ئه‌م ژ مرۆڤاتیێ هاتینه بشاڤتن
كا مرۆڤاتی د كیش قونجالكێ دا مایه؟ كا ئه‌و دلێن دلۆڤان كیڤه به‌رزه‌بوون، چاوا دل د سینگان دا بوونه به‌رێن ره‌ق، مزگه‌فت ل رۆژێن ئه‌ینی ژ نڤێژكه‌ران د داگرتینه و دل ژ دلۆڤانیێ د ڤالانه، مانه دلێن بێ دلۆڤانی و نڤێژ ل جهه‌كێ كۆم نابن وه‌كو مه‌لا و دیندار دبێژن؟ ئه‌م ژ مرۆڤاتیێ هاتینه شویشتن و چاڤێ مه یێ ل “كافران” دلۆڤانیێ ب مه ببه‌ن، ئه‌و ژی نه ژ به‌ر چاڤێن مه یێن ره‌ش و به‌له‌ك، به‌لكو ژ به‌ر به‌رژه‌وه‌ندێن دونیایێ، چاوا وه‌سا زوی مرۆڤاتی و دلۆڤانی ژ ده‌ردۆرێن مه ره‌ڤین؟ ئه‌م هه‌ر سال سالڤه‌گه‌را شۆره‌شان ساخ دكه‌ین یێن مه ژ بۆ مرۆڤاتیێ كرین، مه چه‌ند مرۆڤاتی ژ وان شۆره‌شان وه‌رگرت؟ چاوا وه‌سا زوو ژ بیرا مه چوو كو كه‌له‌خێن مه ببوونه خوارنا دڕندنان و كێز و مشك و ماران، هه‌تا ئه‌ڤرۆ د ده‌ریایێن دونیایێ ژی دا ئه‌م بووینه شیڤا ماسیان! هه‌می ده‌مان ده‌ستێن مه به‌ر ب ئاسمانی دبلندن و نه‌وازشان بۆ خودێ دبه‌ین كو دلۆڤانیێ ب مه ببه‌ت، مانه خودێ گۆتیه ئه‌ز چو ملله‌تان ناگوهۆرم هه‌تا ئه‌و ب خوه خوه دگوهۆرن؟ ما هیڤیه‌ك د ملله‌ته‌كێ چڤێل دا هه‌یه كو خوه ل سه‌ر مافێ خوه بێده‌نگ بكه‌ت؟ ملله‌ته‌كێ به‌تران بووی كو نوكه ببیته دووڤه‌لانكێ حزبا ئیبلیسی، ئێك ب ناڤێ پێشكه‌فتنێ و سه‌رده‌میێ عاقلی بفرۆشته مه و هنده‌ك ب ناڤێ خودێ و پێغه‌مبه‌ران خوه ل به‌ر دلێن مه شرین بكه‌ن و ئێك ب ناڤێ وه‌لاتپارێزیێ ل سه‌ر به‌رژه‌وه‌ندێن خوه یێ رژد بیت. سیاسیێن فاشل دبنه ئه‌گه‌رێ مرنا دلۆڤانیێ، هوین چه‌ند نێزیكی ره‌وشا خه‌لكینه و ژ رۆندكێن دایكان و هه‌ڤژینان ل كیڤه نه یێن لاو و هه‌ڤژینێن خوه كرینه قوربانی ڤێ ئاخێ؟ هوین چه‌ند هزرا وان زارۆیان دكه‌ن یێن ل سنۆرێن وه‌لاتێن كافران بێ نان و ئاڤ ماین؟ و چه‌ند به‌حسێ وان كه‌سان دكه‌ن یێن ل به‌ر گه‌رما هاڤینێ دنڤن؟ بكه‌نه كه‌نی ئه‌زبه‌نی ژ دل بكه‌نه كه‌نی، هه‌وه به‌فر ل به‌ر مه یا كریه ته‌نی، مافێ ته‌یه چونكو مه ب خوه د ده‌ستێن هه‌وه دا خوه كریه كووله و ئه‌م د رازینه! مرۆڤاتی كیڤه چوو؟ دلۆڤانی كیڤه چوو یا خودایێ مه‌زن دایه مری و زیندیان، دا هنده‌ك مرۆڤێن ژ هه‌ستا مرۆڤان دڤالا ده‌ستهه‌لاتێ ل به‌ندێن خودێ بكه‌ن؟ ما چ جوداهی د ناڤبه‌را هه‌وه و وی دا هه‌یه یێ ب ناڤێ خودێ سه‌ران دبڕیت، كه‌نگی ریهێن درێژ بووینه پاسپۆرت بۆ چوونا به‌هشتێ؟ كه‌نگی شڤانیا په‌زی بوویه پیڤه‌رێ وه‌لاتپارێزیێ؟ چاوا پاره بوویه پیڤه‌رێ ماقوولیێ و تێگه‌هشتنێ و یێ هه‌ژار ژی بیت گۆتنێن وی ب پیڤازه‌كێ نه‌چن، ئانكو وه‌كو مه‌زنان گۆتی “هه‌یی به كوڕێ كه‌ری به” به‌س فه‌ره بێژین “هه‌یی به كه‌ر كوڕێ كه‌ری به”. كا دلۆڤانی و كا مرۆڤاتی؟ ل بیرا منه ده‌مێ مه بۆ هه‌له‌بجه و ئه‌نفالان رۆندك د باراندن و هنده‌كان بۆ جیهادا ئه‌ڤغانستانێ دكره هاوار، د ناڤ وێ بێده‌نگیا جڤاكێ نیڤده‌وله‌تی دا ل سه‌ر سته‌ما ل مه دهاته كرن ب تنێ مرۆڤاتیێ ئه‌م د لڤلڤاندین و ئه‌م د گه‌هاندینه ئێك بێی كارتێكرنا هزر و بۆچوونێن به‌رته‌نگێن حزبایه‌تیێ و ره‌نگ و نفش و جوداهیێن ئایینی. ل بیرا مه هه‌میانه ده‌مێ هه‌ولێرا قه‌لا و مناره ب هه‌می شیانێن خوه و ل سه‌ر دفنا ستمه‌كاران و بێی جوداهی برایه‌تیا مه سه‌لماندی، بێی حزباتی و بێی هژمارا كورسیكێن په‌رله‌مانی هه‌می ئێك خه‌م و ئێك كۆڤان بوون، چونكو نوكه ژی ده‌مێ مه دكوژن پرسیارا حزبا و هژمارا كورسیكێن په‌رله‌مانی ژ مه ناكه‌ن. ل وی ده‌مێ هه‌می ملله‌ت ل بن سیبه‌را ئالایێ مرۆڤاتیێ كۆمڤه دبوو و بۆچوونیێن حزبایه‌تی نه‌بوون، به‌لێ سته‌ما ل مه د هاته كرن بۆ پالده‌ره‌كێ ب هێز كو ب هێزتر شۆره‌شا خوه ده‌ستپێبكه‌ینه ڤه و مه خوه ئازاد كر. به‌لێ نوكه جاره‌كا دی دیمه‌نێن ترسێ و برسێ و دیتنا خوینێ ل هه‌می جهان دهێنه دیتن و بووینه دیمه‌نێن رۆژانه و ئه‌م هیبووینێ، یا ژ هه‌میان ب ترستر نه ئه‌وه كو هنده‌ك خوه ل سه‌ر زۆرداریان بێده‌نگ دكه‌ن و هنده‌ك پیرۆزباهیان لێدكه‌ن، به‌لێ ترسا مه‌زنتر ئه‌وه ئه‌م د ناڤخوه‌دا بووینه پارچه پارچه و هه‌ر ئێك یێ ل به‌رژه‌وه‌ندێن خوه ل سه‌ر حسابا خوینا شه‌هیدان و نانێ ملله‌تێ دپارێزیت. ئاڤروویێن مه د ژیانێ هاتنه گوهارتن، هه‌ڤبه‌ندیا مه ل گه‌ل ده‌وروبه‌رێن مه یا بوویه كومه‌كا زاراڤێن چێكری، مرۆڤاتیا یا ل بیابانا ئه‌زئه‌زیێ به‌رزه‌بووی و هه‌می رووبه‌رێن نه‌خشێ ژیانا مه یێ داپوشی. كا مرۆڤاتی و دلۆڤانی؟ هه‌می د هه‌ڤڕكیێ دا بۆ بده‌ستڤه‌ئینانا كه‌ره‌ستان دمژوولن، هه‌می حه‌ز دكه‌ن ب له‌زتر بگه‌هنه پێشیێ، ل وی ده‌می كو مه هزر دكر ئه‌م خودان ده‌ستكه‌فتین و مه جهێن پێشیێ ل رێزێن ژیانێ بده‌ستڤه‌ئیناینه، مه گرنگترین تشت د ژیانێ دا ژ ده‌ست دا، ژ نشكه‌كێ ڤه گه‌له‌ك تشت د ناخێ مه‌دا وه‌كو خوه نه‌مان، ئه‌و رامانێن جوانێن مه د سینگێ خوه دا هلگرتین ئاڤروویێن خوه به‌رزه‌كرن، مه شیانێن ڤه‌ژاندنا ژیانێ ژ ده‌ستدان، مه