ئەم ل ڤێرەینە و دەرگەھێن مە د ڤەکری نە ئەم وە ھەموویان داخواز دکەین کو بھێن و خوەشیێ ب خزمەتگۆزاریێن شیراتۆن دھۆک وەرگرن، ئەم ل باژێرێ ھەوەینە و ئەڤە باژێرێ ھەوەیە.
