کێم نەتەوە دێ دەست ب خوەنیشاندانان کەن
ئەڤرۆ نیوز:
رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ دیار کر کو ب پەسندکرنا کارتا نشتیمانی ل پەرلەمانێ عیراقێ زولمەکا گەلەک مەزن ل کێم نەتەوێن عیراقێ دێ ھێتە کرن، لەو ئەو داخوازێ ژ سەرۆک کۆمارێ عیراقێ دکەن وێ قانوونێ ئیمزا نەکەت، ھەکەر بھێتە ئێمزاکرن گەفێن خوە نیشادانان دکەن.
ھادی دوبانی، رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ ئاشکرا کر، ھەتا نوکە حوکمەتا عیراقێ ھەر وەکو رژێما بەعس یا ژناڤچوویی سەرەدەریێ د گەل کێم نەتەوە و ئاینێن دی ل عیراقێ دکەت و گۆت: “ل دووڤ بەندێ ٢٦ یێ قانوونا کارتا نتشتیمانی، دەمێ دەیک و باب ئایینێ خوە دگوھۆرن، زارۆیێن وان دھێنە نەچارکرن کو وان ژی د گەل خوە دا ببەن و ئایینێ وان ژی بگوھۆرن، ئەڤە ژی د گەل بنەمایێن دیموکراسیێ ناگونجیت، لەو پێدڤیە رێ ب زارۆیی بھێتە دان ھەتا ژییێ وی دگەھتە د سەر ١٨ سالیێ دا، پاشی ھەکەر زارۆیی بڤێت دشێت ئایینێ خوە ب گوھۆریت”.
گۆتژی: “ئەم وەکو ئێزدی ب توندی پەسندکرنا قانوونا کارتا نشتیمانی ل پەرلەمانێ عیراقێ رەت دکەین و دخوازین سەرۆک کۆمار ئیمزا نەکەت”.
ژ لایێ خوە ڤە یونادەم کەننا، ژ فراکسیۆنا ڕافیدەین ل جڤاتا نوونەرێن عێراقێ بۆ ئەڤرۆ خویا کر، بەندی ٢٦ یێ قانوونا کارتا نشتیمانی زارۆیێن دبن ژییێ ١٨ سالیێ دا نەچار دکەت کو ئایینێ خوە ب گوھۆرن، ئەڤ چەندە ژی جھێ قەبوولکرنێ نینە و گۆت: “بەری روونشتنا پەرلەمانێ عیراقێ دەستپێ بکەت، مە گەلەک بزاڤکرن کو بەندێ ٢٦ یێ قانوونا کارتا نشتیمانی نەمینیت، چونکو یێ دەستۆری نینە، دڤێت رێ ب زارۆیێ بھێتە دان ھەتا ژییێ وی دبیتە ١٨ سال و د سەر دا ژنو ئەو یێ ب کەیفا خوەیە، وی دڤێت ل سەر ئایینێ خوە بمینیت یان ئایینێ خوە ب گوھۆریت”.
یونادەم ئاماژە ب وێ چەندێ ژی کر، پرانیا ئەندامێن فراکسیۆنێن لایەنێن سیاسی د گەل وێ چەندێ دا بوون کو بەندێ ٢٦ بمینیت و ب پرانیا دەنگان پرۆژێ قانوونا کارتا نشتیمانی ھاتە پەسەندکرن و گۆت: “ھەر ئەڤ تشتە د قانوونا ٦٥ یا سالا ١٩٧٢ دا یا سەر دەمێ رژیما دکتاتۆر یا ژناڤچوویی ھاتبوو، نوکە ژی ئەو بەند نەھاتە گوھارتن د قانوونا کارتا نشتیمانی دا ما”.
دا زانین ژی کو ئەڤ چەندە دێ زیانێ گەھینیتە مەسیحی، ئیزدی، تورکمان و کاکایی و ھەموو کێم نەتەوێن دی ل عیراقێ.
