خەلکێ شنگالێ سکالایەکا قانوونی دێ ل سەر یوسف محەمەد تۆمارکەت
ئه‌ڤرۆ نيوز:
پەرلەمانتارەکێ بەرێ یێ جڤاتا نوونەرێن عیراقێ بۆ ئەڤرۆ دیار کر کو خەلکێ شنگالێ دێ سکالایێ ل سەر یوسف محەمەد، سەرۆکێ بەرێ یێ پەرلەمانێ کوردستانێ تۆمارکەت، چونکو وی چو جاران سەرا چیایێ شنگالێ نە دایە و ژ لایێ مەعنەوی ژی ڤە چ تشت بۆ شنگالێ نەکرینە و گۆت: “ل ڤان رۆژان د گەل دەزگەھێن قانوونی یێن شنگالێ دێ جڤینەک ھێتە کرن و سکالایەکێ ل ناڤخوە یان ژی ژ دەرڤەی وەلاتی دێ تۆمارکەین”.
مەحما خەلیل، پەرلەمانتارێ بەرێ یێ جڤاتا نوونەرێن عیراقی ئاشکرا کر، خەلکێ شنگالێ موزایەدێ ژ چ لایەنێن سیاسی قەبوول ناکەن، چونکو ئاریشا شنگالێ ئاریشەکا جینۆسایدێ و مرۆڤایەتی و نشتیمانی و نەتەوەیی یە، خەلکێ شنگالێ پێدڤی یا ب ھاریکاریا ھەر لایەنەکی ھەی، بەلێ ھەکەر بۆ مەرەمێن سیاسی بیت ئەو رازی نابن ژ بەر ڤێ چەندی ژی خەلکێ شنگالێ ب توندی داخویانیا سەرۆکێ بەرێ یێ پەرلەمانی رەت دکەت.
ناڤھاتی ئاشکرا کر، دەمێ یوسف محەمەد ژ پەرلەمانی دەرکەفتی ژنوو بەحسی شنگالێ کر و گۆت: “مە گەلەک دڤیا ئەو سەرەدانا چیایێ شنگالێ بکەت ب تنێ دا کو مەعنەویاتێن خەلکی بلند بکەت، چونکو خەلکێ شنگالێ بەری ھەموو تشتان پێدڤی یا ب ھاریکاریا مەعنەوی ھەی”.
پەرلەمانتارێ بەرێ یێ جڤاتا نوونەرێن عیراقی خویا ژی کر، یێ بزاڤێ بکەت ب ئاخڤتنان کارەساتا شنگالێ بەرزە بکەت ژێ ناھێتە قەبوول کرن و گۆت: “ب ناڤێ خەلکێ شنگالێ و شەھیدێن دەڤەرا شنگالێ و رەڤاندیان و بێ سەروشوونکریان دێ سکالایەکێ ل سەر تۆمارکەین”.
