وەزیرێ ساخلەمیێ: مەترسیا نەخۆشیا کۆلێرێ ل سەر ھەرێمێ ھەیە
ئەڤرۆ نيوز:
وەزیرێ ساخلەمیێ حوکمەتا ھەرێما کوردستانێ دیار کر کو بەلاڤبوونا کۆلێرێ ل چەند دەڤەرێن عیراقێ و مرنا چەند کەسان ب وێ نەخۆشیێ مەترسی ل سەر ھەرێما کوردستانێ ژی دروست کریە و گۆت “ھەرچەندە ھەتا نھا مە چ تووشبوویێن ڤێ نەخۆشیێ ل ھەرێمێ نینن، لێ مەترسی ل سەر مە ھەیە، چونکی سنوورێن مە ل گەل دەڤەرێن عیراقێ دڤەکرینە.
رێکەوت حەمە رەشید وەزیرێ ساخلەمیێ حوکمەتا ھەرێما کوردستانێ خویا ژی کر کو ھەبوونا ژمارەکا زۆرا ئاوارێن دەڤەرێن جودا جودا یێن عیراقێ ل ھەرێما کوردستانێ، مەترسی زێدەتر لێکریە و گۆت “ھەرچەندە مە چاڤدێری ل کەمپێن ئاواران زێدەتر و خورتتر کریە و ھەر ژ بۆ رێگریێ ل بەلاڤبوونا کۆلێرێ ژوورێن عەمەلیاتان ل سەر ئاستێ پارێزگەھان دروست کریە، ھەروەسا ل نەخۆشخانا مە ژوورێن جودا بەرھەڤ کرینە کو ھەر کەسێ گۆمان ل سەر ھەبیت دێ ھێنە جوداکرن، لێ ھندەک ژ وان ھاتنوچوونا دەڤەرێن دن یێن عیراقێ دکەن، لەورا دبیتە مەترسی ل سەر ھەرێمێ ژی”.
وەزیرێ ساخلەمیێ حوکمەتا ھەرێما کوردستانێ دیار کر ژی چونکی ڤەگوھاستنا نەخۆشیا کۆلێرێ ب رێیا خوارن و ڤەخوارنا پیسە، رێنمایێن وان بۆ وەلاتیان ئەوە کو ب تمامی پشتراست بن ژ وان خوارن و ڤەخوارنێن بکار دئینن و ھەردەمێ زکچوونەکا زۆر ل دەف پەیدا بوو پێدڤیە ب زووترین دەم پەیوەندیێ ب نێزیکترین بنگەھێ ساخلەمیێ بکەن .
ژ ئالیەکێ دن ڤە ڕەفاق ئەعرەجی ئالیکارێ یاریدەدەری ڕێڤەبەرێ ڕاگەیاندنا وەزارەتا ساخلەمیا عیراقێ بۆ ئاژانسا نووچێن ئەنادۆل دیار کریە کو گومانێ ل مرنا چار ئافرەتان ل قەزا ئەبو غرێب کو دکەڤیتە ڕۆژئاڤایێ بەغدایا پایتەخت دکەن کو ئەگەرێن مرنا وان نەخۆشیا کۆلێرێ بیت.
ئەعرەجی ئاشکرا ژی کر کو ٤٨ کەسێن تووشی نەخۆشیا کۆلێرێ بووینە، کو ٣٦ ژ وان ژ قەزا ئەبو غرێبن و یێن دی ژ پارێزگەھێن نەجەف و دیوانیەنە و گۆت “بلاندبوونا رێژا نەخۆشان ل قەزا ئەبو غرێب بۆ ئاڤا ڤەخوارنێ دزڤریت، چونکی یا پیسە و ب کێر ڤەخوارنێ ناھێت
ژ ئالیێ خوەڤە عەلی تەمیمی پارێزگارێ بەغدا گۆت “چار ئافرەت ل قەزا ئەبو غرێب ب نەخۆشییا کۆلێرێ مرینە و مە ڕێکەفتن ل گەل ڕێکخراوا یونسیڤ کریە بۆ گەھاندنا ئاڤا پاقژ یا ڤەخوارنێ بۆ وێ قەزایێ”.
