چيرۆكێن ئه‌ز دنڤيسم هه‌م نووژه‌نن و هه‌م ژي كه‌له‌پوور و چاندا كوردي ب خوه‌ڤه دگرن
رۆژبين ئوزكان چيرۆكنڤيسه‌كا چه‌له‌نگا كورده، ژ باكوورێ كوردستانێ ژ باژێرێ مووشێ گوندێ رنداليا ناڤچه‌يا گمگمێ يه.ژ سالا 2005ێ وه‌ره ده‌ست ب كارێ نڤيسينێ كريه، به‌رهه‌مێن خوه هه‌تا نوكه د كۆڤارێن (نووبهار، نووپه‌لدا، پێنگاڤ، په‌يام هه‌فره‌نگ)دا به‌لاڤكرينه.
هه‌روه‌سا به‌رهه‌ڤكاريا دۆسێيا ئه‌ده‌بيا زارۆكان و يا ژنا كورد كريه و هه‌ردو دۆسێ ژي د كۆڤارا نووبهارێ دا وه‌شاندينه. پرتووكا وێ (زارۆكێن حه‌سكفێ) ژ ئاليێ زانكۆيا مێردينێ ئارتوكليێ پشكا كوردۆلۆژيێ ڤه ژ بۆي ده‌رسا ئه‌ده‌بياتا زارۆيان وه‌كو پرتووكه‌كا هاركار هاتيه پێشنييازكرن.
ل دۆر ئه‌گه‌رێن هلبژارتا چيرۆك ژ ناڤ ره‌گه‌زێن دي يێن ئه‌ده‌بي، و ژ كه‌نگي كو ئه‌و چيرۆكێ دنڤيسي، رۆژبينێ گۆت: من ژ سالا 2005ێ وه‌ره ده‌ست ب نڤيسينا چيرۆكێ كريه. ژ به‌ر كۆ ئه‌ز ئه‌ده‌بياتا زارۆكان گرنگ دبينم، له‌ورا من ده‌ستپێكێ ب چيرۆكێن زارۆكان ده‌ست ب نڤيسينێ كر.
سه‌باره‌ت نڤيسينا جۆرێ چيرۆكێ كا پتر يا كورت دنڤيست يان يا درێژ، رۆژبين خانێ گۆت: ئه‌ز پتر كورته چيرۆك دنڤيسم.
ژ بۆنا بابه‌تێن چيرۆكێن خوه ب گشتي كا چ واران ب خوه‌ڤه دگرن، چيرۆكنڤيسێ گۆت: ئه‌ز هه‌ري زێده بۆ زارۆيان چيرۆكان دنڤيسم، لێ يه‌ك جاران بۆ هنده‌ك كۆڤارێن كوردي بۆ مه‌زنان ژي چيرۆكان دنڤيسم.
د ناڤ چيرۆكێن خوه‌دا كا وێ چ گرنگي دايه ئاريشێن ژنێ و جڤاكێ كوردي؟ رۆژبين ئوزكان دبێژت: چيرۆكێن كۆ ئه‌ز بۆ مه‌زنان دنڤيسم ب گشتي ل سه‌ر پرسگرێيێن ژنانن، پرسگرێيێن وان يێن سۆسيۆلۆژي و جڤاكي.
ل دۆر وه‌رگرتنا مفا ژ كه‌لتوور و كه‌له‌پوورێ كوردي و بكار ئينان د ناڤ به‌رهه‌مين خوه‌دا رۆژبين دبێژت:
د هه‌موو چيرۆكێن من دا ژي چ يێن زارۆكان، چ يێن مه‌زنان، من جه دايه چاند و كه‌له‌پوورێ كوردي، لێ تێدا مۆتفێن نووژه‌ن ژي يێن هه‌ين. ئانكو هه‌م نووژه‌نن، هه‌م ژي كه‌لپوور و چاندا كوردي ژي د ناڤ خوه دا د حه‌وينن. له‌ورا دڤێت زارۆيێن كوردان چاندا كوردي باش بزانن. مخابن ئيرۆ زارۆيێن ل كوردستانا باكور گه‌له‌ك زێده ل بن باندۆرا چاندا توركي دا دمينن. له‌ورا خوه‌دي ده‌ركه‌تن ل چاند و كه‌له‌پوورێ كوردي بۆ من گه‌له‌ك گرنگه.
سه‌باره‌ت كا ئه‌و ژ بلي چيرۆكێ چ جۆرێن دي يێن ئه‌ده‌بي دنڤيسي؟ رۆژبين ئۆزكان دبێژت: ژ به‌ر كو هنده‌ك كه‌س من ته‌نێ وه‌ك چيرۆكنڤيس دبينن، لێ راستي ئه‌ز ته‌نێ چيرۆك نانڤيسم. ژ بلي چيرۆكان خه‌باتێن من يێن ل سه‌ر ژنان هه‌نه. من د كۆڤارا نووبهارێ دا بۆ هه‌ژمارا 122 دۆسێيه‌ك بۆ ژنا كورد ئاماده كر. مه د وێ دۆسێيێ دا من ژ گه‌له‌ك هێلان ڤه بابه‌تێ ژنا كورد به‌حس كريه، من پرتووكه‌ك ب ناڤێ (ستێركێن به‌هه‌شتێ) يا هه‌ي، د وێ پرتووكێ دا ژي من ژيانا ئاسيا، هاجه‌ر، مه‌ريه‌م، خه‌ديجه، فاتمه و عايشايێ نڤيسينه.. هه‌ر وه‌سا نڤيسين و لێكۆلينێن من يێن ل سه‌ر ژنا كورد د به‌رده‌وامن.
ئارمانجا من يا هه‌ري مه‌زن ئه‌وه كۆ ئه‌ز ژيانا دايكا كورد، دايكا سه‌رۆكێ رێزدار مه‌سعود بارزاني حه‌مايل بارزاني بنڤيسم. لێ مخابن ده‌ستێ من دا ده‌ربارێ ژيانا ڤێ خانما پيرۆز د چو ئاگاهي نينن. ئه‌ز ب رێيا رۆژناما هه‌وه بانگێ مالباتا بارزاني دكم د وي واري دا كو ژ من را ببن هاركار ئينشه‌لا ئه‌ز دێ وێ پرتووكێ بنڤيسم.
