ده‌ستێن خوه ژ به‌ریكێن خوه بیننه ده‌ر و بكه‌نه د ده‌ستێن هه‌ڤدو دا
وه‌لاتێ مه ئه‌وێ دبێژنێ كوردستان ب درێژاهیا دیرۆكا خوه دوژمنان به‌لا خوه ژێ ڤه‌نه‌كریه و هه‌موو ده‌مان بزاڤا كری داگیر بكه‌ن و خێر و به‌ركه‌تا وێ بۆ خوه ببه‌ن و ملله‌تێ مه ژێ بێبار بكه‌ن.
د چ ده‌مان دا وه‌كو ڤان 24 سالێن بۆری بۆ مه ده‌لیڤه چێنه‌بوویه، كو ئه‌م ده‌ست ب ئاڤاكرنا وه‌لاتێ خوه بكه‌ین، 12 سالێن پشتی سه‌رهلدانێ و 12 سالێن پشتی كه‌فتنا رژێما سه‌دامی و قوَناغه‌كا پری ده‌لیڤه و ده‌ستكه‌فت، قوَناغه‌كا پری دوبه‌ره‌كی و گه‌نده‌لی، قوَناغه‌كا پری پاره و بێ پلانی، كو ب تنێ ئه‌م شیان د ڤێ قوَناغێ دا بلوَكان بدانینه سه‌رئێك، بلوَكێن ئاڤاهیان و بلوَكێن دۆلاری، و ئه‌م نه‌شیاین خوه ب قه‌باره‌كێ گه‌له‌ك بچووك ژی مرۆڤان تێدا ئاڤا بكه‌ین، مه ئاڤاهی بێ پلان بلند كرن و مرۆڤ به‌رامبه‌ری وان ئاڤاهیان گه‌له‌ك بچووك بوون، ئابووره‌كێ ل سه‌ر دیوارێ به‌فرێ مه ئاڤا كر و مه ژ بیر كر كو هه‌موو ده‌مان دوژمنان دڤێت مه بهه‌ڕفینن و مه برسی بكه‌ن، یا ژ مه ڤه هه‌تا هه‌تایێ دێ پاره د جوَكا دا چن و هنده‌ك دێ ڤێده‌ن و هنده‌ك دێ به‌رمایكێن وان پاقژ كه‌ن.
وه‌لات چاوا ئاڤا دبن؟ وه‌لات ب ره‌وشه‌نبیریا ئاڤاكرنا ئه‌ردی “ئه‌رد و مرۆڤ” ئاڤا دبن، وه‌لات ب كار و بزاڤ و وه‌ستیان و وه‌فاداری و نیازێن پاك و ب زانین و زانستی ئاڤا دبن.
رێڤه‌برنا وه‌لاتان ب عاقلێ گوندان دێ گوندێن مه‌زن ژێ چێبن. مه‌زنبوونا ڤالاتیێ د ناڤبه‌را خه‌لكی و ده‌ستهه‌لاتێ دا، ئاڤاكرنا سیاسه‌تا ئه‌ز دێ قازانجێ كه‌م و تو دێ خوساره‌ت بی، یان ئه‌ز خوساره‌ت بووم بلا تو ژی خوساره‌ت بی و ل سه‌ر بنه‌مایێ پشك و به‌هران و لێكڤه‌كرنێ، دێ وه‌لاته‌كێ وه‌كو باشوورێ كوردستانێ “هه‌رێما كوردستانا عێراقێ” په‌یدا بیت.
وه‌لات ل سه‌ر بنیاتێ راستگۆیێ و باوه‌ری دهێنه ئاڤاكرن، یێ باشیێ بكه‌ت سه‌حه‌تخوه‌شیێ لێبكه‌ن و یێ شاشیان بكه‌ن بێژنێ ته شاشی كر، نه ئێك تاوانه‌كێ بكه‌ت و نه‌هێته سزادان چنكو فلان كه‌سه، یان ئێك بهێته سزادان چنكو فلان كه‌سه. شه‌نگستێ ئاڤه‌دانكرنێ ئه‌وه كه‌سێ ژ هه‌ژی ل جهێ هه‌ژی بیت و نه ب مرۆڤ مرۆڤكانێ و عه‌شیره‌تیێ و ل سه‌ر بنه‌مایێ پلێن حزبی بیت، تو حزبیه‌كێ باش بی رامانێ ئه‌و نینه تو رێڤه‌به‌ره‌كێ باشی، تو پێشمه‌رگه‌كێ زیره‌ك و چه‌له‌نگ بی، رامانا وێ ئه‌و نینه تو وه‌زیره‌كێ باشی، یان بابێ ته پێشمه‌رگه بیت دڤێت تو رێڤه‌به‌رێ گشتی بی، یان بابێ ته ئاغا بیت دڤێت تو ببیه ئه‌ندامێ په‌رله‌مانی.
