دهۆك يا بوويه مالا سينه‌ماكارێن كورد
ئه‌ڤرۆ نيوز:
رۆژانێن فلمە فیستەڤالا دھۆکێ یا سیێ یا نێڤ دەولەتی د بەردەوامن، وھژمارەکا زۆر یا مێھڤانان و رۆژنامەڤانان چاڤدێر و بینەرێن فلمانە، بۆ دیتنا بۆ چوون بینەر و سینەماکاران و بینەرێن فیستەڤالێ، بەرپەرێ ھونەری چەندین بۆچوون وەرگرتینە.
شەیما مەولایی، ئەکتەرەکا رۆژھەلاتێ کوردستانێ یە و مێھڤانا فلمە فیستەڤالا دھۆک یا نێڤ دەولەتی، قارەما فلمێ (بیرەوەریێن سەر کەڤری) یە، یێ ژ دەرھێنانا (شەوکەت ئەمین کوکی) گۆت: پشتی نیشادانا فلمێ (بیرەوەریێن سەر کەڤری) کو من رۆلەکێ سەرەکی تێدا ھەبوو ل ھولێ گەلەک کچێن باشوور ھاتنە دەف من و پشتی دەست خوەشیێ گۆتن مە ژی پێخوشە کارێ ئەکتەریێ و زارڤەکرنێ د فلمێن سینەمایی دا بکەین و پێشوازیەکا مەزن خەلکێ دھۆکێ ل مە کرن.
ھەمان ئەکتەرا رۆژھەلاتا کوردستانێ، ئەنجامدانا فلمە فیستەڤالا دھۆکێ یا نێڤ دەولەتی ب گرنگی زانی گۆت: ئەڤە جھەکە بۆ کومکرنا فلمسازێن کورد و تێکەلی ل گەل وەلاتێن بیانی و چێکرنا پرێن رەوشەنبیری و ھونەری و کلتۆری و دبینم کارەکێ باش بوویە، فلمە فیستەڤالا دھۆک ئێکە ژ باشترین فلمە فیستەڤالێن کوردەواری و حەز دکەین بەردەوام بیت و کار بکەت بۆ پێشڤەبرنێ سال بۆ سالێ.
ئەحمەد مشەختی، سەرپەرشتێ ھۆلا کونگران ل فلمە فیستەڤالا دھۆک یا نێڤ دەولەتی ئاشکراکر کو رۆژانە ھەتا 500 تێکێن ھاتنا ژۆر بۆ پێش فلمان دھێنە فرۆتن، و گۆت: بەرھەڤبوونا وەلاتیان بۆ دیتنا فلمان گەلەک یا باشە، گلەیا وەلاتیان ئەوە بۆچی ھولێن تایبەتێن سینەمایێ نینن، چونکە نیشادانا فلمان ل ھولا کونگران دبیت کوالێتی بھێتە خوارێ و ژبەر مەزنبوونا وێ دبیت ئەو رەواجا ھاتنا بینەران دیار نەکەتن، دیسان گلەیا وەلاتیان بوو تێکت ب پارەنە، ئەڤە ل ھەموو جیھانێ ھەیە و ئەڤ سالە داشکاندن ھەبووینە بۆ ھەر کەسەکی ب سێ ھزار دیناران بۆ نیشادانا ھەموو فلمان ٥٠ ھزار دینارن، بەرھەڤبوونا خەلکی پتر فلمێن کوردی دیاربیت و ئەڤەژی ژبەر زمانی بوویە.
سینەماکار ڤیان مایی گۆت: فلمە فیستەڤالا دناڤ مللەتێ مە دا تشتەکێ نوویە و چەند سالەکە، دیسان بینەرێ سینەمایێ ل سەر چوار ھولان ھێتە بەلاڤکرن و ب چاڤەکی ل سەر ھولان ب ھژمار کێم دھێنە دیتن، دەمەکی دا ل باکۆری سەرھلدانە و باشوور شەرێ ل گەل داعش و قەیرانێن ئابووری نە و گەلەک خێزان گرێدایی گەنجێن خوە نە کو دچن دەرڤەی وەلاتی و ئەڤە ھەموو ھوکارن کو خەلکی ئاگەهـ ژ فلمە فیستەڤالا دھۆک نەبیت.
