ئەڤرۆ بڕیار دێ ل سەر کێمکرنا بھایێن کەلوپەلان ل دھۆکێ دێ ھێنە دان

ئه‌ڤرۆ نيوز:
ل پارێزگەھا دھۆکێ دانوستاندن ل سەر کێمکرنا بھایێ کەلوپەلان، ئاڤاھیان، سوتەمەنیێ و نۆشداران و چەند بیاڤێن دی یێن گرێدای ب ژیانا رۆژانە یا وەلاتیان ڤە ھاتە کرن و چەند بھا ھاتنە پێشنیارکرن کو د بەرژەوەندیا وەلاتیان دا بن، بڕیارە ئەڤرۆ 25/2/2016 کۆمبوونەک ل پارێزگەھێ ل سەر ھەمان تشت بھێتە کرن و رەنگە چەند بڕیار بھێنە دان.
فەرھاد ئەمین ئەترووشی، پارێزگەرێ دھۆکێ و ب بەرھەڤبوونا فەھیم عەبدوللا، سەرۆکێ ئەنجوومەنێ پارێزگەھا دھۆکێ و محەمەد ئەمین شەرەفانی، سەرۆکێ دادگەھا دھۆکێ و رێڤەبەریێن پەیوەندیدار ل سەر کێمکرنا بھایێ کەلوپەلان و کرێیان و ھەموو ئەو بیاڤێن ب ژیانا وەلاتیانڤە گرێدی کۆمبوون، تێدا دانوستاندن ل سەر چاوانیا کێمکرنا بھایان کو دبەرژەوەندیا وەلاتیان دا بن ھاتە کرن.
فەرھاد ئەمین ئەترووشی، پارێزگەرێ دھۆکێ دیار کر کو بابەتی کێمکرنا بھایان و کرێیان گەلەکێ گرنگە، ژ بەر کو یێ گرێدایە ب ژیانا رۆژانە یا وەلاتیانڤە، لەو دڤێت ب رژدی کار ل سەر بھێتە کرن و گۆت: “بەری نوکە چەند ڕاپۆرت ل سەر کێمکرنا بھایان ھاتبوونە بەرھەڤکرن، دیسا کێمکرنا بھایێن پێشنیارکری ھاتنە دیارکرن، کو گرێداینە ب بیاڤێن گرنگ یێن ژیاناوەلاتیان، وەکو: کرێیێن ئاڤاھیان و خزمەتێن ناڤ شوقێن ئاکنجیبوونێ، سۆتەمەنیان، کەرەستێن خوارنێ، بھایێ کلینیکێن نۆشداران و تاقیگەھان، کریێن ڤەگوھاستنێ و بھایێ کارەبا موەلیدان”.
ھەروەسا پشتی بەرچاڤکرنا بھایێن پێشنیارکری و رێژا کێمکرنێ ب بەرفرەھی دانوستاندن ژ لایێ بەرھەڤبوویان ل سەر ھاتە کرن، کو پتر وەلاتی ژێ مفادار بن و ب رێیێن قانوونی بیت و بڕیار ل سەر کێمکرنا ھەموو بھایان بھێنە دان.
بڕیارە ئەڤرۆ ژی کۆمبوون ل سەر ھەمان بابەت یا بەردەوام بیت و رەنگە تێدا ھژمارەکا بڕیاران بھێنە دان.

کۆمێنتا تە