وه‌لات ب بنه‌مایێ په‌ژراندنا ئێك و دو دهێته ئاڤاكرن، جوداهیا بۆچوونان دۆزێ پێشڤه دبه‌ت، لێ نه ئه‌و جوداهی ببنه ئه‌گه‌رێ لێككه‌فتنێ ل سه‌ر كورسیك و پۆستان و ملله‌ت پشتگوه بهێته هاڤێتن.
پێدڤیه ئه‌گه‌رێن دوبه‌ره‌كیێ نه‌مینن و هه‌ر تشتێ دبیته ئه‌گه‌رێ نه‌ڤیانێ و دژاتیكرنا یێ دی و گۆتار و راگه‌هاندنا ل دژی ئێكدو نه‌مینیت دا وه‌لات ئاڤا بیت و ده‌ستكه‌فت ژ ده‌ست نه‌چن. ئاڤاكرنا وه‌لاتان پلان و ده‌ستنیشانكرنا ئارمانجان دڤێت، نه كارگێریا بیروكراتی و رێڤه‌به‌رنا ب ته‌له‌فۆنان، پێدڤیه هه‌موو شیانێن فه‌رمی و نه فه‌رمی و رێكخراو و سه‌نته‌ر و سازیێن دی و خه‌لك و حكومه‌ت ببنه ئێك بۆ ئاڤاكرنا وه‌لاتی، نه وه‌كو مه ل باشوورێ كوردستان خه‌لك حكومه‌تێ وه‌كو به‌ڤلێ خوه بزانیت، یان هه‌كه ته جاره‌كێ داخوازا مافه‌كێ خوه كر و رێپیڤانه‌كا ئاشتیانه كر ته وه‌كو به‌ڤلێ حكومه‌تێ بزانن.
به‌رپرساتیا ئاڤاكرنا وه‌لاتی نه ل سه‌ر ملێن حكومه‌تێ ب تنێ یه، به‌لێ وه‌لاتی ژی وه‌كو تاكه كه‌س دڤێت هه‌موو شیانێن خوه بێخیته د خزمه‌تا ئاڤاكرنێ دا، به‌لێ نه ب هزاران نامێن دكتورایێ و ماسته‌رێ هه‌بن و هێشتا ئه‌م نه‌شیابین بیستانه‌كێ باجانسۆركان دروست بكه‌ین.
ئه‌ڤ ره‌وشا ئه‌م كه‌تینه تێدا و وه‌لاتێ مه بوویه مه‌یدانا ڤاڤارتنا حساباتان، و هه‌ر لایه‌نه‌ك بزاڤێ دكه‌ت رێ بۆ مایتێكرنێن ده‌ره‌كیێن نه‌شه‌ریف خوه‌ش بكه‌ت، زێده‌باری مه‌زنترین شه‌رێ ئه‌م كه‌تینێ ل گه‌ل داعش “كو د دوو چه‌رخان دا و به‌لكو ب درێژاهیا دیرۆكێ شه‌ره‌كێ وه‌سا مه نه‌كریه”، ئه‌گه‌رێ وێ یێ ئێكێ ئه‌وه كو به‌رپرسێن ڤی وه‌لاتی د بێ باوه‌رن و ژ نیعمه‌تێن ترسا خودێ و راستگۆیێ دووركه‌فتینه، و چ تێگه‌هێن نیشتمانی و رێزگرتن ل خوه و ل یێ دی ل نك نه‌ماینه.
به‌رده‌وامیا ڤێ سیاسه‌تێ خزمه‌تا وه‌لاتی ناكه‌ت، چنكو وه‌لات ل سه‌ر بنیاتێ نه‌ڤیانێ و دوبه‌ره‌كیا نه‌شه‌ریف و دروشمێن هه‌لبژارتنان و داخویانیێن رۆژنامه‌ڤانی ناهێته ئاڤاكرن، به‌لێ ل سه‌ر بنیاتێ ڤیانێ و ئێكدو قه‌بوولكرنێ و سینگفره‌هیێ و ئاشتیێ دهێته ئاڤاكرن.
ئه‌ڤجا ده‌ستێن خوه ژ به‌ریكێن خوه بیننه ده‌ر و ده‌ستێن خوه بكه‌نه د ده‌ستێن هه‌ڤدوو دا، چنكو هه‌كه سوبه‌هی خودێ نه‌كه‌ت وه‌كو جاران دوژمنێن مه ل سه‌ر مه رێككه‌فتن، نه هه‌وه به‌ریك دمینیت و نه كورسیك، و مه ژی وه‌لات نامینیت.