ڤیانێ گۆتژی: فلمە فیستەڤالا دھۆک گرنگی وەک ھەموو جاران ھەیە خەلک مەببینت و باژێرێ مە پێ بھێتە نیاسین و کارێن ھەڤپشک بھێتەکرن و ئەڤە شورەشەکا مرۆڤایەتی و نەتەوەیی و بەرخودانی یە و گرنگیا ھەرە مەزن دڤی شەری دا باژێرێ مە فیستەڤالەکێ دگێریت و ئەڤە نامەک بۆ جیھانێ، ھەلبەت ئەڤ سالە گەلەک ژ سالێن بۆری باشترە.
داستان نوری حەمە ئەمین، قوتابیێ قوناغا دویێ سینەمایێ ل کولیژا ھونەرێن جوان زانکۆیا سەلاحەدین، گۆت: فلمێ دەسپێکێ ھاتیە نیشادان کو یێ ھونەرمەند (شەوکەت ئەمین کورکی) بوویە، کارتێکرن ل مە کر کو ب تەکنیکەکا گەلەک سادە کێشاین بۆ ئەنجامدانا کارێن باش، رۆژانێن دووڤ دا فلمێن باش و خراب ژی ھەبوون، لێ ب گشتی دباش بووین و فلمەکێ مەکسیکی کارتێکرنەکا باش ل سەر من ھەبوویە، دیسان وەک قوتابی مە گەلەک مفا ژ ورک شۆب و سمیناران دیتی یە کو فلمە فیستەڤالا دھۆکێ ھەبووینە.
میدیاکار جەمال بەرواری، بینەرەکێ فلمە فیستەڤالا دھۆک یا نێڤ دەولەتی یێ بەردەوام گۆت: کاودانێن نوکە گەلەک د نازکن ل رۆژھەلاتا ناڤین و عیراقێ ب گشتی و کوردستانێ ب تایبەتی، ئەنجامدانا کارەکێ بڤی رەنگی باژێرێ دھۆکێ بزاڤەکا مەزن و کۆمکرنا شارەزا و حەزژێکەرێن سینەمایێ ل ڤی باژێری، مێھڤانێن فلمە فیستەڤالا دھۆکێ دێ بنە بالیۆزێن وەلاتێن خوە و دێ دیمەنێ کوردستانێ بۆ وەلاتێن خوە ڤەگۆھێزن.
بەرواری گۆت ژی: باوەری یا ھەڤالێن فلمە فیستەڤالا دھۆک دا کارکرین یا بھێز بوویە و بۆ سەرکەفتنا ڤی کاری دناڤا ئەڤان قەیرانان دا شیان ڤی کاری ئەنجام بدەن و سەرکەفتنێ بۆ دخوازم.
ھەر دناڤا رۆژانێن فلمە فیستەڤالا دھۆک یا نێڤ دەولەتی دا، رۆژانە سمینار و ورک شۆپ ل سەر بابەتێن جودا جودایێن ھونەرێ سینەمایێ دھێنە گەنگەشەکرن و شرۆڤەکرن، دانە نیاسینا بزاڤێن ھونەری ل ھەموو دەڤەرێ، دچارچووڤێ ئەڤان بزاڤان دا، سمینارەک بۆ سینەماکار(ئانا دئمی) ھاتە رێکخستن و تێدا بەحسێ دیرۆکا فیستەفالا ئاسیا باسیفیک کر کو ب ئۆسکارا ئاسیا دھیتە نیاسین، گۆت: ل سالا 2007 ھاتیەدانان بارەگا ل وەلاتێ ئوسترالیا یە و ھەموو فلمێن ئاسیا دھێنە دیتن و فلم دھێنە ژێگرتن بۆ وەلاتێن دونیایێ دھێنە نیاسین، لژنە ھەیە بەردەوام تەماشەی فلمان دکەت و بەردەوام ئەڤ لژنە دھێتە گوھۆرین و نە ھەر ئێک لژنەیە ھەتا دووماھیێ و ئارمانج ئەوە ھەموو پشکدارێن کیشوەرێ ئاسیا پشکداربن د وەرگرتنا خەلاتی دا و دیسان دا ھەموو کەسان دەرفەتا خوە ھەبیت و بەرھەڤبن ل گەل مە، دیسان ل ھەر وەلاتەکی مە نوونەر ھەنە و فلمێن وەلاتێن خوە بوومە پێشنیار دکەن و دھۆک نوونەرا مە یە ل عیراقێ فلمان پێشنیار دکەت، سالانە چوار فلمێن ھەمە جۆر دھێنە وەرگرتن، دیسان دو خەلاتێن دی ھەنە ژبلی خەلاتێن مە و ئەو ژی دھێنە بەخشین بۆ سەرکەفتیێن پشکدار د ھەڤرکیان دا، دیسان دانا نیاسینا فلمسازیێن ئاسیا بۆ جیھانێ.
