داگیركرنا هه‌رێما كوردستانێ ژ لایێ كوردان ڤه!
زاراڤێ داگیركرن پتر دهێته بكارئینان گه‌ر لایه‌نێ ده‌رڤه په‌له‌مارا ناڤخوه‌یێ وه‌لات یان ئاخا لایه‌نه‌كێ جودا بده‌ت، كوردستان ژی بگشتی بێ به‌هر نه‌بوویه ژ داگیركرنا بیانی، به‌شێ باكوور ل ژێر داگیركرنا توركیا(تورك)، به‌شێ روَژهه‌لات ئیرانێ(فارس) و به‌شێن باشوور و روَژئاڤا بن داگیركرنا عێراق و سوریا(عه‌ره‌ب). گومان تێدا نینه هه‌رێما كوردستانێ و ده‌ڤه‌را به‌هدینان ب تایبه‌تی بهه‌می شێواز و شیانان هاریكاریا پارچه‌ێن دیتر كرییه وه‌ك ئه‌ركه‌كێ نه‌ته‌وه‌یی ژ پێخه‌مه‌ت براێن مه ل وان وه‌لاتان بگه‌هنه مافێن خوه ێن ره‌وا، هه‌ر بوَ وێ مه‌ره‌مێ ده‌هان بنگه‌ه و باره‌گا و ناڤه‌ندێن پارتێن هه‌رسێ پارچێن كوردستانێ ل هه‌رێمێ هاتینه ڤه‌كرن و ئازادانه كار و چالاكی ێن خوه دكه‌ن و هه‌موو ئاسه‌نكاریێن ئابووری، سیاسی و سه‌ربازی بۆ هاتینه كرن، لێ مخابن هنده‌ك ژ وان لایه‌نان ئه‌ڤ چه‌نده ب ده‌لیڤه زانی و رابۆن ب سه‌پاندنا ئه‌جێنداێن خوه یێن حزبی و ئایدولوَژی ێن به‌رته‌سك و ب هه‌موو ره‌نگا په‌له‌مارا ده‌ستكه‌فتێن هه‌رێما كوردستانێ دده‌ن و بووینه داره ده‌ستێن وه‌لاتێن هه‌رێمی ل باشووری و تایبه‌ت ل ده‌ڤه‌رێن سنوری ل گه‌ل توركیا و ئیرانێ و زێده‌باری بووینه باگرانی بۆ خه‌لكێ هه‌رێمێ ژ لایێ هه‌وێن كار و پێشكه‌ش كرنا خزمه‌تگوزران ڤه. خوه سه‌پاندن و داگیركرن هه‌ر ئێك پێناسه هه‌یه ڤێجا بیانی بیت یان برا، ئه‌ڤان پارتان كو خوه ب لایه‌نگرێن ئایدولوَژیا ئاپوَچی دزانن (په‌كه‌كه، په‌یه‌ده و په‌ژاك) كه‌ڤتینه به‌ره‌یێ دژایه‌تیكرنا باشوورێ كوردستانێ، باكوور و روَژهه‌لات و روَژئاڤا هێلاینه بن دلوَڤانیا تورك و فارسا و عه‌ره‌بان. زێده‌باری ئه‌و تێكدانا ئه‌و دكه‌ن جامێرا رازی نابن ب مێهڤان ژی بهێنه ناڤكرن له‌وما ب دیتنا من ره‌فتار و سیاسه‌تا وان داگیركه‌رن، ئه‌ڤجا دوژمنی چ به‌رامبه‌ر مه كرییه ئه‌وان ژی هه‌مان رێك گرتینه به‌ر. دیسا پرسا شه‌نگالێ كو بوویه ده‌رفه‌ت بوَ وان په‌لامارا به‌هدینان بده‌ن و خوه‌س نیشان دده‌ن كو ئه‌و پارێزه‌رێن راسه‌قینه یێن و ئێزدی یا و باشووری نه، لێ سوند