بەلێندەرێن دھۆکێ چەکێن خوە یێن ب ئەرزانی دفرۆشن
ئەڤرۆ نیوز:
تێکچوونا باردوخێ ئابووری یێ ھەرێمێ و خەرج نەکرنا چەکێن پرۆژێن بەلێندەران، بوویە ئەگەر کو بەلێندەرێن دھۆکێ قەستا بازارێ دھۆکێ بکەن و چەکێن خوە ب خوسارەتی بفرۆشن، ھندەک بەلێندەران چەکێن خوە یێن ملیۆن دیناری ب ٧٧٠ ھزار دولاران فرۆتینە.
پارەگھۆرەکی ب ناڤێ (ن.م.ح) ل بازارێ پارەگھۆران ل دھۆکێ بۆ (باس) دیار کریە، ئەڤە سەرێ سالەکێ یە بازارێ کرین و فروتنا چەکان ل ھەرێما کوردستانێ پەیدا بوویە، بەلێندەر ژ نەچاری چەکێ خوە ب بھایەکێ گەلەک کێمتر ژ بھایێ چەکی دفرۆشن، بۆ نموونە ئەگەر دۆلار ب (١٣٠٠) دیناران بیت، بھایێ فروتنا چەکی (١٧٠٠) ب دینارانە، ئانکو چەکێ ب ملیۆن دولاران دھێتە فرۆتن ب ٧٧٠ ھزار دۆلاران دھێتە فرۆتن و بکڕێ ڤی چەکی دچیتە رێڤەبەریا کاروبارێن قانوونی بەلێننامەکێ ل سەر خوە چێ دکەت کو داخوازا خەرجکرنا ڤی چەکی نەکەت وەک بەلێندەر ھەتا بارێ ئابووری یێ حوکمەتا ھەرێمێ دروست دبیت.
ل دووڤ رێنمایێن وەزارەتا دارایی ژمارە ٩/٤/٦٨٢٢ ل ٢٠/٨/ ٢٠١٤ دەرکەفتین تێدا ھاتیە پارێن بەلێندەران بۆ بکەنە چەک و بچنە سەر حسابا وان د بانکان دا، بەلێ ب مەرجەکی بەلێندەر بەلێننامەکێ ل سەر خوە چێ کەت کو داخوازا خەرجکرنا ڤی چەکی نەکەت ھەتا بارێ دارایی ل ھەرێمێ دروست دبیت.
زیرەک دۆسکی سەرۆکێ لقێ دھۆک یێ سەندیکا بەلێندەرێن کوردستانێ دیار کر، ل مەھا ١٢/٢٠١٣ پێشینەیێن بەلێندەران ژ لایێ وەزارەتا دارایی ڤە ھاتینە راوستاندن، ل مەھا ٤/٢٠١٤ وەزارەتا دارایی گۆت دێ ب رێژا ٤٠% ژ پێشینەیا دەینە بەلێندەران، بەلێ ئاخفتنا خوە بجە نەئینا.
زیرەک دۆسکی داخواز ژی کر، ل دووڤ قانوونێن وەزارەتا دارایی پرۆژێن بەلێندەرێن ھاتینە بجھئینان ب دوماھی بینیت، یان کۆژمەکێ پاران بۆ خەرج بکەت، چونکو بەلێندەر چ ژ سزایێن خوە نزانیت و یێ باجا خوە ب دۆلاری ددەت، ئەڤ ھەموو ئەگەرە کارتێکرنێ ل سەر بەلێندەری دکەن کو چەکێ خوە ب خوسارەتی بفرۆشیتە ھندەک کەسان و ئەڤ کەسە ژی ب واستە چەکی ل بانکێ خەرج دکەن.