یەکگرتوو: ئەڤرۆ دێ بڕیارێ دەین
ئه‌ڤرۆ نيوز:
سەرۆکایەتیا پەرلەمانێ کوردستان بڕیاردا، سوباھی رۆژا چار شەمبی دەمژمێر ١٠ی سپێدێ، روونشتنا نە ئاسایی یا پەرلەمانێ کوردستانێ بھێتە کرن ژبۆ ی ڤەخواندنا دویێ ل سەر راستڤەکرنا قانوونا سەرۆکایەتیا ھەرێما کوردستانێ، پەرلەمانتارەکێ پارتی ئاشکراکر، ئەم پشکداریێ د وێ روونشتنێ دا ناکەین و ھەر دەمێ روونشتنێ سەرگرت و بێی پارتی قانوون ھاتە پەسەندکرن، دێ مە ھەلویستێ خوە ھەبیت.
دکتۆر رێواز فائیق، پەرلەمانتارا فڕاکسیۆنا ئێکەتیێ ل پەرلەمانێ کوردستانێ بۆ رۆژناما ئەڤرۆ گۆت” مە وەکی فڕاکسیۆنا ئێکەتیێ بڕیارا دووماھیێ یا دای و ھەر ھەژدە پەرلەمانتارێن ئێکەتیێ دێ پشکداریێ د روونشتنا سوباھی یا پەرلەمانی کەن و ئەم درژدین ل سەر ڤەخواندنا دویێ بۆ راستڤەکرنا قانوونا سەرۆکایەتیا ھەرێما کوردستانێ، ھەردو فڕاکسیۆنێن گۆڕان و کۆمەل ژی یا خوە ئێکلاکری و دێ پشکداریێ کەن، بەلێ ھێشتا فڕاکسیۆنا یەکگرتووی خوە ئێکلا نەکریە بۆ پشکداریێ د روونشتنێ دا”.
ل دۆر جھێ ئەنجامدانا روونشتنێ، رێواسێ دیارکر” دێ ل ئاڤاھیێ پەرلەمانی بیت و چو مەترسیەکا وەسا ل سەر پەرلەمانی نینە بۆ ڤەگوھاستنا جھێ روونشتنێ، بەلێ ھەکە ھەر مەترسیەک ھاتە پێش، ل دووڤ پەیڕەوێ ناڤخوەیێ پەرلەمانی، دێ روونشتن بۆ جھەکێ دی ھێتە ڤەگوھاستن”.
مەردان خدر، ئەندامێ فڕاکسیۆنا پارتی دیموکراتی کوردستان بۆ رۆژناما ئەڤرۆ گۆت” پرسا سەرۆکایەتیا ھەرێمێ ب وێ روونشتنا پەرلەمانی ناھێتە چارەکرن و بڕیارا گرێدانا روونشتنێ ژی ب بڕیارەکا دژی سازانێ دزانین، روونشتنا سوباھی دێ پرسا سەرۆکایەتیا ھەرێمێ ئالۆزترکەت و لیستا پارتی پشکداریێ د د وێ روونشتنا پەرلەمانی دا ناکەت، ھیڤدارین فڕاکسیۆنێن دی ژی ھەست ب خرابیا رەوشێ بکەن و ب دیتنامە روونشتن یا سەرکەفتی نابیت و نیسابا قانوونی تمام نابیت، ھەکە بھێت و نیسابا قانوونی ژی تمام ببیت و پەرلەمان قانوونێ بێی پارتی راستڤەکەت، وی دەمی دێ مە ھەلویستێ خوە ھەبیت وەکی فڕاکسیۆنا پارتی، ھەر بڕیارەکا دڤێ رەوشێ دا بھێتە دان، ئەڤە دێ کاریگەری ل سەر رەوشێ ھەبیت و دێ پتر رەوشا نوکە یا ھەرێما کوردستانێ ئالۆزبیت”.
سوھراب رێکانی، ئەندامێ پەرلەمانێ کوردستانێ ل سەر لیستا ئێکگرتووی ئیسلامی ل دۆر پشکداریا پەرلەمانتارێن ئێکگرتووی بۆ ئەڤرۆ گوت” راستە ئەم نوونەرێن خەلکی نە وەکی فڕاکسیۆنا ئێکگرتوو، بەلێ د ھەمان دەمدا ئەم نوونەرێن ئێکگرتوویا ئیسلامی نە، ئەم دگەل مەکتەبا سیاسی یا ئێکگرتووی دا کۆمبووینە و مە بڕیاردایە دەمێ ژڤانێ روونشتنا پەرلەمانی ھاتە دیارکرن، دێ فڕاکسیۆنا ئێکگرتووی ل گەل سەرکردایەتی کۆمبیت و بڕیارا دووماھیێ ھێتە دان، ژ بەر کو پەرلەمانی چارشەمبیێ وەکو ژڤانێ روونشتنا نەئاسایی دیارکریە، ئەم ژی دێ ئەڤرۆ ل گەل سەرکردایەتیا خوە کۆمبین، ب تایبەتی بزاڤ یێ دھێنەکرن کۆمبوونا پێنج قولی بھێتەکرن، بۆچوونێن جۆدا یێن ھەین ل دۆر پشکداریا پەرلەمانتارێن ئێکگرتووی، ھندەک دبێژن ئەم ھەموو پشکداربین و ھندەک ل گەل وێ چەندێ نە ئەم ھەموو پشکدار نەبین، ھندەک ژی دخوازن پەرلەمانتارێن ئێکگرتووی دئازادبن د پشکداریێ د وێ روونشتنێ دا، دووماھیێ دێ ھەر بڕیارا حزبێ بجھئینین، ژ بەر کو ھەموو کارێ مە پێکڤەبوویە و ئەڤرۆ ئێڤاری دێ ھەلویستێ مە یێ دووماھیێ دیاربیت.
