چەکدارێن حەشد شەعبی ژ جیھادێ بۆ ئورۆپا د ڕەڤن
ئەڤرۆ نيوز:
میلیشیێن حەشد شەعبی یێن شیعی ئەوێن ب فەتوایەکا مەرجەعیەتا ئایینی یا شیعی ھاتینە پێکئینان و ل گەل لەشکرێ عیراقێ شەڕێ داعشێ دکەن، بەر ب پەرت و بەلاڤبوونێ ڤە دچن ژ ئەگەرێ چوونا ھژمارەکا مەزن یا چەکدارێن وان میلیشیان بۆ ئورۆپا،
چەندین چاڤدێر ژی ئەگەرێ مشەختبوونا چەکدارێن حەشد شەعبی بۆ ھەبوونا ھژمارەکا مەزن یا کوشتی و بەرزەبوویان دناڤ رێزێن واندا زێدەباری قەیرانا دارایی ل عیراقێ و گیرۆبوونا مووچێن وان وسەرپێچیێن مەزن یێن وان میلیشان دژی وەلاتیێن سڤیل ئەنجامداین.
سایتێ (الخلیج اونلاین) بەلاڤکریە کو ل دووڤ بەیاننامەکا رێکخراوا (السلام) یا مافێن مرۆڤی د مەھا تەباخا ٢٠١٥ێ، نێزیکی ٣٠٠ چەکدارێن حەشد شەعبی یێن ب بەلگەنامێن ساختە چووینە ئورۆپا کو تێدا جھێ ئاکنجیبوونا خوە کریە مووسل یان ئەنبار.
سەعەد ئەعزەمی سەرۆکێ ھەڤالبەندا مافپەروەریا نێڤدەولەتی ژبۆ عیراقێ ل دۆر ئەگەرێ مشەختبوونا ئەندامێن حەشد شەعبی بۆ دەرڤەی عیراقێ، دبێژیت” ھژمارەکا مەزن ژ چەکدارێن حەشد شەعبی د شەڕێ دژی داعشێ یێن ھاتینە کوشتن و قەیرانا دارایی ل عیراقێ، ئەگەرێن سەرەکی نە یێن پەرت و بەلاڤبوونا میلیشیێن حەشد شەعبی و بەلگە ژی ل سەر ڤێَ چەندێ داخوازایێن ڤێ دووماھیێ یێن مەرجەعێن سیاسی و ئایینی و جڤاکی یێن شیعی بۆ داخوازکرنا زارۆیان و قوتابیان بۆ ناڤ رێزێن حەشد شەعبی”.
