رۆژنامەکا بریتانی: تورکیا بۆ شەرێ سووریێ ل دووڤ ھەڤپەیمانیەکا نوو یە
ئەڤرۆ نیوز:
رۆژنامەکا بریتانیا دیار کریە کو تورکیا گڤاشتنان ل سعوودیێ و چەندین وەلاتێن دی یێن عەرەبی دکەت کو وان وەلاتان وەک ھەڤپەیمانێ خوە دبینیت و دڤێت ب رێیا وان بچنە ناڤ ئاخا سووریایێ، چونکو تورکیا باش دزانیت ب تنێ نەشێت شەرێ سووریایێ بکەت ئەمریکا ژی پشتەڤانیێ ل تورکیا ناکەت.
رۆژناما تایمز یا بریتانی دوھی راپۆرتەک سەبارەت ب ھێرشێن چەند رۆژێن دووماھیێ یێن تورکیا بۆ سەر ناڤەندێن یەکینەیێن پاراستنا گەل ل سووریێ بەلاڤ کر و راگەھاند کو تورکیا دبینیت کو داعش رۆژ ب رۆژێ لاواز دبیت و ل جھێ وێ ھێزێن پاراستنا گەل ب ھێز دکەڤن و ئەو یەک د بەرژەوەندیا تورکیا دا نینە و ژ بەر ھندێ ژی دەمەکە تورکیا گڤاشتنان ل سعوودیێ و وەلاتێن دی یێن عەرەبی دکەت کو ئەو پێکڤە ھێزێن خوە رەوانەی سووریێ بکەن، چونکو تورکیا ب تنێ نەشێت بچیتە ناڤ ئاخا سووریایێ.
د بەردەوامیا راپۆرتێ دا ھاتیە کو بەرپرسەکێ پایەبلند یێ تورکیا دیار کریە ئەو باش دزانن کو رەوشا سووریێ گەلەک ئالۆزە و وەلاتێ وان نەڤێت ب تنێ بچیتە ناڤ ئاخا سووریایێ و ژ بەر ھندێ ژی تورکیا ل ھەڤپەیمانێن نوو دگەریت و دخوازیت ھەڤپەیمانیەکا ب ھێز دروست بکەت و وەسا بچنە ناڤ ئاخا سووریایێ، لێ ھەتا نھا ژی ئەمریکا پشتەڤانی ل وێ یەکێ نەکریە و تورکیا ژی ژ ھەلویستێ ئەمریکا و گەلەک وەلاتێن ئورۆپا دلگرانە.
ل ئالیێ دی جڤاتا ئاسایشا نێڤدەولەتی ژی کۆمبوونەک بلەز سەبارەت ب ھێرشێن تورکیا بۆ سەر پێگەھێن یەکینەیێن پاراستنا گەل ساز کر و د ئەنجاما کۆمبوونێ دا ھەموو وەلاتێن پشکدار داخوازا ژ تورکیا کرن کو ھێرشێن خوە یێن ل سەر ناڤەندێن یەکینەیێن پاراستنا گەل بدەتە راگرتن و ھەکە تورکیا دڤێت بلا شەرێ داعشێ بکەت.
ھێمن سەیدی چاڤدێرێ سیاسی و بسپۆرێ کاروبارێ تورکیا ژی د ڤێ دەربارێ دا ل بەرپەرێ خو یێ فەیسبووکێ راگەھاند کو جارا یەکێ یە جڤاتا ئاسایشا نێڤدەولەتی شیا بریارەکا وەسا گرنگ بۆ پشتەڤانیا کوردێن رۆژئاڤایێ کوردستانێ ل دژی تورکیا وەربگریت و ئەو یەک پێنگاڤەک گەلەک مەزن و دیرۆکی یە و ئێدی تورکیا نەشێت ل گۆر دلێ خوە ھێرشێ ھێزێن کوردی ل سووریێ بکەت.
ھەروەسا گەلەک دەزگەھێن راگەھاندنا تورکیا ژی دیار کرن کو پشتی بریارا جڤاتا ئاسایشا نێڤدەولەتی دوھی ھێزێن سەربازی یێن تورکیا بۆمبەباران کرنا ناڤەندێن یەکینەیێن پاراستنا گەل دوھی دا راگرتن.