دخۆم وان مه‌زنترین زیان و زه‌ره‌ر گه‌هاندیه بزاڤا نه‌ته‌وه‌یی یا كوردی ل هه‌موو پارچێن كوردستانێ و هه‌ر كه‌سێ لسه‌ر رێبازا وان نه‌بیت ب خائین و دژی به‌رژه‌وه‌ندیێن ل قه‌له‌م داینه و بزاڤێن ژناڤبرنا وان كریه و ب دله‌ك سار شه‌رێ براكوژیێ كریه و هه‌موو ده‌ما د ئاماده‌نه بكه‌ن. هه‌ر ئه‌ون ناهێلن پتر ژ چار هزار پێشمه‌رگێن روَژئاڤا ده‌ربازی پارچا ناڤبری ببن، یان دڤێت ته‌ڤلی هێزێن یه‌په‌گێ ببن ب بهانه‌یا په‌یدابوونا شه‌رێ ناڤخوه‌یی، باشه دێ بێژین ئه‌ڤه دروسته به‌لێ بوَچی ئه‌و ل باشووری نه و ل شه‌نگالێ كێمتر ژ هه‌زار گه‌ریلا وشه‌رڤانان هه‌نه و بێ سنوور ئاسته‌نگا بۆ هێزێن پێشمه‌رگه‌ی دروست دكه‌ن، پا ئه‌ڤه ژی نابیته مه‌ترسییا شه‌رێ ناڤخوه‌یی!! كو وان ب پیلان هه‌ولێن خوه دژوارتر كرینه. لسه‌ر ئاستێ نێڤنه‌ته‌وه‌یی و یاسا و كارنامه‌یێن جیهانی نهو ئه‌و ب داگیركه‌ر دهێنه نیاسین، هه‌روه‌كو چه‌وا رژێما سه‌دام حسێنی ل سالا1990كوێت داگیركری ئێكسه‌ر جڤاكێ نێڤ ده‌وله‌تی هاته ده‌نگ و ب زه‌برا هێزێ رژێما عێراقێ كره ده‌رڤه، ئه‌رێ هه‌ردوو وه‌لات نه‌ته‌وه عه‌ره‌ب نه‌بوون؟ به‌لێ ب داگیركرن هاته وه‌سف كرن چنكو بێ رازیبوونا خه‌لكێ كوێتێ سه‌دام حسێنی ده‌ست درێژی كره سه‌ر ئاخا وان، یا دیتر هه‌ردوو وه‌لاتێن كوریا باشوور و باكوور هه‌رچه‌نده ئێك نه‌ته‌وه‌نه لێ كوریاباكور ئێك پێنگاڤ بهێته ناڤ سنوورێ كوریا باشوور دێ ب توَندی ژلایێ نه‌ته‌وه‌ێن ئێكگرتی ڤه هێته سزادان چنكو داگیركرنه. به‌لێ بۆ به‌رژوه‌ندا بلندا نشتیمانی یا باشوور و كوردستانێ بگشتی خه‌لكێ ده‌ڤه‌را به‌هدینان یان هه‌روه‌كی دبێژنه مه زوونا زه‌ر، بێ ده‌نگی هه‌لبژارتیه به‌رامبه‌ر وان. ئه‌ڤجا مه بڤێت و نه‌ڤێت حالێ حازر مه و وان سنوورێن نێڤ ده‌وله‌تی هه‌نه و هه‌ر پێنگاڤه‌كا نه ره‌وا بهاڤێژن داگیركرنه ب هه‌موو پیڤه‌ران. ده‌رباره‌ی وان هه‌ردوو لایه‌نێن سلێمانیێ كو بتنێ بۆ مه‌به‌ستێن بێ مانا پشته‌ڤانیا وان دكه‌ن بلا بزانن دێ كارتێكرنه‌كا نه‌رێنی یا ڤان پارتان پتره ژ یا دوستێن وان حه‌شدا شه‌عبی هه‌روه‌كی ل دوزخورماتو و كه‌ركوكێ مه ئه‌نجامێن سیاسه‌تا وان دیتن.