شیانێن هزركرنێ و هیڤی و داهێنانان ونداكرن. ل ڤی وه‌لاتێ هندی هژمارا مرۆڤێن ده‌وله‌ته‌كێ شه‌هید داین، نوكه هنده‌ك كه‌س تێدا دژین و هه‌ناسان دهلكێشن و زارۆیان دئینن وه‌كو هه‌می ئافراندیێن دی، به‌لێ وان ناخێن خوه ژ گه‌له‌ك رامانان ڤالا كرینه، ل ڤی وه‌لاتێ لاندكا ژیانێ، هنده‌ك تێدا دژین كو د ژیانێ ناگه‌هن، ژیان ل نك وان ب تنێ كومه‌كا به‌رژه‌وه‌ند و ماددانه، رۆژێن وان ژ هه‌می هه‌ستێن راست و دروست د ڤالانه. هه‌سته‌كا گه‌له‌ك كرێته مرۆڤ د ژیانێ دا یێ مری بیت و سینگێ وی ژ مرۆڤاتیێ و دلۆڤانیێ یێ ڤالا بیت، ژیان نه ئه‌وه تو هه‌ناسان بهلكێشی، به‌لكو ژیان هه‌ستكرنه ب وژدانێ، ل ڤی وه‌لاتێ بهوسته‌ك ژ ئاخا وی نه‌مای خوینا گه‌نجه‌كێ ل نه‌هاتبیته رێتن، هنده‌ك تێدا دژین چو هه‌ڤبه‌ندیا وان ب هه‌ستان نه‌مایه، ب تنێ یێن بووینه هژماره‌ك وه‌كو هه‌می هژمارێن دی یێن د ژیانێ دا هه‌ین، ئه‌ڤ هژماره ب تنێ ب به‌رژه‌وندێن كه‌سوكیێن ڤالا ژ هه‌ستان دلڤن، ب تنێ هنده‌ك جه‌سته نه ژ مرۆڤاتیێ و ژ ژیانێ د ڤالا نه. تشته‌كێ سه‌یره كه‌سه‌ك قه‌ستا مالا خودێ بكه‌ت و رۆژیان بگریت و نڤێژان بكه‌ت و بالیفكا وی یا تژی هویرده بیت و جیرانێ وی خوارنا شه‌ڤێ نه‌بیت بده‌ته زارۆیێن خوه، تشته‌كێ سه‌یره كه‌سه‌ك كومه‌كا ده‌فته‌رێن دۆلاری بده‌ته ب تابلۆیه‌كا ترۆمبێلێ بۆ مه‌تحه و په‌سنا و نیڤه‌كا ملله‌تێ وی د چاڤ زل بن ل هیڤیا مووچه‌ی. هه‌كه ئه‌م وێ مرۆڤاتیا مایه د ناخێ مه‌دا نه ڤه‌گه‌رینین، بازنێ گرفتاریا ئه‌م تێدا دێ فره‌هتر لێهێت، نه‌بوونا دادوه‌ریێ و په‌راوێزخستنا به‌رژه‌وه‌ندێن خه‌لكێ هه‌ژار و بێ ده‌ستهه‌لات و نه‌بوونا چاكسازیان دێ دیمه‌نی ئالۆزتر لێكه‌ت. پێدڤیه ئه‌م وژدان و مرۆڤاتیا خوه ڤه‌گه‌رینین و زرۆیێ ل سه‌ر كه‌سێ قه‌بوول نه‌كه‌ین، پێدڤیه خوه ژ دوبه‌ره‌كیێن حزبایه‌تی و ئایینی و ده‌ڤه‌رگه‌ریێ دوور بكه‌ین ئه‌وا هێدی هێدی ملله‌تی دكوژیت. ئه‌ی سه‌ركرده، ئه‌ی حزب، ئه‌ی په‌رله‌مانتار، ئه‌ی وه‌زیر، ئه‌ی ئه‌وێن مه هوین ل سه‌ر خوه سه‌پاندین، كا پیچه‌ك د ناخێ خوه‌دا بگه‌رن به‌لكو هوین مرۆڤاتیا خوه ببینن، ل وێنێ خوه یێ راست بگه‌رن یێ هوین ل سه‌ر هاتینه ئافراندن، ل رامانا هه‌بوونا خوه بگه‌رن، ل وێ په‌یڤێ بگه‌رن یا هه‌وه ژ دلێ خوه ده‌رێخستی و هه‌وه ب ره‌فتارێن خوه رامانا وێ كوشتی، تو چه‌ندێ كرێتی مرۆڤ ده‌مێ تو مرۆڤاتیێ ژ دلێ خوه رادكه‌ی و هۆڤاتیێ ل جهێ وێ بدانی.
