کودەتایا لەشکری دژی بەغدادی سەرنەگرت
ئەڤرۆ نيوز:
ژێدەرێن عیراقی و سوری ئاشکراکرن، ئێکەمین کودەتا دناڤ رێکخستیا داعش یا تیرۆرستی بۆ ژناڤبرنا سەرکردێ وێ ئەبو بەکر ئەلبەغدادی ھاتە ئەنجامدان، لێ سەرنەگرت و ١٣ سەرکردێن وێ کودەتایێ کو پێنچ ژوان سەرکردێن داعشێ خودان پلێن بلندن ھاتنە سەرژێکرن.
ل دووڤ شەفەق نیۆز و ل گۆڕ ژێدەرێن راگەھاندنێ، پڕانیا کەسێن ھاتینە سەرژێکرن ژ وەلاتێن مەغرب و سووریا و یەمەن و کویتێ بوون زێدەباری سەرکردەکێ کورد و ئێکێ شیشانی، سەدەما کودەتایی، پشتی ناکۆکیێن دژوار ل دور ئاراستەیا پرۆسا رێکخستنا کریارێن لەشکری و بەرفرەھکرنا وێ کو ھندەک ئالیێن دن یێن جیھادی یێن بەرھنگار ب خوەڤە بگریت، ب تایبەتی ل سوریا و لیبیا و ئەفغانستان، زێدەباری وان پەقینێن ل وەلاتێ سعودیێ ل ھەیڤا بۆری ھاتینە ئەنجامدان.
ژێدەرێن ئاگەھدار ل باژێرێ مووسل دبێژن: پلانا کودەتایێ ھێرش بوو ل سەر کاروانێ ترومبێلێن بەغدادی ب رێیا بومبێن چاندی ل سەر رێیا وی ل ژێریا باژێرێ رەقە یا سووری و ئەو کودەتا د ناڤبەرا ١٠ تا ١٣ مەھا بۆری ھاتیە ئەنجامدان کو بیڤەلەرزەکا مەزن بوویە و عەرشێ خیلافەتا ئەبو بەکر بەغدادی و رێکخستنا داعشێ ھەژاند.
ئاشکراکرن، بەری بجھئینانا وێ کودەتایێ ب دو رۆژان ھاتە ئاشکراکرن وبەغدادی ھەموو پلاندانەرێن کودەتایێ دەستەسەرکرن و سەرژێکرن و سەرێن وان ھاتنە ھەلاویستن.
دھەمان بیاڤ دا، بازرگانەکێ سۆتەمەنیێ ل سووریێ کو سەرەدەریێ ل گەل داعشێ دکەت، بۆ رۆژناما ئەلعەربی یا نوو گۆت: ل گۆڕ پێزانین وی ھەین بەغدادی نھا جھێ رازیبوونا ھەموو ئالی و سەرکردێن رێکخستنا داعشێ نینە و کاریزما خوە ژدەستدایە، ھەروەسا دلگرانی و نەرازیبوونەکا مەزن ژ ئالیێ سەرکردێن شەری ڤە ژی ھەیە.
دیارکر ژی، ھندەک کەسێن نێزیکی بەغدادی سەدەما سەرژێکرنا وان ھەر ١٣ سەرکردێن داعشێ بۆ کارکرنا وان ل گەل ھەوالگیریا ئەمریکی و سعودیێ ڤەگەراند، بەلێ یا راستی ئەو پرۆسا کودەتایەکا نەچاڤەرێکری بۆ و بەغدادی ژێ قورتال بوو، ھەروەسا بازرگانی ئاماژە دا ھندێ، نێزیکرنا سەرکردێن داعشێ یێن عیراقێ و دوورخستنا سەرکردێن بیانی ژ ئالیێ بەغدادی ڤە ھەموو وان راستیان ئاشکرا دکەت.
سەبارەت ھەبوونا ناکۆکیان ژی بازرگانێ سووری گۆت: مەزنترین و گرنگترین ناکۆکی یا د ناڤبەرا ھەردو ئالیان پەیوەندی ب حلالکرنا خووینا گرۆپێن سونی ل عیراقێ و سووریێ یە و رژدبوونا بەغدادی ل سەر شەرێ دژی کوردان ددەمەکی دا کوردان ھەلویستێ بەرەڤانیکرنێ نەیێ ھێرشکرنێ ھەبوو، ناکۆکیا دی تەکەسکرنا شەری دژی حەشدا شەعبی نەیا لەشکرێ عیراقێ زێدەباری ھەردو پەقینێن ڤێ دووماھیێ ل وەلاتێ سعودیی ھاتینە ئەنجامدان.
ھەر دچارچۆڤێ ناکوکیێن داعشێ دا، ژێدەرەکێ ھۆزێن پارێزگەھا ئەنبار ل رۆژئاڤایا عیراقێ ئاشکراکر، قووناغا پارچەبوون و ژێکڤەبوونا داعشێ بەری دەمێ پێشنیاز کری ھات.
شێخ خەلیل ئەلعلوانی گۆت: زنجیرا سێدارەدان و سەرژێکرنا ناڤخوەیا یا داعشێ دەستپێکر، باسکەک ژ باسکێن داعشێ دبینن بەغدادی نەھەژی سەرکرداتیا داعشێ یە وھندەک ئالی دبێژن مافێ سووریانە ببنە خەلیفە ل جھێ عیراقیان، پشکەکا دی توندڕوەیا بەغدادی ب کوشتنا کەسێن دگرۆپێن دی دا نە بتنێ ل عیراق و سووریێ، بەلکو ل لیبیا و ئەفغانستان و یەمەنێ ژی زێدە چوویە، وەرگرتنا بڕیارێن تاک ڕەوی بیێ شیرەتکاری یا ئەندامێن دەستەیا شەرعی بکەت، بووینە سەدەما دلگرانیا دژی بەغدادی ب رێڤبرنا دەستھەلاتا وی دا کو ھەموو ئالی ل سەر رازی نەبووینە.