ڤێ حەفتیێ ئەنجامێن ئەزموونێن خولا دویێ دێ ھێنە ڕاگەھاندن
ئەڤرۆ نيوز:
پەیڤدارێ وەزارەتا پەروەردێ ل حوکمەتا ھەرێما کوردستانێ دیار کر کو سو بەھی یان دوسبە ئەنجامێن ئەزموونێن خولا دویێ یێن پۆلا ١٢ ئامادەیی و نەھێ بنەرەتی دێ ھێنە ڕاگەھاندن و گۆت: “بڕیارا ئێکرەنگیا جلکێن قوتابیان نەھاتیە ھەلوەشاندن”.
فاتح مەولەوی زادە، پەیڤدارێ وەزارەتا پەروەردێ ل حوکمەتا ھەرێما کوردستانێ ئاشکرا کر، بەرھەڤیێن تمام ھاتینە کرن ژ بۆ ھندێ ب زووترین دەم ئەنجامێن ئەزموونێن خولا دویێ یێن گشتی و نشتیمانی بھێنە ڕاگەھاندن و SNN گۆت: “ھەتا نوکە چ رۆژ ب دروستی نەھاتینە دیار کرن بۆ ڕاگەھاندنا ئەنجامان، لێ ئەم قوتابیان پشتراست دکەین کو ل ناڤەراستا ڤێ حەفتیێ دێ ئەنجامان ڕاگەھینین”.
خویا ژی کر، ئەڤ سالە ١٠٣ ھزار و ٧٢٧ قوتابیان ژ پشکا زانستی و ٦٨ ھزار و ٦٤٥ قوتابیا ژ پشکا وێژەیی، نێزیکی ٧٠٠ قوتابیێن پیشەیی و ١٢٢ ھزار و ٨٦٦ قوتابیێن بنەرەتی ل سەرانسەری ھەرێما کوردستانێ پشکداری د ئەزموونێن خولا دویێ دا کربوون.
ناڤھاتی ئاماژە ب وێ چەندێ ژی کر، بڕیارا ئێکرەنگیا جلکێن قوتابیان بۆ سالا بھێت یا خواندنێ نەھاتیە ھەلوەشاندن، لێ ژ بەر رەوشا ئەڤ سالە و قەیرانا دارایی، نابیت رێڤەبەرێن قوتابخانان گڤاشتنان بێخنە سەر وان قوتابیان یێن بارێ وان یێ ئابووری یێ لاواز بیت و گۆت: “ئەو گۆتگۆتکێن د بێژن بڕیارا ل بەرخوەکرنا ئێکرەنگیا جلکان یا ھاتیە ھەلوەشاندن راست نینە و ئەم رازی نابین بھێتە ھەلوەشاندن”.
وەکو دیار رۆژا سێ شەمبی ١٥-٩-٢٠١٥ رۆژا ئێکێ یا دەستپێکرنا سالا نوو یا خواندنێ یە ل سەرانسەری ھەرێما کوردستانێ.
