عومەر کۆچەر: لایەنێن سیاسی ل سەر سازانێ دێ رێککەڤن
ئه‌ڤرۆ نيوز:
ئەندامەکێ پەرلەمانێ کوردستانێ ژ لیستا ئێکگرتوو ئیسلامی کوردستان بۆ رۆژناما ئەڤرۆ ئاشکراکر کو ل دووڤ زانیاریێن ھەین بەری ١٩-٨ لایەنێن سیاسی دێ گەھنە رێککەفتنێ و دێ ل سەر سازانا نیشتیمانی رێککەڤن.
عومەر کوچەر ئەندامێ پەرلەمانێ کوردستانێ ژ لیستا ئێکگرتوو بۆ ئەڤرۆ گۆت” ل دووڤ پێزانینن من، لایەنێن سیاسی ل کوردستانێ دێ گەھنە رێککەفتنەکێ و دێ سازان ھەموویان کوم ڤەکەت”.
گۆت ژی”ھەر ناکۆکیەکا پەیدا بیت لاوازیەکێ دناڤ مللەتێ کورد دا دروست دکەت، ھەر رێکەفتن و ئێکگرتنەکا ھەبیت دوژمنێ مە بێ ھڤی دبیت و نەشێت ھەر تشتەکی ل سەر ڤی مللەتی ب سەپینیت، ئەڤرۆ ژ ھەموو جاران پێدڤی ب وێ چەند کو رێککەفتن و ئێکگرتن ھەبیت و ھەکە ل سەر مێزا دانوستاندنان نەگەھنە چو ئەنجامان، بۆ خاترا شەھیدێن شەرێ دژی ڤی دوژمنێ درندە یێ داعش ئەڤی بابەتی پاش بێخن”.
عومەر کوچەری ئاماژە دا کو ئەوا نوکە ل کوردستانێ دھێتە روودان، پیلانەکە ل سەر مللەتێ کورد ، دوژمنێن ڤی مللەتی دزورن، داعش یا ھێرشان دکەت و دیسان تورکیا یا گوندێن کوردستانێ توپباران دکەت، ھەکە ئەم نە گەھینە چو رێککەفتنا و ھەر ئێک ب خوە بیت، نوزانم دێ چەوا و ب چ رەنگ چو پاشەرۆژ بۆ مللەتێ کورد دانین، ئەڤە بیست سالە حوکمرانیێ دکەین و ھێشتا مە چاڤ ل وەلاتێن وەک مالیزیا کو دماوێ بیست سالان دا شیان خوە بگەھینە وەلاتێن پێشکەفتی، بەرامبەر ئەم خودانێن ڤێ پەترۆلێ و ڤێ ئاخا پیرۆز و ڤێ چاندنێ و ھێشتا دنالین بۆ مووچەی و کاودانێن ئابووری باشتر لێ بھێن و مە سیستەمەکێ جوان وب رێکوپێک نینە”.
عومەر کوچەر گۆت” بابەتەکێ ب ڤی رەنگی ب بریارەکا لایەنەکی ناھێتەدان و دڤێت لایەنێن سەرەکی ل کوردستانێ بگەھنە بریارەکێ و رێککەفتنەکێ، چارە ئەوە رێککەفتن بھێتەکرن، کار بکەن وەلات نەھێتە پارچەکرن، ئەڤە چەندین سالە ئەڤ شەمالک ھاتیە ھەلکرن و چەوا ب دەستێن خوە ب ڤەمرینین”.